الموضوع: نفسيتي في الارض !!

كل سنه وانتو طيبين

انا كنت عامل هنا كذا توبيك سألت كتير علي حاجات والحمد لله الناس هنا اسعفتني وكله تمام
المهم انا عامل التوبيك ده تنفيس وبطلع اللي جوايا من الاخر لأن نفسيتي في الارض ومضايق جدا ف قلت اهو ارغي معاكو يمكن افك شويه

عربيتي كانت مسروقه ورجعت من 5 شهور وكنت عملت توبيك هنا بالتفاصيل الصغيره ورجعت ازاي وايه اللي حصل وكده .. طبعا انا و والدي طلع عينا عشان نجيبها من القسم اللي كانت فيه .. كانت في اسكندريه ورحنا 3 مرات عشان نطلعها من هناك

المهم جبناها و كانت مخبوطه وحالتها منيله بستنين نيله واي حاجه تتشال من العربيه كانت مسروقه ... كان قدامنا 3 اختيارات للتصليح : اوديها ورشه في اكتوبر كانت حاجه عاليه اوي وفيها كله مش هتطلع من الورشه وهتعملي شغل زي التوكيل بس كانت حراقه جدا - - وكان قدامي اوديها الحرفيين عند كريم منير بس انا استبعدت الحل ده خالص بعيد ومش فاهم الليله ومكنتش هروح خالص -- واخر حل حد شار علينا نصلحها في الهرم " الطالبيه" قالي هيبقي كل الصنايعيه جمب بعض وانا اللي هتابعها ومش هتحتاج تيجي ومش هتكلفك ومش هتاخد وقت ومش عارف ايه .. المهم قلتله تمام مدام هستريح ومش هتكلف ومش هتاخد وقت يبقي اوكي - للعلم انا ماليش اي خبره في تصليح العربيات و واول مره في حياتي اصلح عربيه - المهم ولا اي حاجه من اللي قال عليها حصلت .. بقيت انزل يوميا اروح هنا وهناك واشتري الحاجات بنفسي عشان ميدحكش عليا و كذا مشوار للحرفين و وكاله البلح وتجار الجديد وكذا لفه واجيب حاجات تطلع غلط وارجعها تاني ده غير ان مش كله جمب بعض الميكانيكي بعيد عن السمكري بعيد عن الكهربائي بعيد عن السروجي كله بعيد عن بعضه وكنت بسوق العربيه وحالتها نيله كده اروح ليهم والل يعمل حاجه غلط وارجعهاله تاني واللي الشغل ميعجبنيش اوديها عند سمكري تاني وكهربائي وميكانيكي تاني ومكلفاني لحد دلوقتي 27 الف " مغير كل حاجه تقريبا " واخدت بتاع اربع شهور تتصلح

المهم من 3 ايام جبتها اكتوبر قلت كفايه كده وابقي اكمل هنا عندنا بدل المشوار بتاع كل يوم ده من غير عربيه ... جيت هنا الغفير بتاعنا ناصح في العربيات اول ما شافها قال ايه ده ومين اللي مقفل العربيه ومش عارف ايه اللي هو كان باين ان الدنيا بايظه الاكصدامين مش مظبوطين الفوانيس مكانها مش مظبوط الكارتيرات مش مظبوطه المرايات راكبه غلط في فروق بين الابواب وفي و في وفي ... كل ده غير بقي شغل الميكانيكا و الكهربا والتكييف اللي لسه هيتعملو تاني اللي هو كأني معملتش اي حاجه !! روحت ل بتاع التكييفات عشان كان في مشكله ركب ومشي بيها قالي العربيه بايظه خالص و بتاع العفشه نفس الكلام !!

انا مش عامل التوبيك عشان ادوشكو معايا واسألكو واطلب منكو حاجات .. اهو برغي وبطلع اللي جوايا عشان العمليه في الضياع خالص

قدر الله وما شاء فعل