تختار ايه؟: كرولا أو النترا أو جوك أو سول 2013

**esam_ayad** · 13-08-2012 04:23 PM

السلام عليكم. بصو ياجماعه أنا بقالي تسع شهور بفكر أشتري عربيه جديده وكنت محتار جدا جدا جدااااااا لكن ماكنتش مضطر لحد ماعربيتي اتسرقت. انا شغال في الكويت ومحتار بين كذا عربيه:
1-تويوتا كورولا 2013 أعلي فئه: تمنها 5500 دينار كويتي يعني بالمصري تقريبا 118 ألف جنيه ودي فيها اتنين ايرباج وabs وسنسور خلفي وجنوط 16 سبور ومرايات تنطوي مع قفل السياره.العربيه مصنوعه في تايوان مش اليابان.
2-هيونداي النترا 2013الفئة قبل الأخيره: دي تمنها 4700 دينار يعني تقريبا 100 ألف جنيه ودي فيها واحد ايرباج وabs وسنسور خلفي وجنوط 16 وكشافات ضباب وفتحة سقف وطاره مالتي فانكشن جلد واشارات بالمرايات.وعليها ضمان مدي الحياه علي الموتور والفتيس والمكيف والكهربا بشرط اجراء الصيانه كل 5000كيلو في التوكيل.
3-نيسان جوك2013 الفئة التانيه: تقريبا نفس سعر الكورولا ومافيهاش abs بس فيها كماليات كتيره.
4-كيا سول2013 الفئة قبل الأخيره: تمنها تقريبا 4700 دينار ومش متأكد من امكانياتها بس فيها abs .وعليها ضمان 10 سنين وصيانه مجانيه سنتين.

أنا عايز العربيه علشاني أنا وزوجتي , لكن أحيان كتيره الكنبه الخلفيه هاتبقي مليانه بتلات أفراد علشان زمايلي - حجمهم أكبر من المتوسط - بييجو يركبو معايا وانا مروح من الشغل.
أنا مش بتاع جري وغرز واخري في السرعه 120 و أخر سرعه جبتها كانت 170 وعمري ماعملتها الا كام مره من ساعة مااتجوزت.
أنا عاوز العربيه المناسبه من دول اللي تستحمل البهدله في الكويت وأعرف ابيعها بسهوله بعد ست او سبع سنين من الاستخدام لما أجمركها وأنزلها مصر.

**S O P H O S** · 13-08-2012 05:01 PM

بالنسبة ليا الكورولا
والله اعلم ..

**ahmedbasto** · 13-08-2012 05:54 PM

انا على الكلام اللى مكتوب اختار النترا لأن هى اللى فيها الى امكانيات وضمان مدى الحياة وسعرها اقل من الكورولا

**bassol2000** · 13-08-2012 06:12 PM

الكروﻻ هى الاختيار الانسب على ما اعتقد وتوكل علي الله و قارنها على الحقيقه مع الالنترا لو الالنترا افضل ... اشتريها وبلاش التويوتا بس فى الغالب انا برشح التويوتا

**esam_ayad** · 13-08-2012 08:23 PM

المشاركة الأصلية كتبت بواسطة bassol2000

الكروﻻ هى الاختيار الانسب على ما اعتقد وتوكل علي الله و قارنها على الحقيقه مع الالنترا لو الالنترا افضل ... اشتريها وبلاش التويوتا بس فى الغالب انا برشح التويوتا

أنا ركبت دي وركبت دي.وكان اختياري قبل ماأشوف النترا في المعارض هناك وأركبها هو الكرولا بلا منافس لكن لما ركبت وسوقت الالنترا ابتدي عندي الاحتيار لأنهم قريبين من بعض في السواقه-سقت لحد سرعة 120-

**Samir Elshahawy** · 14-08-2012 12:29 AM

سيدي الفاضل ..

كل عام و حضرتك و الامة الاسلامية كلها بخير

يجب أن نقسم المقارنة الي قسمين :

أولا.. الكورولا و الالنترا
ثانيا.. الجوك و السول

أولا.. الكورولا و الالنترا:
مبدئيا العربيتين زي بعض في كل حاجة تقريبا و ده من خلال قيادتي للعربيتين (الكورولا كانت معايا لمدة 4 شهور و الالنترا معايا بقالها 11 شهر) و أقدر أقول لك الألنترا زي الكورولا في ايه :
- عزل الصوت
- العفشة الناعمة
- اتساع الصالون
و لكن الالنترا تتفوق في أنها أقل أستهلاكا للبنزين و محرك أقوي و احدث
أما الكورولا تتفوق في جودة الخامات الداخلية

نيجي بقي لمتطلباتك و أحتياجاتك :
- أتساع الصالون : تقريبا العربيتين متشابهتين و هايحققوا الغرض منهما لكن مع ملاحظة أن أرتفاع السقف في الكنبة الخلفية في الالنترا اقل من الكورولا يعني لو اصحابك من طوال القامة هايخبطوا في السقف
- السرعة و الثبات : العربيتين هايجيبوا ال 170 كم/ ساعة بسهولة مع ثبات جيد جدا علي الطريق
- الارتفاع عن الارض (مهم علشان المطبات المصرية) : تقريبا الأثنين نفس الارتفاع و غالبا هايحكوا في المطبات مع التحميل
- وسائل الامان : تقريبا العربيتين متساويتيين و أن كانت الكورولا تتفوق بأيرباج أضافية
- السعر : الالنترا تتفوق لأنها أقل في السعر
- سعر أعادة بيع : الالنترا هاتكسب خاصة انها هاتكون بمواصفات أفضل من اللي موجودة في مصر

