الموضوع: تقرير صيانة الالف لنيسان صنى الجديدة

ازيكم يا شباب و كل عام و انتم بخير ... تم بحمد الله عمل صيانة الالف للصنى الجديدة اخيرا بمركز مودرن موتورز الهايكستب بصراحة الناس هناك محترمين جدا و لبقين جدا فى التعامل مع العملاء و فيما يلى تقرير بسيط عن العربية و ادائها معايا اول الف و ايه اللى تم فى الصيانة:

مميزات العربية اللى لمستها :

١- وسع الصالون السحرى العربية ما شاء الله واسعة جدا من جوه و حتى لو مرجع الكراسى الاماميه للاخر برضة اللى قاعدين ورا مستريحيين جدا
٢- تكييف العربيه ممتاز و غير مؤثر على السحب تماماً
٣- سحب العربيه ممتاز و تحس ان دواسة البنزين مبرمجه عشان تلحقك فى المواقف المختلفه يعنى لو ماشى فى طريق زحمه حساسيتها تختلف عن لما تحب تجري بيها و الميزه ديه مش موجودة فى الكورى عموما اللى من اقل دوسة تحس ان العربيه نطت منك
٤- الشنطة ما شاء الله واسعه جدا
٥- الثبات ممتاز
٦- عزل الصالون اديه ٨ من ١٠ عزلها ممتاز مقارنة بالسيارات اللى فى فئتها
٧- باور الدريكسيون ناعم جدا و بيفصل على السرعات العاليه

عيوبها اللى ممكن تتحل بسهوله

١- الكاوتش الصينى صوت احتكاكه بالارض عالى حبتين و نقشته بتلم الظلط الصغير
٢- اماكن التخزين فى التابلوه صغيره
٣- خامات الصالون المتوسطه

تقرير صيانة الالف و تركيب وحدة رفع و حساس الركن :

رحت الساعة ١٠ صباحا و لقيت ناس كتير ما شاء الله ، مهندس الاستقبال سالنى عن اى حاجة لاحظتها فى العربيه مش طبيعية قلتلو على موضوع صوت الفرامل اللى شبه صوت التريلا لما تقف على بسيط قالى ده صوت احتكاك عادى و بعد التطبيع هيختفى و سألته على فى صوت خروشه كده لما الف الدريكسيون و العربيه بخرجها من الجراج قالى طلمبه زيت الباور لسه موزعتش الزيت و بعد التسخين فعلا الصوت بيختفى خدنا العربيه و طلع جربها و جرب كفاءة الفرامل و اتاكد ان نظام ال ABS مفيهوش مشاكل و كله تمام رجعنا المركز و سلمته العربيه و طلبت ان العربية تتغسل بره و جوه و املى الاطارات بالنيتروچين و قعدت انتظر فى الاستراحه لحد مخلصوها و ندو عليها و رحت استلمتها منهم ..

ملاحظاتى على العربيه بعد الصيانة

١- التكييف اداؤه بقى اقوى من الاول
٢- النيتروجين مؤثر فعلا حاسس ان صوت الكاوتش بقى اخف من الاول و العربيه بقت انعم
٣- سحب العربيه اتحسن عن الاول
٤- الباركينج سنسور ممتاز و ساعدنى فى الركن جدا ووحدة الرفع تعمل بكفاءه
فى نهاية التقرير احب اشكر قسم نيسان نايل موتورز انه ساعدنى فى اتخاذ قرار شراء افضل سيارة فى فئتها السعريه و الاكثر اعتماديه

المشاركة الأصلية كتبت بواسطة Dr_MaTrix

الف الف مبروك على الصيانة...............البركنج سنسور كلفك كام وهوا فى مكان ليه فى العربية ولا بيركبوه ازاى؟

الباركينج سينسورز عبارة عن اربع حساسات شكلهم دائرى شبه زرار القميص كده متركبين فى الاكصدام الخلفى و شاشة ديجيتال متركبه فوق الطبلوه اقصى اليسار فيها المسافه بينك و بين الحاجز و انت بتركن و قبل حوالى ١،٥ متر بيصفر صفاره متقطعه و اول متبقى المسافه حوالى نص متر يصفر صفاره متواصله و يظهر على الشاشة p يتبهك يعنى انك لازم تجيب الفتيس على ال p اماكن الحساسات واحد اقصى اليمين و واحد اقصى اليسار و اتنين فى النصف بحيث المسافات بينهم متساويه و فى الشاشه بيبان انهو سينسور اللى قرب من الحاجز ..