الموضوع: الـحـل للـمـيـكـروبـاصـات و الـتـاكـسـيات و الـتـكـاتـك

المشاركة الأصلية كتبت بواسطة aly_moh

لو زودت الوعى بين الناس هتتحل كل مشاكلك
المشكلة مش فى السواقين التوكتوك و الميكروباص
لا المشكلة كمان فيا و فى حضرتك و حضرتة كلنا بنعمل مصايب سودة اللى بيمشى عكس و اللى بيكسر الاشارة و اللى بيرمى على اللى جنبة و احنا يدوبك بنركب العربية ساعة فى اليوم مابالك اللى بيسوق 15 ساعة هيعمل اية لازم اخلاقة بتكون كدا و الموضوع دا عايز وعى و رقابة
يعنى لازم تفهم الناس ان السير عكس جريمة و اللى يخبط حد و هوا ماشى عكس ممكن يتسجن فترة طويلة صدقنى هيفكر , ثانى حاجة الرقابة و انك تراقب القانون و النظام اللى الحكومة حطاة بس للاسف الظباط و الامناء و العساكر اللى بياخدوا مرتبات مش عجابهم و مش بيشتغلوا و حسبى الله ونعم الوكيل فيهم مبيعملوش حاجة و مانتخين على الاخر

معلش يا باشا يعني هم الناس الوحيدة اللي بتشتغل ده بقي شئ في طبعهم
و الحمد الله مبعملش مصايب سودا و انا ماشي حتي الحزام حاطه و لو كسرت ع حد بدون ما اقصد بعتذرله لكن هم اغبية لدرجة انه يخبط و يبجح فيك كمان
الموضوع محتاج اكتر من مجرد وعي رقابة شديدة ع مدار الساعة تطبيق فعلا للقانون احنا عندنا قوانين صارمة لكن تعالي في التطبيق لما انزل الشارع الاقي عالطول واحد اتمسك معلش و مش معلش و يكرمش له حاجة حلوة و يمشي و انا اقف مذهول و اظن حاجات من ديه اتصورت كتيير عشان محدش يقول مبيحصلش
ده غير لما تتخانق و تلاقي بوكس او دورية واقفين و شايفين اللي بيحصل و ملوش دعوة

قبل الثورة بفترة عند رابعة م.نصر اتخانقت مع واد من بتوع المنشية و اكيد عارف بتوع المنشية اللي قدام ترب الغفير عاملين ازاي و مسك فيا و نزلنا ضرب و نطح في بعض من الاخر كل واحد بهدل التاني و الناس حاشتنا من بعض و مسكوه و منخيري كانت جايبة نافورة دم طبعا تكلم النجدة مفيش
و كنت جنب الاشارة بتاعت رابعة قولت فيه ظباط هناك كان فيه رتبة واقف في الاشارة تقريبا عقيد بقوله اللي حصل يقولي اعمل ايه انا مرور !!!
قولتله طب ع الاقل بلغ النجدة بالجهاز يجوا يقولي انا مرور مليش دعوة بصيت له و سكت و مشيت هقوله ايه ؟؟؟!!! طبعا الواد جري
قولت اطلع ع قسم اول مدينة نصر ناهيك عن المحضر اللي اتكروت
لازم تقرير طبي و القسم مرضاش حتي يطلع عربية تجيب الواد و قولتلهم ع مكانه و اسمه كمان الواد معروف في المنطقة من اللي شغالين و الشحاتيين
مفيش غير ظابط تقريبا ملازم او ملازم اول كان فعلا عايز يطلع معايا بعربية و يجيب الواد لكن واحد رتبة اكبر منه كلمه كلمتين و مطلعوش
اتقالي تقرير و محضر طلعت ع مستشفي و جيبت تقرير بالاصابات و الكدمات اللي فيها و اتعمل المحضر و جبت اسم الواد كمان من المنطقة و منطقته و الناس اللي هناك عارفينه و مستعديين يشهدوا عليه لأن واضح انهم قرفانين منه
و لا حياة لمن تنادي و صباح الفل ع كده و غيره من المواقف اللي تلاقي محدش يعمل حاجة
خلاص هي بقت بلطجة دلوقتي عشان كله عارف ان محدش هيتحرك