بفضل الله اشتريت كارينز

**aymanbay** · 22-08-2012 12:03 AM

السلام عليكم

فى رمضان كنت باكلم صديق عزيز شغال فى العربيات انى زهقت من عربيتي الصني 2001 لانها ضيقة والولاد بيكبروا وبافكر اشوف عربية واسعة خصوصا اني معظم شهر رمضان هاكون أجازة وعندي فرصة أدور وادبر مبلغ على الصني اجيب عربية معقولة لاني محبش التقسيط.
لقيته فجأة بيقولى طلبك عندي تعالى معايا .. رحت معاه لقيت عربية كارينز 2010 واقفة قدام المحل جاب المفتاح وقالي اركب وجرب الكارينز .. قلتله عارفها وجربتها وهايلة جدا لكنها خارج الميزانية
قالي بس جرب دورت العربية وخدت بيها لفة محترمة العربية زي الفل بس حسيت انها محتاجة ظبط زوايا وفيها كام حكة خفيفة من هنا ومن هنا لكن الفرق بينها وبين النيسان كبيييييييير جدا

المهم عشان ماطولش عليكم الراجل خد النيسان وعشر الاف جنيه وقسطلي 40 الف بدون أي زيادة على سعر العربية وأصبحت من اصحاب الكارينز

العربية حالتها معقولة جدا وعاملة 17 الف كيلو والمشكلة الوحيدة اللى حسيتها فيها هى التكييف بالنهار ضعيف ولكنه بالليل كويس جدا وده أمر منتشر اليومين دول فى أغلب العربيات وباذن الله هاظبطه

المهم انا عملت الموضوع عشان أول حاجة اشكركم على المواضيع الجميلة اللى استفدت منها جدا فى الكام يوم اللى فاتو وباذن الله نفيد ونستفيد مع اعضاء القسم الجميل ده

**محمد بدر** · 22-08-2012 12:53 AM

مبروك واختيار موفق جدا ان شاء الله - بس موضوع الزوايا ده غريب شوية
انا الكارينز قعدت معايا سنتين - 23 ألف كيلو متر ولا زوايا ولاغيره ولاأحتاجت أى صيانة كمان وكانت ما شاء بحالة الزيرو - ربنا يبارك لصديقى - اشتراها منى من 8 أشهر ومبسوط منها جدا

**ابو ليلى** · 22-08-2012 01:11 AM

الف مبروك ويارب يبارك فيها ويحفظها من كل سوء
كمان الف كيلو روح اعمل صيانة ال 20 وخليهم يعملو تشيك كامل على العربية
حتى لو بفلوس زيادة مش مهم .

**Khaled_Nowaihy** · 22-08-2012 01:32 AM

1000 مبروك والكارينز مكسب كبير
بالنسبة للتيكييف لتحسين الأداء روح نظف الفلتر بضغط الهواء فى أى محطة بنزين
ولما تركن العربية فى الشمس يستحسن تحط شماسة كبيرة على البريبريز الأمامى عشان التابلوه بيمتص الحرارة بغباء خصوصاً لو لونه اسود
بالنسبة للزوايا تأكد من ضغط الهواء وحالة الكاوتش وان شاء الله تكون مظبوطة