سلبيات الشارع المصري تسبب الضغط و الشلل

**Samir Elshahawy** · 14-08-2012 06:37 PM

الاخوة و الاخوات الكرام / اعضاء نايل موتورز

كل عام و حضراتكم بخير ....

طبعا عنوان الموضوع واضح ... و هو تصرفات بعض قائدي السيارات و المارة بالشارع المصري التي تسبب لمن يلتزم حالة ذهول و قد تصيبه بأرتفاع الضغط أو نوبة قلبية أو أزمة سكر أو شلل

فعلا هذا ماكاد أن يحدث لي بالامس و اليوم خلال قيادتي فقط داخل مدينة الرحاب من خلال عدة مواقف تعرضت لها و للأسف الناس أصبح لديها تبلد و برووووووود شديدين

(1).. الموقف الاول :
اثناء مروري بأحد ميادين الرحاب المزدحمة و تحديدا الميدان الواقع أمام منطقة البنوك و أذا بسيارة ميني باص متوقفة صف ثاني داخل الصينية علي اليمين مما سبب زحام شديد جدا و أرتباك لكافة الاتجاهات و عندما مررت من يساره سالت قائد السيارة الجالس داخلها يشاهد كل هذا الارتباك و كأنه يشاهد التليفزيون و لا علاقة له بما يحدث
- أنا : هو ده مكان ينفع تقف فيه ؟
- الأفندي : لأ ده مكان للنوم !!!

طبعا غلطان و بجح كمان

(2).. الموقف الثاني :
ايضا حدث بأحد الميادين و أثناء دوراني بالميدان للعودة الي الاتجاه الأخر من الطريق فوجئت بسيارة تقودها سيدة تدخل الصينية من الاتجاه العكسي لمجرد أختصار المسافة و كي لا تدور مع الصينية
طبعا توقفت امامها و أشرت اليها أن هذا تصرف خاطئ فأبتسمت و أشارت أنها تعرف و انها تعتذر

طيب استفدت أنا أيه من ابتسامتها و أعتذارها ؟؟

(3).. الموقف الثالث :
سائق تاكسي ابيض (وواضح أن هذه ليست فقط صفة اللون للتاكسي و لكنها صفة لطبيعة الدم الذي يسري بداخل هذا السائق) اثناء خروج السيارات من السوق الذي هو أتجاه واحد اذا بهذا السائق يدخل خطأ من الاتجاه العكسي و عندما اشرت له بالكلاكسات و الانوار و أخيرا بيدي أن هذا أتجاه عكسي تجاهلني و كأنه لايراني
بصراحة فكرت أعترضه و اتوقف امامه كي يستدير و يدخل من المدخل الصحيح كما أفعل عادة لكن الطريق كان مزدحم و الجو حار جدا و الدنيا صيام و أحتمالات حدوث أزمة وارد جدا

بس هاقول أيه .... حسبي الله و نعم الوكيل

(4).. الموقف الرابع :
سيارتين متوقفتين في اخر الشارع الرئيسي واحدة يمين وواحدة شمال و علي مدخل ميدان أخر

كان نفسي انزل و أجيب مسمار كبير و أخد العربيتين خط و أكتب لهم علي كل عربية بالمسمار :
" هذا نتيجة الركنة الخاطئة"

بصراحة ساعتها تمنيت لو أن سيارتي مثل تلك السيارة :

ياتري أنتوا أيه رأيكوا في اللي بيحصل ده ؟
و كيف يتم التعامل مع تلك الشخصيات الفوضوية ؟

**Amr Axel** · 14-08-2012 07:08 PM

يا باشا ده كل اللي بتقوله ديه بقت تعتبر حاجة عادية دلوقتي
ده بيحصل العن من كده و ديه عينة من اللي حصل معايا امبارح يعني ماشي في حارتي و هو للي جاي من حارته و خبط فيا من الجنب و يبصلي بقرف و بيبجح كمان ده غير باقي السلبيات

المشاركة الأصلية كتبت بواسطة axel

دول عالم ولاد ستين في سبعين العيب ع اللي سايبهم طايحين في الناس كل يوم قرف منهم
و انهاردة لسه متخانق مع سواق ميكروباص برده في الحي العاشر و الناس في الشارع واقفين عشان يحموه لولا ان معايا الأسرة كنت روحت فيه في داهية غلطان و خبط العربية و رايح يتحامي هناك عشان بتوع اسيوط و سوهاج بلدياته
و مش لاقي حتي عسكري هناك في موقف الحي العاشر ده بقي و لا ميدان المطرية ع الاقل ميدان المطرية فيه شرطة و ساعات بينظموها انما العاشر مفيهوش عسكري حتي واقف و كلها خلطبيطة

بقت حاجة تقرف سايس في كل مكان ناقص الاقي واحد عند البيت لأ و يقولك كمان هو عايز كام و لا اللي واقفين في روكسي يقولك 3 جنيه التذاكر و 2 ج ليا ههههههههه

نخلص منه نلاقي ركنات الناس محتلاها عشان المحلات اللي يحط حجر و اللي يحط حديد و يقولك متركنش هنا و تخلص ع تطليع مطاوي نخلص منهم

يطلعلنا سواقين ولاد ستين في سبعين و يا ريت ميكروباصات و نقل بس ده التكاتك ماشية في الشوارع و ع الدائري و واخدين الحارة الشمال كمان

و في الأخر يتقالك أصل انت اللي غلطان كبر دماغك عندهم حق غلطان ان الواحد بيسوق عربية و غلطان ان الواحد بينزل الشارع و غلطان اني عايش اساسا

