اما ادي لعامل البنزينة بقشيش يا اما يشتمني؟؟؟؟؟؟؟؟؟

**ali_333** · 19-08-2012 06:38 AM

الموضوع بقى بلطجة الواحد المفروض يتكسف وانا بديله بقشيش والطبيعي يقولي انك شايفني شحات؟

على سبيل المثال المفروض الواحد عنده كرامة لكن مش يشحت ويشحت بالقوة كمان

لازم وقفة للموضوع ده لازم شوية تلطيش على بوكسات على شلاليط

**assaf** · 19-08-2012 01:49 PM

انا كنت في جاي من بورسعيد في الطريق قلت امون
بعد البيه ما خلص كان الحساب 37.01 اديته 38 جنيه لقيته بيقولي بقرف و حسابي قلت له انت واخد جنيه قالي لا كسر الجنيه جنيه يعني القرش بجنيه قولت له انا سايب لك جنيه فالي لا كدا انت مسبتش حاجه قولت له خلاص يبقي مش عايز اسيب حاجه ومشيت

**Rsarabia** · 19-08-2012 02:10 PM

هما ملهمش مرتبات اساسا هما عايشين عالتيبس
بعدين حضرتك بتفول العربية مثلا ب 100 جنيه
هتديله 100 جنيه و تمشى هو احساسه هيبقى ايه ؟؟
اديله 102 و هيبقى مبسوط و هيدعيلك
احنا مش زى برة و برة اللى بيفول ممنوع ياخد فلوس و بياخد مرتب محترم فبلاش ناخد الموضوع على انه تحدى او سرعة و اعتبرها حتى صدقة

**AhMeD MeTwAlY** · 19-08-2012 09:52 PM

الناس دي فعلا واللهي العظيم غلابه اوي والبنزين دا شغله متعب وبيجيب امراض بعد كدا خطيره جدا من ضمنها السرطان
تخيل انت طول اليوم بتشم في بنزين وسولار
ربنا يعينهم ويحفظهم

**horas3000** · 19-08-2012 10:41 PM

طبعا الموضوع ده بيتختلف من واحد لاخر
فيه اللي بيدي و ده بيبقي نوع من انواع الصدقة و فيه اللي مبيديش و ده ليس عليه حرج
بس الفكره ان العمال نفسهم يكونوا فاهمين كده و مؤمنين بيه
و مبيبقوش زي ما هو الحال دلوقتي انك لازم تديلهم و ان ده حق من حقوقه الدستورية
انا شخصيا بدي جنية او اتنين حسب الغزاله
بس فيه مواقف لما بتحصل بقفش و مبديش
زي مثلا لما يكون الباقي 5 او 10 جنية و الاقي العامل جايبهوملي coins ساعتها بقوله لا هاتهم صحاح و مش بديله عشان يتعلم
او مثلا لما الاقي 3 هاجمين عليا واحد بيمون و واحد يغسل الازاز و التالت بيطوق العربية بحس ان الموضوع زاد و بقفش عليهم
و اكتر حاجه بتستفزني ان التنك يكون مليان علي الزور و العامل يفضل يزود و يدلدق علي الصاج عشان الحساب يبقي فيه كسر تحت ال 5 جنية علي اساس يجيبلي فكه و اديله ساعتها ببقي عايز اديله في سناسه و اكتر من مره اتخانق و اخليه ينظف اللي عمله و مش بديله برضه

**tarekbadran** · 20-08-2012 02:35 AM

لو ما بيخدوش رواتب يبقا بتوع البنزينات دول ال ولاد ستين كلب والعمال هما الغلابة وحلال فيه البقشيش وربنا ينتقم من اصحاب البنزينات

