الموضوع: الحمد لله صلحت عربيتي الميجان (النشر للفائدة ونقل الخبرات)

السلام عليكم ورحمة الله وبركاته

الحمد لله رب العالمين أنا صلحت عربيتي الميجان ، وكنت وعدت هنا في المنتدي انا احكي وصلت لايه عشان الاستفادة تعم وتبادل الخبرات بيننا ، اولاً اشكر ادارة منتدي نايل موتورز ، وخصوصا منتدي رينو ، بجد انا استفدت كتير جداً من المواضيع المنشورة هنا ، وهي اللي شجعتني اشتري الميجان وماخفش منها بسبب الاشاعات الكتير اللي حواليها ، واخص بالشكر الاستاذ Ahmed A.Maksoud

القصة ببساطة اني اشتريت رينو ميجان 2007 (مواصفات خليجي) الفئة الثانية (بدون فتحة سقف و مثبت سرعة) - عداد الكيلوميتر 69000 ، فابريكية بالكامل ، قبل ما اشتريها كشفت عليها في الميكانيكون العرب و لاقيت فيها حبة مشاكل في العفشة ، لكن العربية حالتها كانت كويسه عموما وصاحبها كان مهتم بيها ، علي العموم انا استخرت ربنا واشترتها ، و المشاكل اللي لاقتها واسعارها مشتمله المصنعية كانت كالتالي:

1- علبة دريسكسيون ( ممكن امشي بيها كمان 20 ألف كيلو متر وسعرها بالمصناعية 3650 جنية)
2- بطاحة مساعد شمال (مقطوعة تماماً وسعرها 1150 بالمصنعية)
3-قاعدة فتيس (سعرها 315 جنية)
4-مساعد امامي شمال بعد الفك(770 جنية)
5- ترشيح زيت في البداية من المساعدين الخلفيين (لم يسعر عشان لسه في البداية)
6-كوتشة كوبلين خارجي يمين(510 جنية بالمصنعية)
7-كوبلين يمين بعد الفك (لو الوكتشة لم تصلح في ايقاف التلييك - سعر الكوبلن بالمصنعية 2950)
8- عدد 2 جنط خلفي يجب استعدالها (لم يسعر)
9- بلية عجل امامي شمال (750 جنية بالمصنيعة)

علي العموم وبعد النصايح اللي استفدت منها في المنتدي ، روحت لصقر قريش عند عادل رينو ، كشفوا علي العربية ولاقوا ان فيها مشكلتين فقط من المشكلات اللي فوق وهي الكوبلن الكوتشة بتاعته كانت مقطوعة وبيطقطق في الملفات ، و علبة الدركسيون كان محتاجه حشو وتغيير الدعمات اللي ماسكة العجل

المهم حشو علبة الدركسيون اتكلف 100 عند الخراطة للحشو + 250 الدعامات والمصنعية = كله 350 جنية .....

بالنسبة للكوبلن رحت عند واحد جمب عادل متخصص في الكبالن ، غيري راس الكوبلن بالكامل استيراد كلف كله بالمصناعية 300 جنية ...........

يعني الليلة كلفت كلها 650 جنية في الاخر ................

المهم رحت للتوكيل في اليوم اللي بعده عشان صيانة ال 70 الف ، وطلبت منهم يكشفوا علي العفشة بالكامل ، والحمد لله قالولي مفيش مشاكل تاني ، واما شافوا تقرير الميكانيكيون العرب استغربوا جداً ، لان في حاجات مش محتاجه تتغير اصلاً زي بلية العجل وقاعدة الفتيش ، والبطاحة حالتها كويسه فيها شرخ بسيط ، لكن مش مقطوعة زي ما قالولي الميكانيكون العرب

وانا راجع من التوكيل عديت علي الميكانيكون العرب وقعدت مع المهندس المسئول هناك ، لاقيته بيدافع باستماته عن التقرير ومش عايز يسمع اصلاً ......... فمشيت وكنت مضايق بس اما اقعدت افكر لاقيت انهم كان لازم يعملوا كدا ، لان دافع فلوس عشان يطلعوا القطط الفطسانة في العربية ، فلازم يكتبوا كل حاجه شاكين فيها والقرار ليه في الاخر ...............

علي العموم حمد ربنا ، والحمد لله العربية حالتها كويسه دلوقتي .............

وكمان ركبت النهاردة وصلت AUX عندي كلاريون اللي في ميدان الحجاز ب 135 جنية (وهي وصلة أديو لل mp3 او IPOD عشان الكاسيت الاصلي بتاع الميجان سي دي هات فقط) والحمد لله الصوت كويس ، كنت اشتريت موديلر في الفترة اللي فاتت وصوته كان وحش جدا جدا


لو حد حابب يسأل علي حاجه ، ياريت مايترددش وهحاول اجاوب في حدود معرفتي البسيطة مع رينو ميجان

شكراً ليكم جميعاً

المشاركة الأصلية كتبت بواسطة medodola2012

طيب هو عادل رينو دة فين بالظبط وهل دة بتاع قطع غيار وكشف وكدة

هو انا توهت شويه لغاية اما وصلتله ، لكن لو سألت عليه في صقر قريش هو مشهور جداً واعتقدت انه الافضل هناك وكمان بيكشف بالكمبيوتر

لو انت جاي من نزلة الدائري او الاتوستراد وصقر قريش علي يمينك ، خش في الحارة البطيئة لغاية اما توصل لقبل الكوبر بتاعة المشاة بتاع صقر قريش اللي بيكون عنده المبيكروباصات ، قبلية بفتحتين خش يمين هتلاقي عادل علطول علي الشارع من بره

هو ماشاء الله زحمة جدا جدا ، عندك خيارين لاما بتسيبله العربية وبتكتبلة المشاكل وهو بيتصل بيك بعد الكشف ويقولك الدنيا ماشية ازاي ، لاما ترحله يوم جمعه تقعد عنده وتستني دورك وترخم ، ودا اللي انا عملته

وهو كمان فاتح قطع غيار ، والاسعار عنده كانت ممتازة

يعني علبة الدركسيون كانت اصلية ب 1200
كوبلن تقريباً كان ب 900 جنية
بلية كانت ب 150 جنية ، يني تقريباً نص او تلت اسعار التوكيل ، وقطع اصلية

وتقدر كمان تسأل عن قطع الغيار في اماكن تانية في صقر قريش وتجيب الارخص ، ودي ميزة المنطقة ان في محلات كتير لقطع غيار رينو .........

ودي نمرة والمسئول مع عادل هناك اسمه كريم 01111480212

بالتوفيق