تقرير عن كاوتش بريدجستون تورانزا gr90

**hany63** · 24-08-2012 01:07 PM

تم بحمد الله تركيب ٤فرد تورانزا Gr90 في هوندتي سيفيك Vti 2010 و بالمناسبه بشكر زميلنا unendlish على تعبه معايا امبارح و فعلا رحت عشان اركب الميشلان عند ولاد حكيم الا اني فوجئت بانهم تقريبا انهوا النشاط لما قعدت ادور عليهم في مصر الجديده و اسال بتوع الكاوتش يلا المره الجايه لو لينا عمر
و قبل ما اقول انطباعي عن الكاوتش الجديد احب في الاول اوضح ان اللي راكب في العربيه بتاع الفابريقه تورانزا برضه بس الفيرجن القديم و ده كان بينزل في الفي تي اي بس و ينتمي للاسلوب الرياضي بمعنى الفرده ناشفه عشان الثبات والغرز القطم بس المشكله ان ده عاوز طرق حرير عشان كنت تحس العفشه ناشفه و هي ولا ناشفه ولا حاجه و ده بسبب الكاوتش و كمان بسبب ان الكاوتش ناشف و عريض صوت احتكاكه مع الارض عالي جدا و اي واحد يقتي و يقول لك العزل وحش و مش قادر يفرق ما بين صوت الكاوتش و صوت الموتور و الهوا الخارجي
اول صدمه بالنسبه لي ان الجنط اللي عجلته فرقعت من المطب بيرف رفه خفيفه بس العامل قال لي نحطه ورا وانشاء الله مالهاش تاثير جامد
المهم ركبت و رصصت على ٨٧٠ جنيه للفرده و الراجل لما قلت له اني تبع نايل موتور راح خصم ٥ في الميه من غير استيكر المهم خدت انضف فردتين اللي مافيهوش ولا لحام حكم الواحد حظه ضارب اليومين دول و مشيت
الصراحه الواحد مكنش متصور ان الكاوتش ممكن يغير العربيه للدرجه دي الكاوتش على الاسفلت الناعم مالوش صوت نهائي الله يرحم الورشه اللي كانت شغاله و يقول لك عزل العربيه وحش ياترى انت فين يالهوي
الاداء في المطبات بقت عامله زي السيقيك ٢٠١٢ من ناحيه نعومية العفشه اما الفرامل تحس انها بتسفعك لو ماشي علي ١٠٠ مثلا و داخل يو تيرن فجاءه ما فيش زحف و لا الهوا
بصراحه بانصح اي واحد خصوصا اللي معاه الجيل التامن يغير و هيحس بكل قرش اتدفع

**Eng.Geo** · 24-08-2012 01:57 PM

مبروك يا باشا :d

**hany63** · 24-08-2012 02:13 PM

الله يبارك فيك و كل سنه وانت طيب

**Unendlich** · 24-08-2012 03:37 PM

ألف ألف مبروك يا أستاذ هاني
أنا مش عارف ليه الصراحة الجماعة بتوع هوندا مستنتنين كده في كاوتش الفبريكة سواء 2007/08/12 أو 2009/10
أنا مجربتش ال facelift الصراحة بس كنت قلت الحمد لله جابوا حاجة نضيفة لكن الظاهر جابوا أرخص حاجة في البريدجستون علما إنهم بيحطوا كاوتش إنتاج محلي يعني فرق التكلفة مش هيبقى وااو يعني لو جابوا حاجة عليها القيمة.
و نفس احساسك جربته لما غيرت من الدانلوب الفبريكة لل Conti Ecocont 3