**sas5** · 22-08-2012 11:02 AM

السلام عليكم ورحمه الله
انا لما باشتغل باخد ومرتبى وانتم ايضا اذا اشتغلتم تقبضون مرتبات واذا حدث ان المرتب لم يعجبنا سوف نترك العمل ونبحث عن اخر
بلاش افكار رجعيه فبعض الناس الظاهر ان مرتباتهم ليس لها نهايه فلن تفرق معهم اذا استمروا فى بعثره الفلوس يمينا وشمالا - انا ممكن ادفع مقابل اى خدمه ولكن اذا كانت الخدمه لها مرتب فلماذا ادفع بقشيش.
عمال محطات البنزين اصبحوا مثل المتسولين فكما تمشى فى اى شارع تجد ان الجزيره الوسطى كل مليئه باناس غريبه رجال وسيدات وعمال نظافه وكل واحد ماسك باكو مناديل او يعطيك تعظيم سلام( وكلهم شباب وقادرين على العمل ولكن لماذا العمل اذا كان فيه ناس هبله مثلنا تصرف عليهم )نحن نساعدهم على ذلك - وكل يوم يروح وفى جيبه على الاقل مئه جنيه هذا على اسو الفروض.
من يريد ان يتصدق فيوجد طرق كثيره وفيه ناس لاتجد ماتاكله وتعف عن السؤال - هؤلاء من يجب توجيه جهودنا لهم
الموضوع تحول الى بلطجه ولابد من ايقاف هذا الموضوع والا سوف يتحول لاسوا من ذلك بعد وقت ليس بطويل.

**mr_vampire** · 22-08-2012 11:22 AM

- فكرتني بالذي مضي والله :::: انا كنت متعود امون بالجنيه يعني اقوله مون مثلا ب 20 جنيه ويطلعو زي مايطلعو ... فمرة من المرات مونت ب 20 جنيه لقيته بيقولي 21 جنيه ( طبعا انا عارف ان الجنيه ده مش طابع بوستة يعني ) فعملتله عبده واديته ورقة بعشرين برده ولا كاني سامعه ... فبيقولي 21 يااستاذ فبشاورله علي الطرمبة ماهي 20 اهـــــــــــــي... قالي لا في جنيه سجايرنا .... فبمنتهي البرود قولتله انتا بتدخن ده مشكلة مين ؟؟؟؟؟؟؟

قام قالي هو ده المتعارف عليه .... فقولتله متعارف عليه عند مين ؟؟؟؟ ومن امتا ؟؟؟؟ وبعدين لو متعارف عليه تبقو تحطو ورقة وتكتبو عليها 1 اتاوة واللي عارف المتعارف عليه ده يدفع .... قالي ياباشا مش اتاوة .... قومت قاطع كلامه وقولتله مادام مش اتاوة يبقي انا اللي احددها مش انتا اللي تطلبها وتحددها عافية....

اعد يقولي ياباشا هو ده اللي بيطلعلنا من البنزينة ومبنخودش مرتب ... فقولتله وده برده مشكلة مين ؟؟؟؟ وبعدين هو انا اللي هدفع مرتبك ولا اللي مشغلك ؟؟؟؟؟؟؟؟

قولتله امسك فوطة وامسح الازاز لحد مالعربية تمون اكرملك ... حتي يبقي حلال انك اشغلت بيه ... انما عافية مش هتاخد غير التهزيئ...وسبته ومشيت...

عايز اقولك اني مبقتش امون غير من البنزينة ده مع انها بعيدة عن بيتي بس اهو كدة بقي وخلاص.... مرة كمان ولقيته جاي بيتاسفلي وبتاع ومن ساعتها وانا بمون الاغيه باللي فيه النصيب....

الخلاصة :::: احنا اللي بنمردهم علينا لما بنسكتلهم بحجة هوجع دماغي عشان شوية فكة هعتبرها صدقة وخلاص ... حلو الكلام ده بس لما شوية شوية تلاقيها بقت فرض واجب عليك هتعرف انك السبب ...

- زي ماتحب تساعد مراتك في يوم وتغسل المواعين عشان شايفها تعبانة طول اليوم ( مع انها حاجة مش مشينة اوي يعني ) فتلاقيها في مرة بتقولك حبيبي فيه طبقين جوا فالحوض وحياتي وحياتي قوم اغسلهم عشان خاطري هههههههههههههه فتحس ان المساعدة اصبحت مشاركة اجبارية وهتبقي بتاعتك رسمي..