الموضوع: حد جرب ال qq؟؟

المشاركة الأصلية كتبت بواسطة amir

انا هرد من واقع احتكاك مباشر بالعربيه لفترات قصيره

العربيه الكيوكيو اللي جربتها و سقتها كتير اللي هي الاوتو مش المانيوال و بصراحه مش عارف هل 1100 سيسي ولا اقل!!!
المهم الاوتو بتاعها مانيوال و اوتو حاجه زي ما يكون ستيبترونيك و ده شيء غريب بالنسبه لعربيه رخيصه تماما
زي ما تشتري مثلا يعني تلاجه صيني يقوم يديك معاها بوتجاز هديه و ميكروييف علشان انت كعميل تنبسط!!!
هي في المجمل النسخه التوأم من الدايوو ماتيز فاكرين العربيه دي؟!!!

كانت ال27 الجديده و ايام ما كنت في الجامعه كانت ماليه الشوارع حوالينها

نرجع للكيوكيو

هي فعلا مش بس كلام نفس شاسيه الماتيز و نفس قطع الغيار زي قواعد الماتور و اجزاء تانيه لما كنت بغلب اني الاقيها كنت بشتري بتاعت الماتيز و ركب يا معلم!!!

الثبات نفس ثبات الماتيز و فيها ميزه حلوه مش عارف هل نتيجه الكاوتش صاحب المقاس الصغير(و ده هيغلبك علي بال ما لاتقيه و هتلاقيه قريب من سعر الكاوتش الاكبر منه علشان ندرته بس!!!!! ايموشن جريندايزر زيييييييييي)
الميزه هي ان الدركسيون خفيف بدرجه صعب تصديقها
و كأنه باور كهربا و الله اعلم بس فعلا خفيف جدا جدا
طبعا استهلاك العربيه للبنزين يكاد يكون منعدم ( مش عارف فرق السيسي بتاع الاوتو عن المانيوال ولا هي هي)
مناورتها حلوه في المدن لكن علي الطرق السريعه مجربتش نتيجه اني حذر جدا في السواقه لدرجه الشلل بشهاده اصحابي بتوع الجري و اخويا نفسه بس لنفس ذات الدرجه اللي تخلي اي حد بيسوق و يركب جنبي يبقي مرتاح جدا جدا لسواقتي ((يعني مش جدو قوي يا اخواننا ))
عيوبها هي هي عيوب الماتيز و ياريت قبل ما حد يقاوح فدي بالذات يتفضل يشوف الكراش تيست بتاعها و بتاع الماتيز علي اليوتيوب
المهم العيوب كالتالي و الترتيب مش اساسي انا بفتكر بس
1- الكراش تيست زي الزفت للسواق في الماتيز و الكيو كيو طبعا لأنها نفس التصميم
2- الكراش تيست زي الزفت للسواق في الماتيز و الكيو كيو طبعا لأنها نفس التصميم
3- الكراش تيست زي الزفت للسواق في الماتيز و الكيو كيو طبعا لأنها نفس التصميم
4- كررت العيب ده لأن العربيه يمكن تبقي اختيار مرضي لحد عايز يترحم من تكاسي و ميكروباصات جوه البلد لكن ده مينفيش ان العربيه خطر جدا من ناحيه الكراش تيست علي سرعه مش عاليه ابدا و الواحد ممكن يمشي بيها و اكتر في صلاح سالم و الاوتوستراد مثلا
و انا مش مسئول عن حد يجراله حاجه الكراش تيست موجود اونلاين دخلو شوفوه بنفسكم
5- الشنطه مساحتها كوميديا
6-الانوار في التابلوه ببكر و ده شيء سخيف بيفكرني بالفليشيا بتاعتي و مكنتش بحب فرشه الزراير دي ماله دراع مالتي زي الاكسنت من ايام 99!!!!
7- كنت ناسي اهم حاجه الميكانيكيه عندنا في مصر كسالي جدا بطبيعه الحال فمش بيحبو يشتغلو في عربيه حوضها ضيق الا للحبايب
ده بالنسبه للعيوب

اما المميزات
1-عربيه رخيصه و تعتبر البديل الاكثر رخصا من الكتكوته دايوو ماتيز
2- عربيه صغيره تنفع اسره صغيره او كعربيه للمدام
3-عربيه للمدن و الزحمه بجد و تلاقيلها ركنه حتي لو في شنطه عربيه راكنه قدامك مثلا
4- الباور بتاعها خرافيييييي الله اعلم هل بسبب الكاوتش الصغير ولا ايه
5-استهلاك البنزين يخلي منظر عامل البنزينه يوحشك و تديله تيبس معتبره كل ما تشوفه
6-مساحه الاشخاص معقوله و ان كنت بركبها لوحدي او بالكتير واحد بس معايا
7-السحب معقول بس مش طلقه طلقه برضو
8-الثبات الله اعلم انا اخري معاها حوالين ال120 و مكنتش عايز اخد حركات خطر (راجع المقال فوق انا مش جدو ها )
9-العفشه و نعوميتها و نشوفيتها ده كلام يمكن يبقي يفرق معايا لما سني يكبر و ابقي جدو بجد ( ده في المستقبل البعيد لسه يا شويه ) بس مش بتفرق معايا دلوقتي و ان كانت العفشه مياله للنشوفيه و مش زي نعومه اكتر عربيه عفشتها ناعمه و هي الكورولا بس مكنتش سايق و قاعد جنب السواق و فعلا عربيه عفشتها ملبن)
10- بالنسبه لقلقي و ميلي للحذر من ناحيه الكراش تيست
طبعا كلما موحدين بالله و القضاء و القدر واجب اننا نؤمن بيه بس الواحد بياخد بالاسباب و يدعي ربنا
مش معني كده ان الواحد يرمي نفسه في التهلكه بس في المجمل بخصوص سوء الكراش تيست اولا هي هي الماتيز شكلا و مضمونا و اكيد لما نزلت الماتيز كان ليها كراش تيست وقتها و الناس برضو اقبلت عليها و العربيه اخدت حقها في الشوارع المصريه و ان كان مش بنفس انتشار الحالي لل27 مثلا او انتشارها قبل كده حتي لكن لسه بشوفها في الشوارع و الكلام لسه عن الماتيز
فلما نقول كراش تيست مخيف مش معني كده انه مميت حتما
لأن الكراش تيست عربيه بتدخل في حائط اسمنتي بسرعه تقريبا 60 علي الاقل في احد انواع الكراش تيست (في نوع تاني تقريبا و الله اعلم بيتطلب كراش تيست علي سرعه 40 )
و العربيه بتدخل بكامل سرعتها بوشها
و ده في الطبيعه مش بيحصل و مادام الاتنين سواقين صاحيين او واحد فيهم حتي فطبيعي بياخد جنب بالعربيه
يعني في ارض الواقع مش شرط الحادثه لا قدر الله تحصل بنفس كيفيه الكراش تيست
اللي اتفرج علي الكراش تيست علي النت فيديو للعربيه سواء ماتيز او كيوكيو هيفهم قصدي كويس

بس كده و يارب مكونش طولت عليكم و بالمره لو حد يعرف بتاع فيتيسات الكيوكيو العجيبه الاوتو او بيصلح فتيس اوتو عادي حتي لأن العربيه المذكوره الفتيس الاوتو بتاعها معلق و مجنني
محدثكم اللي بيدور علي حد يصلحها

الله ينور