اظن ان العربية ميكانيكيا نفس ال ار بي و هي اربع نقلات بس
عرض للطباعة
اظن ان العربية ميكانيكيا نفس ال ار بي و هي اربع نقلات بس
بسم الله الرحمن الرحيم
انا الحمد لله جربت العربيه النهارده طول اليوم جوة البلد وسفر كمان طبعا فيه سلبيات وفيه ايجابيات
هبدا بالسلبيات حتى لو حاجه بسيطه او تافهه من وجهه نظر حد بس هكلم من وجهه نظرى
1.الكاسيت صوته جميل ولكن مش عالى ولا يقرب مثلا لطقم كاسيت اى عربيه الماانى
2.ليه شايلين الزرار الى بيخفض ويقوى نور العدادات وازرارا التكييف وشاشه الكاسيت وكده مع انه موجود فى كل العربيات الى بره مصر تقريبا
3.اول متقفل الكونتاك متعرفش ترفع الزجاج ولا تقفل اى حاجه كهربا ولا حتى بعدها بثانيه وهيه اصلا مفيهاش وحده رفع
3.فتحه السقف الوضع لما تكون مرفوعه بتبقى مرفوعه مسافه صغيره اووى وبصراحه شكلها مش زى منا بحب تبقى مرفوعه
4.فى بعض المواقف حسيت ان الفوانيس محتاجه لمبات اقوى من كده بس مش حاسس كده فى كل الطرق مش عارف بصراحه هو انا نظرى ضعيف شويه بس بقول كل الى حسيته بامانه
5.بجد حرام عربيه بالتمن ده ميبقاش فيها سنسور بارك والله
6.مفتاح عادى مش
7.مفيش دواسه تسند عليها رجلك الشمال
ده الى حسيته بكل امانه ولو اى حاجه سلبيه حسيتها هقولها
نيجى للايجابيات الى فى العربيه وبرده اسمحولى اقولها مهما كانت بسيطه من وجهه نظر حد سامحونى
1. تصميم العربيه عاجبنى جداا من جوة وبرة
2.موتور ملوش صوت تقريبا غير وانت واقف بره جمب العربيه وصوته هادى جداا
3.سحب ما شاء الله ممتااااز بمعنى الكلمه
4.الفرامل وده الى كنت خايف منها اوى للعلم هيه فيها abs الفرامل جيده جداا
5.نقلات الفتيس تحسسك بجد ان العربيه خدامتك ما شاء الله راثع ممتاااز
6.ابعاد العربيه برده الحمد لله ممتازة تعليق بسيط انا سوقت الالنترا ابعاد الا rb فى راى احسن بكتييير
7.الباور بقى حكااااااايه ممتاااااااااااز وعلى فكره بيتقل جدااا مع السرعااات
8.انا مشيت اكتر حاجه بيها 150 الحمد لله مش هقول ان العربيه رسخه على الطريق بس والله ثابته نقدر نقول جييد جدااا ومع العلم كوتش 14/175/70 انا والله اخد بيها ملف 130 وكان الاداء بالنسبالى جييد جداا على فكره انا اخر عربيه مسافر بيها قبلها جيتا 2008 وكنت سايقها نفس المشوار انا مكنتش مشغل التكييف بس جربت وقفلت الازاز بلاقى العداد والله 140 فى ثوانى وانت بجد مش حاسس بسرعه نهاائى
9.انوار الصالون جميله اوى وشاشه الكاسيت وطبعا مدخل اليو اس بى جميل ان بتتنقل بين السى دى والفلاشه والراديو وكله راكب مش تشيل وتحط
10.المساحات ممتاازة بتنضف المساحه الازمه لرؤيتك واكتر
11.كنت انا ومراتى وابنى 3 سنين وشويه شنط بسيطه فى الشنطه العربيه علوها حلو جدا الحمد لله انا كنت بقصد معرضش واقفل الكاسيت واركز اوى معاها محكتش غير فى مطب لو بيجو من بتاعه زمان كانت هتحك فيه
12. الشنطه مساحتها معقوووله جدا لعربيه هاتش باك رضيانى اوووى
13. جربت التكييف لمده عشر دقايق وانا ماشى هادى على الطريق ما شاء الله ممتاااااااااز
14. مرايات العربيه جميييلة اوى
15. خامتها من جوة وفرشها جيد جدااااااا للعلم الالوان مختلفه عن السيدان والخامات اشك انها افضل واصحابى اكدولى ده
16. وسع الصالون حلووو جدااا بس ططبعا اقل من الالنترا لجديده بس مش ضيقه خاالص مظبوووطه
17.عملت معايه حوالى 220 كيلو فى اول صفيحه بنزين 92 واليوم كانت الدنيا زحمه جداااا
18. العفشه عجبانننى اوووى ناعمه اوى وجميله وبتديلك ثقه وانت بتاخد اى نقره او مطب بس طبعاا كانت ناشفه جدا لانى روحت ظبط هوا الكاوتش خليته 30 كان 45
الخلاصه انا روحت وطلعت بيتى مبسوط ومزاجى الحمد لله حلو اوى من اداء العربيه وحمدت ربنا على اختيارى
وانا مستنى تعلقياتكم او مناقشتى فى اى حاجه او اى استفسار وكل سنه وانتم طيبين
مفيش تعليقات خالص ليه يا جماعه ؟؟؟؟؟؟؟؟؟؟
ايوه المشكله انها جنط 14. دا اسمه هزار واستهبال واستعباط. دي عربيه شبابي. ازاي جنطها يكون 14؟؟!!!
الف مبرووووك يا باشا ربنا يباركلك فيها ويحفظها من العين.
هي ماشاء الله شكلها جميل عن السيدان كمان. والفاميه محلي شكلها.
بالنسبه لأداء العربيبه لو الجنط ال14 مريحك بلاش تغيره مع ان الجنوط لو كانت 15 او 16 زي ما بتنزل بره كانت هتبقى اشيك بكتير.
الف شكر يا جماعه والله يبارك فيكم هو اداء الجنط حلو اوى الحمد لله بس كل مابصله على العربيه بحسه بجد صغير اوى وربنا يعنى بقى بعديييييييييييين ان شاء الله لما اسد الى باقى عليه من تمنها اجيبلها الجنط ال 16 الى بينزل فيها بره يعليها ومع الكاوتش العريض اكيد هيبقى احسن كمان وكمان الشكل وانا الحمد لله شايفها فعلا مش ناقصها غيره وتبقى منافس قوى جداا لاى عربيه
مبروك عليك
بس هيا نازله بلفاميه فيها ؟؟
على فكره ممكن الخليجى يكون بينزل بجنط 16 سواء سيدان او هاتش
الف الف مبروك يا باشا
وربنا يحفظهالك يارب
ومستنين الصور