أنا لو مكانك و عن تجربة هأشتري الالنترا , لكن لو بند أرتفاع السقف في الكنبة الخلفية هايضايق يبقي هات الكورولا بدون تفكير

ثانيا.. الجوك و السول :
أنا معلوماتي عن العربيتين دول من خلال أصدقائي اللي معاهم العربيتين لكن هأتكلم عليهما من النقاط اللي حضرتك ذكرتها و العربيتين تقريبا متشابهتين في الاتي :
- عزل الصوت : أقل من الكورولا و الالنترا لكن جيد
- العفشة : أنشف من الكورولا و الالنترا
- أتساع الصالون : الكيا سول اوسع من الجوك بمراحل و خاصة أرتفاع السقف و صالونها مريح
- السرعة و الثبات : أعتقد العربيتين هايكونوا ثابتتين علي السرعات العالية و لكن مش زي الكورولا و الالنترا
- وسائل الامان : من كلامك الكيا سول تكسب
- الارتفاع عن الارض : العربيتين اعلي من عربيات المجموعة الاولي و ده مش هايسبب مشاكل نهائي مع المطبات أثناء التحميل (فقط الميزة دي في مصر)
- سعر أعادة البيع : الكيا سول اعتقد معروفة اكثر من الجوك في مصر و أن كانت الجوك قد بدأت في الانتشار ايضا

بالمقارنة بين العربيتين (الجوك و السول) هأختار الكيا سول

كده المقارنة هاتكون مابين :
الألنترا أو الكورولا مع السول
أنا شايف أن المجموعة الاولي (الكورولا - الالنترا) تكسب للاسباب الاتية :
- أتساع الصالون + أتساع الشنطة (اللي هاتحتاجها في السفر)
- الضمان (خاصة لو الالنترا)
- سعر أعادة البيع

كده يبقي أنا بأرشح لك العربيات بالترتيب التالي :
1- تويوتا كورولا
2- هيونداي ألنترا
3- كيا سول
4- نيسان جوك

و ربنا يوفقك أن شاء الله في الاختيار

**esam_ayad** · 14-08-2012 02:10 AM

شكرا لحضرتك على النصيحة والإيضاح المبنيين علي الخبره والتجربه وليست علي الإستماع.

**esam_ayad** · 15-08-2012 06:35 PM

بس انا عندي استفسارين تاني لحضرتك بخصوص الانترا:
1-انا قريت كتير علي ان مكان فتحات التكييف اللي في وسط التابلوه محطوطه غلط وان اللي سايق العربيه مش هايحس بالهوا بتاع التكييف؟
2- هل التكييف هايقدر يتحمل درجة الحراره بتاعة الكويت اللي هي ممكن توصل لأكتر من خمسين درجه؟
وأنا بسألك السؤال ده لأنك جربت الكرولا والالنترا .ومعروف ان تكييف الكورولا قوي جدا ومافيش حد اشتكي منه من زملائي.

**amrico** · 15-08-2012 10:31 PM

مع كامل الإحترام للسول والجوك
لكن انا شوفت الصالون بتاع العربيتين (زيرو في معارض)، وبصراحة خامات رخيصة جدا للتابلوه وفقيرة جدا من جوا، وريحة البلاستيك الرخيص لا تطاق، ودا طبعا حاجة مهمة لان دا اللي بنكون شايفينه وحاسينه طول الوقت واحنا راكبين
انا بتكلم عن عربيات شفتها في مصر، جايز تكون انضف برا مصر
الإلنترا والكورولا انضف طبعا
وبالتوفيق

**Youssef.Awad** · 15-08-2012 10:35 PM

لا كلام يُقال بعد كلام المهندس سمير ..
وترتيبى هايكون كالاتى:
1. كورولا (عملية - اقتصادية - اعلى سعر اعادة بيع - قطع غيار - انتشار - مساحات متوازنة)
2. كيا سول (كفاية صيانة مجانية سنتين و10 سنوات ضمان !!!!! ارحم مليون مرة من ال60000 كم و3 سنوات بتوع تويوتا) ويعيبها مساحة الشنطة والعفشة الناشفة
3. الالانترا
4. جوك (افضلهم كتصميم وصانع يابانى فى اوج عصوره الذهبية وأداء من وجهة نظرى لكن غير مناسبة لتوصيل اصدقائك فى الشغل يوميا لأن الكنبة اخرها 2 بحجم متوسط فقط هههههههههههه)

الموضوع: تختار ايه؟: كرولا أو النترا أو جوك أو سول 2013

LinkBack

أدوات الموضوع

عرض

-

-

-

-

-

المواضيع المتشابهه

استفسار فى النترا 2013

كرولا 2013 ولا النترا 2013 ...

هيونداى النترا زيرو ولا تويوتا كرولا (2005/2006/2007)

عايز رايكم اجيب النترا اتوماتيك زيرو و لا تويوتا كرولا مستعملة

النترا - صني - كرولا - لانسر

الكلمات الدلالية لهذا الموضوع

المفضلات

المفضلات

ضوابط المشاركة