و ع راي eng f3lix مبقاش ينفع غير التعامل بنفسك لحد ما الدنيا تتظبط مهو مش هتسكت و واحد جي بيضربك ده دفاع عن النفس

لأ و تلاقي الناس تقولك انت غلطان انك بتتخانق مع الاشكال دي يعني واحد جي يمسك فيا و هسكتله حاجة مقرفة

**SHNORY** · 14-08-2012 08:08 PM

ماهي لو فيها حكومه كان الواحدوقفلهم بالعرض وولع في عربياتهم
او دخل فيهم وش بوش وحملهم تصليح عربيته واتسجنوا كمان
بس اي موقف الواحد حياخده
مش حيجيبله غير التهزيق وقله القيمه ومش حتاخد حقك

**HOSSAM99** · 14-08-2012 08:35 PM

يا فاندم اللي عند حضرتك في الرحاب ده مداعبات لذيذه
إنما الصدمه فعلا في منطقه زي الهرم _فمثلا زي ما قال الأستاذ حماده المصري شارع عز الدين عمر ناصيته تحولت لموقف توك توك و ميكروباص و بارك لأحد البنوك و مش فاضل في شارع الهرم غير 3/4 حاره الناس تحاول تعدي منها
و ده مش الشارع ده بس ده كل محطات شارع الهرم بداية من مشعل مرورا بالمريوطيه و العريش و الكايرو موول و الطالبيه و نصر الدين
و لما أي خريطه في الدنيا تقول إن من أول شارع الهرم لغاية جامعة القاهره ياخد ربع ساعه و تيجي تنزل تلاقي نفسك داخل في ساعه و نص أو أكثر في نفس الطريق
ده مثال صغير
أهم سلوكيات الشارع ده بقي
الميكروباص لازم يركن في نص الشارع
الميني باصات بتزنق علي بعض و بتركن في نص الشارع
لو شاورت لتاكسي هايقفلك برضه في نص الشارع
الناس بتقف تنتظر المواصلات في نص الشارع
العربيات الملاكي لا تلتزم بالحارات و بتقف تركن علي جانبي الطريق
اليو ترن بقي يستخدم للدوران العكس عادي
اليوترن بقي اللي يلف منه يقطع الطريق للعبور للشارع المقابل
باعة الإشارات كل 10 متر

لكن في حاجه جميله بدأت ألاحظها (في خط أصفر أتمد بطول الشارع واخد الحاره اليمني تقريبا بيخص خطه مروريه ما و هايخصص لإنتظار و توقف وسائل النقل ) بدأ بعض السواقين اللي يا رب يكونو علي خير بالوقوف فيه و إستعماله دون الطلب منهم و بدون أي إشارات
يا رب أصلح من أحوالنا و أهدنا

**john55** · 14-08-2012 08:37 PM

اكيد الواحد متقبله مواقف كتير زي حضرتك بس المشكله هتتعامل مع الناس دي ازاي من قله ادب الي جليطه في الاسلوب كاني الناس دي معنداش ريحه الدم

**SHNORY** · 14-08-2012 09:07 PM

المشاركة الأصلية كتبت بواسطة john55

اكيد الواحد متقبله مواقف كتير زي حضرتك بس المشكله هتتعامل مع الناس دي ازاي من قله ادب الي جليطه في الاسلوب كاني الناس دي معنداش ريحه الدم

حل سواقين الميكروباص دول ان لما واحد فيهم يفتري
يتضرب طلقه في دماغه ويتساب يعفن في عربيته مكان ما غلط
علشان يبقي عبره للسواقين التانيين
دا مره واحد فيهم علي البحر بيخبطلي علي سقف عربيتي وبيتكلم عن قله زوقي علشان مخليتهوش يدخل قدامي في الزحمه واني معنديش دم
فتحت الازاز الي جنبي زعقتله وقفلته تاني وسيبته يبرطم

**mshmshm3** · 14-08-2012 09:37 PM

العيب علي سكان الرحاب ياباشا مش بيدفعوا صيانة كل سنة علشان المطبات العكس و علشان الامن و التنظيم و النظافة المفروض يبقي في واقفة و انا لو مكانك كنت وقفت الشارع و قولت مش ماشي غير لما الميني باص يمشي الناس كانو هايشيلو يرموه في اي مقلب زبالة و الدنيا تمشي بالنسبة لسواق التاكس كنت وقفت قدامه و خليته يرجع او قفلت العربية و حاول تجمع اكبر عدد من الناس و تروحو جهاز المدينة و تحطو حل للمشاكل دي مش معقولة الفلوس اللي بتدفع كل سنة علشان تبقي مدينة نضيفة و منظمة شوية شوية هتلاقي تكاتك والامن هناك مالهمش اي قيمة لما يبقي ميني باص راكن في صينية و تاكس داخل عكس ( التاكس ايه اللي دخله المدينة اصلا - عنده فيلا مثلا ولا داخل يزور صاحبه مثلا ) مش فالحين غير في كارنيه البوابة و البار كود للعربية اللي مش شغال

-

الموضوع: سلبيات الشارع المصري تسبب الضغط و الشلل

LinkBack

أدوات الموضوع

عرض

سلبيات الشارع المصري تسبب الضغط و الشلل - انشر الموضوع فى :

-

-

-

-

المواضيع المتشابهه

طرائف في الشارع المصري

في الشارع المصري

غرائب الشارع المصري

غرائب الشارع المصري 2

الكلمات الدلالية لهذا الموضوع

المفضلات

المفضلات

ضوابط المشاركة