-
تجربتى مع ليكوى مولى
انا مشترى لانسر بوما 2009 مستعملة من سنة
عاملة 36 الف كيلو
1600 مانيوال كلاسيك
اول ما جبتها غيرتلها لزيت موبيل 1
انا كنت بحط فى عربيتى القديمة من الزيرو زيت موبيل super XHP
العربية كانت هيونداى اكسنت الشكل القديم موديل 2005 وكان عادى يعنى مكنتش بركز فى حوار الزيت ده
المهم بعد كلام كتير ع المنتدى لاقيت فى هجوم ع المويبل و الشل و التوتال وبقيت بسمع عن انواع تانية
المهم يعنى بعد ما ال 10000 كيلو بتوع الموبيل خلصوا على 46000 كيلو قلت اغير ل ليكوى مولى
المهم استقريت انى اشترى ال
high tech 5w-40 SN
اللى هو جركن 5 لتر ب 295 جنية
المهم كلمت توب جير فى فيصل اقرب واحد لى مكنش عنده
كن عنده ال Top tech 5w-40 SM
جركن 4 لتر ب 260 جنية
المهم قلت مش فارقة هيطلعوا نفس الكفاءة يعنى
غيرت الزيت و الفلتر التكلفة الكلية كانت 290 جنية
ودلقتى مشيت بيها بتاع 600 كيلو كده
الصراحة مش حاسس بالوهم اللى كان الناس بتقوله
يعنى تقريبا نفس اداء الموبيل 1 اللى عدى عليه 10000 كيلو
يمكن بوهم نفسى شوية ان العربية انعم و سحبها بقى احسن
بس صوت العربية زى ما هو يعتبر عالى نسبيا او العادى بتاع البوما اللى اعرفه
واستهلاك البنزين تقريبا زى ما هو
معرفش هل بعد كيلوات اكتر ممكن احس بفروق اكتر ولا لأ
المهم يعنى قررت انقل تجربتى
ممكن المرة الجاية ابقى اجرب فالفولين او كاسترول
بس مش عارف انهى فيهم
لو لاقيت الدنيا مش فارقة هرجع لشل او موبيل وخلاص
ودمت سالمين
:)
-
انا طول عمري باستخدم شل 5000 جربت حجات كتير من اللي بتطلع كل شويه من اول فيسكو لغايه ليكوي مولي وفي النهايه رجعت تاني لشل
-الخلاصه خليك مع الزيت اللي انت ترتاحله وتطمن لمصدره
-
وصلت ل 1100 كم ب ليكوى مولى
ولسه نفس الانطباع
:)
-
بصراحه انا مش مقتنع بقصايد الشعر الشعر اللي بتكتب عن الزيوت اللي محدش سمع عنها غير في نايل موتورز
اظن ان شركات عريقه في عالم منتجات البترول وفلوس بالملايين بتتصرف علي الابحاث
في شركات زي
موبيل
وشل
كل ده يروح هباء منثورا علشان زيوت او مره نسمع عنها
عن نفسي مش مقتنع غير بموبيل اوشل او حتي التعاون
-
انا جربت ليكوي مولي 5 الف وفعلا وطى صوت المحرك بنسبه ملحوظه عن الشل
بس برضو مش عارف ليه في حاجه غلط وهرجع لشل مع الاداء يعتبر هو هو والزوجه برضو تعتبر هي هي
-
هو مفيش حد جرب الشل الترا بلس ؟؟
-
انا جربت موبيل وان من زمان في الانوس وكان سيــــــــــــــئ (ممكن كان مضروب او مش ماشي مع العربيه)
انما انا باستخدمه في الالنترا والشارك من زمن وبصراحه الحمد لله زي الفل ومش بينقص ولما باكشف عليه بعد ال 5 الاف كيلو بالاقي لزوجته زي الفل...
انا جربت برده فيسكو قبل كده (عن طريق المنتدي) وكانت تجربه محبطه...
وحاليا كل ما افكر اغير نوع الزيت واجرب فالفولين او ليكوي اتردد واقول انا مستريح مع موبيل وشاري دماغي ...لسه هاقعد اجرب واقارن واقيم من تاني ( بلا وجع دماغ)
-
السلام عليكم
زيت ليكوي مولي باستخدمه من سنة تقريبا، واستخدمت كذا نوع طول عمري زي شل وفوكس وموبيل والتعاون (التعاون عجبني جدا)
أول نقطة أحب أقلها لحضرتك احكم على الزيت بعد فترة من الاستخدام، وتاني حاجة مفيش زيت في الدنيا هيرفع القوة الحصانية للعربية أو يخليها تطير من الأرض زي ما كتير متصورين، وإنما فروقات زي تقليل استهلاك الوقود وده بيلاحظ في المواتير الكبيرة، أو صوت العربية يهدي شوية (مش هيروح خالص) أو إن معدل السحب والتسارع يتظبط شوية ( مش أوي)
جربت ليكوي مولي في مواتير فيليشيا وبورا وبيجو وتويوتا سوبرسيرف(دفع رباعي 3000 ديزل)
بالنسبة للفيليشيا كان زيت 20w50 وبيمشي 5000كم الحلو فيه إني آخر مرة مغيره على 6400كم ونازل وفيه لزوجة كويسة وده عامل مهم إن الزيت مبيجيبش آخره بسرعة ويستحمل إنك تزود عليه
في التويوتا عشان موتورها ديزل الصوت كان عالي مع موبيل بقى أوطى بشكل ملحوظ مع ليكوي
وفي البيجو والبورا معدل استهلاك الوقود فعلا قل في السفر ومع السرعات ومش بيتبخر زي انواع تانية.
وعشان كده استقريت عليه، بس الحكم بعد الاستخدام مدة
وكل انواع الزيوت اللي مستوردة ومتصنعة محلي فمصدر خام الزيت واحد بس بيتم الانتاج في التكرير حسب كل مواصفة مطلوبة لكل شركة، وبعد كدة الإضافات بتاعت كل شركة هي اللي بتفرق نوع عن نوع، وليكوي مولي صناعة ألماني، وعلى العموم بتكون راحة وتعود
Content Relevant URLs by
vBSEO 3.6.0 PL2