الموضوع: افتح التكييف .. طب راح فين السحب m11 .. للعلم لسه بلين

السلام عليكم

معلش يا جماعه تغيب لفتره نتيجه للعيد و سفر والدي و عمليه ل والدتي و بقدم ورق الجيش يعني من كلو بس خير ان شاء الله

انا قريت اللينك بتاع ال Break-In و الراجل لخص الموضوع ف كلمتين Run It Hard
بس Hard بتاعتي تختلف عن غيري .. في واحد يبقولك تسارع مع حرق و في واحد يقول حرق بس تسارع عادي مش استعجال و في واحد زي حالاتي فضل ان ما يبقاش في تسارع عالي ولا حرق و السرعه لحد 110 "كنت مسافر علي طريق السخنه و هموت و اجري بس ما رضيتش . شئ داخلي قالي استني الالف احسن" ... علي العموم انا اخدت قرار الا و هوا
بلاش اعدي ال ار بي ام عن 3 دلوقتي لحد صيانه الالف عشان الزيت و تربيط العفشه و اللذي منو و هانت كل الحكايه 200 كيلو مش حوار يعني
و كل حبه هبقي ازود الار بي ام حبه .. يعني دلوقتي 3 بعد الالف 3 و نص او 4 ... الف و نص الفين كدا نخليها 4 و نص و هكذا ..... و مافيش مانع من اني كل كام حبه ابقي اقرص عليها عالاخر حبه عشان تصحصح معايا مع العلم انها مصحصه خالص الصراحه و سحب حلو ما شاء الله بس الاول و التاني دول فعلا لا يطاقو

و الاستاذ كان بيقول العربيه مافيهاش حسنه واحده .. ههههههه دي ماشاء الله فيها حسنات ف كل حته فيها .... نقول كاوتش عريض .. وزن للثبات علي المنحنيات "كوبري المطار واخدو علي 80 قولت اشوف هايحصل ايه لقيتها ما شاء الله ثابته حلو و المره الجايه هبقي اسرع سنه كمان بس بحذر طبعا " ...... اضائه ليليه واضحه جدا النور فعلا متوجه صح ....... الفرامل تمام التمام مع العلم ان بيبقي في اصوات غريبه لما ال ABS بيشتغل مع الدوسه الجامده .... واسعه من ورا "من رايي .. قاعدين 4 ورا 3 مرجعين ضهرهم و الرابع ما كانش عايز يرجع ضهرو بس كان له مكان .............. اقول ايه تاني سحب عالسرعات ما شاء الله كويس جدا و بتحسسني فعلا انها 117 حصان مش اي كلام صيني و خلاص .... استهلاك البنزين ف السفر بالتكييف ف كلمه واحده "ممتاز" 8 الي 8 ونص لتر كل 100 ....... يعيبها الاستهلاك داخل المدينه عالي شويه من رايي بيوصل ل 14 لتر ف كل 100 علي كلام الكومبيوتر و بيزيد عن كدا كمان ..... ظهر العربيه عالي و بيضايق ساعه الركنه بس هيا دي العيوب من رايي

استاذ aftr
انا ما بعرفش ارد عالخاص اعذرني لجهلي معلش ف حضرتك ممكن تسالني هنا .. و لو المشكله ف ارقام تليفون ف حد يبقي يقولي ابعت ازاي رساله و اعرف انها وصلت

و ياريت نجمع ارائنا عن العربيه حلو او وحش و نخليهم موضوع عشان اللي بيسال عن العربيه يلاقي كلامنا كله متجمع

و كل سنه و انتم طيبين

هانت ان شاء الله و هروح للتوكيل بس عايز اعرف ينفع اروح للتوكيل قبل الالف عادي لاني احتمال ادخل الجيش قبل ال200 كيلو دول و محدش ف البيت هايعرف يوديها
و بحجز قبل ما بروح ولا لا و بتصل بمين عشان احجز و اللي يعرف مكان التوكيل اللي ف العبور يا ريت يقولي بالتفصيل فين و شكرا جزيلا

المشاركة الأصلية كتبت بواسطة ashrafmahmoud93

اخبتر تزييق العفشة من ورا ايه انا الموضوع عندى زاد اوى مع كل مطب او حفرة صفيرة بسمع تزييق ورا وبصراحة الناس اللى راكبة معايا بياخدوا بالهم من الصوت بيسالونى العربية عاملة 3 الاف هقولهم ف صيانة ال 5 ان شاء الله بس مبدأيا انا عارف انها ملهاش حل بس مكنتش ظاهرة اوى كدا لحد الالفين بدأت تظهر جامد من اول ال 3 الاف ربنا يستر

مافيش اي صوت بتاتا لا من ورا ولا من قدام و الحمد لله .. و لحد دلوقتي 820 كيلو و مافيش ولا عيب غير التسقيف و دا عامل كبير فيه البنزين لاني لما بحط من بنزينه مترمه بتخف جامد .....و موضوع السحب مع التكييف مع الغيار الاول لان مافيش قبلو غيار اقرص عليه .................. و بعض غيوب التقفيل البسيطه زي حكه الدركسيون ف الحته اللي وراه لما بلفه و فرق بسيط جدا ف التبلوه مش باين الا مع التدقيق .. فرق ف الكبوت و دا اللي مضايقني جدا و لازم يشوفولي حل ليه ف التوكيل لاني مش مطمن حاسس ان الكبوت مش قافل كويس
بس دي العيوب و اعتقد كلها عيوب بسيطه جدا جدا و هبله يعني و المشاكل اللي قبل كدا زي الدينامو و العفشه محلوله ف 2012 و دا علي لسان ناس كتير منهم انا اهوه و ربنا يهدي ابو الفتوح و يعدل العربيات شويه