الموضوع: الصني الجديدة - رحلة على 180 ك/ساعة , وتكتة الموتور وانت راكن

سلام عليكم وكل عام أنتم بخير يا أجدع صقور

ويارب يكون عيد سعيد عليكم تقضوه براحة واطمئنان وأمن


أولاً أحب اوضح للناس معلومة صدور صوت طقطقة / تكتكة بسيط عن العربية وهي دايرة وراكنة, مكتوب في الكتالوج بتاعها ان ده اختبار دوري بتعمله العربية لنفسها للفرامل ABS Self Test وان دي حاجة مش مقلقة ولا حاجة .... وعن تجربتي هو مش بينتج عن عدم تسخين العربية وفيها زيت معدني, لأنه بيصدر عن العربية وانا راكنها وهي دايرة حتى بعد المشاوير الطويلة. لذلك لزم التوضيح


ثانياً: مافيش أحلى من طريق مصر اسكندرية الصحراوي أول يوم العيد بعد الصلاة ....الطريق شبه فاضي ومراجيييييييييييح

أول حاجة طقت في دماغي فكرة اني افطر آخر يوم في رمضان على بحر اسكندرية, وخدت العربية ونزلت بعد أدان العصر.... الطريق كان مليان ناس مسافرين يقضوا أجازة العيد, كانت سرعة 120 / 140 مناسبة جداً لو انت متمكن من التحكم في العربية , لأن للأسف كان فيه ناس كتير بتغرهم عربياتهم ويجروا وسط الزحمة على 200 مع عدم مراعاة مفاجآت الطريق....وده أدى لـ 3 حوادث جماعية شفتهم بيحصلوا قصاد عيني في خلال ساعة واحدة, وكل حادثة كانت بتصيب 4 عربيات في المرة الواحدة, ودي أرواح ناس ومش لعبة, وليا عدة ملاحظات على أداء العربية على سرعة 140:

1- اعذروني ماكانش ينفع اصور الأمبير وإلا كان زماني في خبر كان...فمعذرة لأني لا أنشغل بغير الطريق

2- أداء السرعة العالية للموتور أكتر من ممتاز ... دواسة البنزين حساسة وذكية وبتتعود بالزمن على مقدار ضغطة رجل صاحب العربية, يعني لو انت رجلك تقيلة هاتتعود عليك ولو انت رجلك حساسة هاتتعود عليك كذلك ... فلما تحتاج تزود سرعة أو تحرق زيادة علشان تتخطى مقطورة أو أوتوبيس محتاج تغير نمط ضغطة رجلك لمدة ثانيتين علشان العربية تفهم طلبك وتلبيه

3- ظهر أساس ثبات العربية....العربية لها نقشة على السقف بتخلي الهواء يضغط على جسم العربية مع السرعة العالية, فكأنه بيزود وزنها ويديها ثبات عالي...لكن لا يمكن أن نغفل ان فيه قوى أخرى بتؤثر على الـ Aerodynamics بتاعتها ... منها انك هاتحس فعلاً بعدم الثبات لو عدت من جنبك عربية كبيرة بسرعة عالية, خصوصاً لما حاولت اعدي من عربية تريللا...حسيت اني اتطوحت لأقصي شمال الطريق....ولاحظت في نفس الوقت ان العربية فيها Traction Control بيصحح اتجاهها في نفس اللحظة ...بشرط انك تكون متحكم جداً في الدركسيون....لذلك احرص انك تمسك الدركسيون بإيديك الاتنين وبلاش تسوق العربية بإيد واحدة وانت نايم على جنبك زي شهريار وبلاش تتكلم في الموبايل أو تعمل حاجات تانية بإيدك وانت سايق تشغلك عن الطريق


4- للعلم نظام Traction Control بيكون جزء من نظام فرامل الآي بي إس...وظيفته هو منع السيارة من الانزلاق أثناء الحركة - مش أثناء الفرملة - وبينفع جداً على الطرق المزيتة أو المبلله وكمان بينفع على أكوام الرمل ودي جربتها بنفسي, انما كانت أول مرة احس بيها على سرعة عالية.

5- وزن العربية فعلاً خفيف...وارتفاعها من الخلف بيدي إحساس انها مش ثابتة, بس العربية ثابتة جداً وده له شروط : انك تتحكم كويس في عجلة القيادة زي ماقلنا...انك تكون حريص جداً أثناء التخطي وكمان تنتبه للوحوش المسعورة اللي جاية تجري من وراك على 200 فيما فوق وكمان انك تحافظ على ثباتك وهدوء أعصابك وماتاخدش أي رد فعل ...سيب العربية تتصرف من نفسها وخليك في نفس اتجاهك ومسكة الدركسيون


6- وانا راجع: رجعت من اسكندرية بعد صلاة العيد , الطريق كان شبه فاضي واقدر افتكر اني ماقابلتش عليه غير 20 عربية من اسكندرية لحد القاهرة !!!! .....لما بيكون الطريق كويس ونضيف وواسع تقدر تجيب عليه سرعات عالية - مع تفادي الرادار ومناطق عبور المشاه ومداخل القرى - لأن لاحظت ان الناس فاكرة انه عيد وطالعين يتمشوا على الطريق الصحراوي !! وبيعدوا الطريق كأنهم نازلين يشتروا فول من الحارة !!! فلازم تاخد بالك من التصرفات المجنونة دي


7- العداد بدأ يعدي 140 وانا مش حاسس بأي فرق في السرعة أو الثبات ...لحد ماوصل 180 مستريح من غير أي اختلاف في الثبات كذلك ...ولما حاولت اجيب 200 اضطريت اهدي علشان دخلت على منطقة يو ترن والطريق بدأ يضيق....زائد اني بدأت احس فوق 180 بعدم الثبات الكامل وقررت اهدي علشان الأمان ومفاجآت الطريق.... لاحظت ساعتها ان استهلاك البنزين زاد شوية ( التانك يوصل من القاهرة لاسكندرية والعكس بتفويلة واحدة ) بس ماتسيبش التانك يفضى للآخر علشان ضمان سلامة فلتر البنزين

8- صوت الموتور على 180 ماكانش عالي ...أداء التكييف كان فوق الممتاز (كان على سرعة 1 ومخلينا قاعدين متلجين لكن صوت الهواء كان عالي جداً ومسموع ومخليك لازم تعلي صوتك علشان اللي جنبك يسمعك ...فمش عارف رأي السادة الصقور في الحكاية دي إيه


ملخص الموضوع ان نيسان صني الجديدة ممتازة وفوق الرائعة للسفر والرحلات , وكمان فيها حتة الجري - بشكل محسوب - لو انت قادر تتحكم وتسيطر على عربيتك ... مع مراعاة تجنب أسباب عدم الثبات


وربنا يسلم طرقنا جميعاً ...وكل عام وأنتم بخير


وأرجو مراعاة عدم اختبار السرعات العالية في طرق مزدحمة أو بشكل جنوني غير مسئول ...لأن دي روحك وأرواح باقي البشر على الطريق , ماتستهترش بيها لأني شفت بعيني عاقبة المستهترين شديدة ازاي .....

المشاركة الأصلية كتبت بواسطة osama_alam

نورت اسكندرية. اعتقد لو العربية ركبلها اسبويلر حيحل مشكلة حدفة الهوا لما عربية تعدي جنبك ويدي ثبات اكتر للعربية علي سرعة عالية

منورة بأهلها ...ومعاك حق فعلاً بافكر اركبلها سبويلر لو السفريات بدأت تتكرر