العربية إتخبطت وهي واقفة تحت البيت

**khattab_89** · 28-06-2008 06:09 AM

بسم الله الرحمن الرحيم .. و الحمد لله إنها جت على قد كده و قدر الله و ما شاء فعل ..
النهارده بعد صلاة الجمعة قاعد مع والدي بنتناقش في أمورنا و منها إننا نغير العربية و نبيع الريجاتا ,, و هوب صوت فظيييييييييييييييع و طراااااااااااخ و أنا طلعت البلكونة أشوف فيه إيه .... و هنا حلت الساعقة عندما و جدت عربيتي الريجاتا إنتقلت من وسط الشارع إلى اخره و داخله بوشها في محل و متشلفطة ووراها عربيه تريوس ... و الناس بتنادي عليا

نزلت أنا و الوالد و طبعا منظر لا يوصف و شعور ربنا مايكتبو على حد منكو
و الولد اللي كان سايق التريوس مش عاجبة إن أنا بكلمه مع إني كنت محترم جدا
المهم والدي قالي ملكش دعوة و أنا هتصرف ... عرفنا إن العربية دي مش بتاعتة و هو مندوب مبيعات و معاق بدنيا .... بعد مناقشات و صاحب العربية جة عرفنا إن دي حاجة عادي بالنسبة لهم و بخبطو في ناس كتير و إحنا مش أول ضحية و أبويا إتفق معاهم إن التكاليف تتقسم بالنص ... و أنا كان رأيي إنو يتحملها كلها و نعمل محضر كمان
بس والدي طيب قوي و قالي الحمد لله و جت في الصاج و كلام من ده و كل واحد راااح لحاله و أنا كنت زعلان قوي على عربيتي بس والدي هون عليا و الحمد لله
بس حسبي الله و نعم الوكيل فيه و أنا مش مسامحه و مش هسامحه
بس خلاص مش عارف أقول إيه تاني

**polo61** · 28-06-2008 06:27 AM

والله انا مش عارفة ااقول ايه ؟
حسبى الله ونعم الوكيل فى الناس اللى انعدم من عندها الاحساس
اخى ربنا يبارك لك وماتزعلش قدر الله وماشاء فعل

**mohamed_88sk** · 28-06-2008 06:34 AM

لا حول ولا قوة إلا بالله .. شكلها يحزن فعلا
الله يعوض عليك والحمد لله على قد كده ..
بس هو خبطها منين بالظبط لاحسن السيارة متخرشمه من الجوانب كله الله يسامحه ..
المهم ماتحطش ببالك قدر الله وما شاء فعل أكيد ربنا فداك من حاجه الحمد لله على كده.
أحمد وأسترجع ...

**khattab_89** · 28-06-2008 06:41 AM

والله يا شباب العربية كانت مركونة في حالها و هو جاي من أخر الشارع بيجري (على أقوال الناس اللي شافوه مش أقل من 50 السرعة) و دخل في عربيتي من الشنطة فا العربية طارت من مكانها و زحفت كام متر كده و طلعت فوق الرصيف و دخلت بوشها في محل و من شده الرزعة باب المحل إتخلع و الحيطة إتكسرت منها حتت ...
أنا لو كنت صورت منظر العربية و هيا نصها فوق الرصيف وداخله في الحيطة كنتو قولتو الصور دي إي كلام علشان المنظر كان بشع و والله مش ببالغ و أنتو أكيد تخيلتو المنظر لما أبص من بيتي ألاقي الوضع ده

**mohamed_88sk** · 28-06-2008 06:46 AM

أيوا فعلا موقف يخض ... لا حول ولا قوة إلا بالله ...
ربنا يسامحه بجد ...
والله مش عارف أقول إيه بس أحسن حاجه تقال الحمد لله وربنا يعينك .
-حصل نفس الموقف ما والد صاحبي في 2006 كان بقاله أسبوع جايب كورولا وراكن في أمان الله سمع نفس الصوت عالفجر كده بيبص لاقاها في البايباي واللي خبط جرى .

**tutankhamoun** · 28-06-2008 07:14 AM

أولا الحمد لله إن مكنش فيه حد في العربية أثناء الإصطدام
و الحمد لله أنها بسيطة و خبطة في الصاج و إن شاء الله ترجع تاني

بس المصيبة
هي دي مصر
الراجل يخبط خلق الله في الشارع ......... و مش أول مرة و مفيش حد بيجيب الشرطة
و حتى لو الشرطة جت ......... مفيش حاجة هاتحصل
و بناءا عليه

يبقى الحال كما هو

عيال صغيرة ........... معوق يقود سيارة غير مجهزة و بسرعة عالية في منطقة سكنية
و كمان الناس تنزل تتخانق مع الضحايا ( مبدأ خدوهم بالصوت )

و العملية مهلبية في بالوظة في كفتة في بطيخ ............

و أحلى سلام لشعب ج ع ع ................ و لا عزاء للمحترمين

**mrghost** · 28-06-2008 07:35 AM

بصراحه انت غلطان لانك مفروض متسيبوش يمشى الا لما يعملك العربيه كلها من الالف للياء لانه خابطها وهى واقفه يعنى مفيش اى نسبة خطأ منك وبعدين ليه هو يمشى يخبط فى عربيات الناس بس فى النهايه قدر الله وماشاء فعل

**MoToRiZeR** · 28-06-2008 08:20 AM

حرام و الله الناس دي .. الواحد يبقي قاعد في بيته و حاسس انه سايب حد من عيلته في الشارع مش العربية من كتر اللي بيحصل

الموقف ده حصل مرة في عربية لانسر تحت البيت جيت لاقيتها واقفة مكاني .. اضايقت و قلت يااااااااااااه ايه القرف ده لسة هقعد ادور علي ركنة و اركن بعيد .. المهم ركنت في شارع تاني و طلعت البيت مفيش ساعتين سمعت حاجة عملت طاااااااخ .. ببص من البلكونة لقيت لانسر تانية سايقها شاب شكله ضارب حاجة عجنت اللانسر وش في وش و لبستها في كيا سيراتو وراها .

قلت يا خبر كان زماني مكانها دلوقت .. بس مكنش المفروض تمشيه و كان المفروض يصلحها كلها .. دي تحت البيت يعني !

**Ghamrawy** · 28-06-2008 02:54 PM

ربنا يكون فى عونك و صلح العربية عند السمكرى بتاعك مش بتاعه علشان تضمن نظافة الشغل و العربية ترجع زى ما كانت ان شاء الله،،،،،،،،،،،،،،،، حاجة تفلق ربنا يجازيه من جنس فعلته

**sherif_84** · 28-06-2008 04:04 PM

ربنا يكون فى عونك ياباشا معلش مادام جت فى العربية الحمدلله
قدر الله وماشاء فعل
عربيتنا الشاهين اتخبطت وهى واقفة 3 مرات وكلام والدى نفس كلام والدك الحمدلله انها جت فى الصاج
ان شاء الله ترجعلك أحسن من الأول

الموضوع: العربية إتخبطت وهي واقفة تحت البيت

LinkBack

أدوات الموضوع

عرض

-

-

-

-

-

المواضيع المتشابهه

العربية إتخبطت بعد ما طلعت من العمرة وقبل ما أستلمها

قدر الله وماشاء فعل :العربية إتخبطت من تحت

الحمد لله (العربية إتخبطت)

العربية إتخبطت

إنا لله وإنا إيه راجعون العربية إتخبطت

الكلمات الدلالية لهذا الموضوع

المفضلات

المفضلات

ضوابط المشاركة