السلام عليكم و رحمه الله و بركاته

كل سنه و انتم طيبين بمناسبه العيد جعله الله على الامه الاسلاميه عيد سعيد ...

انا عايز منكم ترشيح عربيه زيرو من موديلات 2013 لنسيبى ..

مش مهم ماركتها او صناعتها (كورى - يابانى - المانى - ..) لانى حاولت ترشيح اكثر من عربيه له و كل ما نيجى نفكر فى عربيه و نشوف مواصفاتها و كمالياتها نتعقد لانه عنده مجموعة متطلبات اساسية لازم تكون موجوده فى العربية و مالقاهاش فى العربيات اللى ليها شعبيه زى السيراتو و اللانسر شارك و الهيونداى النترا الجديدة ..

المهم مواصفات الراجل اللى لازم تكون موجودة فى العربيه هى :

1- لازم يكون فيها Immoblizer و مينفعش تدور الا بمفتاحها الاصلى

2- لازم يكون فيها اثنين Air Bags واحده للراكب وواحده للسائق (مش 6 و 8 زى السيراتو الخليجى او 10 زى الجيتا) ..

3- لازم يكون الفرامل ABS + EBD

4- لازم الفرامل الامامية و الخلفية تكون طنابير

5- لازم يكون فيها ريموت كونترول مزود بسنتر و انذار لقفل العربيه عن بعد و تدى صوت لو حد لمسها او حاول يفتحها

6- لازم يكون فيها Fog Lights نوره كويس فى السواقة بالليل

7- لازم يكون فيها جنوط سبور 15 او 16 بوصه بالكثير قوى

8- لازم تكون عاليه عن الارض بمقدار 15-16 سم على الاقل و عفشتها قوية و تستحمل السفر رايح جاى على الطريق الصحراوى بتاع الصعيد من سوهاج للقاهرة مرتين شهرياً و تمشى فى الطرق الداخلية لمراكز سوهاج بمطباتها و جبالها بدون مشاكل

9 - يفضل ان تقبل تموينها ببنزين 90 بدون اضرار لان بنزين 92 مش موجود فى سوهاج بكثرة زى القاهرة

10 - يفضل ان يكون توكيلها له مركز خدمه فى الصعيد (اسيوط - سوهاج - قنا - ..) مش كل ما نيجى نعمل لها صيانه او حدثت اى مشكله يجيب العربيه و ييجى القاهرة

مش مهم بالنسباله الكاسيت نوعه ايه او فيها زينون او فيها سنسور للمطر و الشمس او حتى انها تقول بابا و ماما ... الراجل عايز عربيه عمليه و قوية يستخدمها فى تحركاته فى سوهاج و السفر للقاهرة

الميزانية اللى محددها : 150 - 200 الف جنيه حد اقصى

مع مراعاة انه نازل من مرسيدس زلمكة 230 موديل ثمانينات هلكها معاه شغل و سفر 10 سنين متواصله مقالتش لا لغايه ما موتورها فوت و حالتها تعبت فباعها بحالتها و مقضيها مواصلات لغايه ما ربنا يكرمه بعربيه احلامه ...

فى انتظار ارائكم مع مراعاه توافر المواصفات 1 حتى 8 فى العربيه و بالنسبه لموضوع البنزين و التوكيل هنحاول نقنعه ...

مع خالص الشكر مقدماً و كل عام و انتم بخير مره اخرى ...