أنا مش عاوزكم تتخضوا من العنوان لأن الموضوع غير العنوان خالص ..
انا بصراحة هاتجنن بس من حبى فى الهوندا سيتى وعاوز أجيبها بس المشكلة أن سعرها الزيرو مبالغ فيه بشكل مش طبيعى.. ..
أنا الحمد لله معايا أجيبها كاش موديل 2013 بس زي ما أنتوا عارفين بيبقى فى أولويات لحاجات تانية لأنى لو جبتها كاش فمش هيتبقى معايا سيولة كبيرة وخاصة أنى أب لطفيلن وكنت شغال فى السياحة وبقالى مدة من غير شغل فالواحد وهو قاعد من غير دخل بيصعب عليه أنه يروح من رصيده اللى حوشه 70 % لعربية معرضة طبعاً لأى شىء وهى ماشية على الأرض أو واقفة .
والمشكلة الأكبر انى بسافر على طرق طويلة كتير ما بين القاهرة وشرم الشيخ ونويبع وطابا فمجتاج عربية كفاءة وتتميز بمعدلأت للأمان ومتعة القيادة.
أنا الحمد لله أمتلكت وركبت عربيات متنوعة زى تويوتا ياريس ومتسوبيشى لأنسر وهيونداى فيفا وأخيراً بى أم دبليو الدبانة
e36
ولما بعت البى أم دبليو نظراً لأنها زهقتنى شوية فى صيانتها فحبيت أنى أريح دماغى شوية واجيب زيرو بسعر رخيص أقدر أبدله لما ربنا يفرجها بعد ما أشتغل أن شاء الله لحاجة اعلى وأحدث فكان اللى قدامى فى السوق أنى أشترى رينو لوجان زيرو بسعر 72 ألف بس بصراحة مش مستريح لعلوها عن الأرض فى السفر وكمان مش مستريح لبعض أراء الناس اللى أمتلكوها ومنهم اللى بيشكر فى العربية ومنهم اللى بيلعن فيها وبيقلبها على طول وهى كسر زيرو , عشان كده قلاءت منها وبالذات لما كتر عليها الكلام مابين مؤيدين ومعارضين و لكن من ناحية تانية حابب أوى سعرها لأنوا مناسب لظروفى الحالية ولكن اللى كان مزعلنى أن مفهاش abs ولما قرأءت فى قسم الرينو عرفت أن السانديرو أستيب واى فيها abs وبتزيد عن اللوجان فى حجات بسيطة وفرق سعر مش كبير بينهم فكنت ناوى أجيبها وألغى فكرة شراء اللوجان .
أحنا من الأخر أسرة مكونة من أربع أفراد :
أب وأم وطفل 11 سنة وبنت 7 سنين , ولما فرجت أولأدى وزوجتى على العربيتين وشرحتلهم عيوب ومميزات كل واحدة فكان الرد 3 متفقين على شراء الهوندا سيتى وواحد معارض . طبعاً أنتوا عرفتوا مين اللى مش متفق معانا ومعترض..أنا بسميها فى البيت ... هيئة الرقابة المالية ومصلحة الجمارك ومصادرة الأموال.. طبعاً عرفتوا مين ؟!!!!!!!!!
بس أنا زوجتى معترضة ومش متفقة معانا لأنها بتقول أن سعر العربيات دايماً فى النازل وأن ممكن بالفلوس دى والفرق ده وهو مبلغ مش بسيط ما بين سعر اللوجان زيرو والهوندا سيتى وهو مبلغ حوالى 70 ألف فرق لصالح الهوندا سيتى . فممكن نعمل بيهم حاجات كتير تانية زى نشترى شهادة أستثمار تجيب دخل مع باقى المبلغ اللى هايفضل معانا لحد ما ربنا يفرجها وأشتغل أو نأخذ جزء من المبلغ اللى هيتبقى من شراء اللوجان لتوضيب شقتنا فيما بعد أو ممكن شراء قطعة أرض صغيرة نركنها لقدام ...ألخ
أنا بصراحة مش ديكتاتور فى البيت واى مبلغ ربنا كان بيرزقنى بيه كنت بقسموا علينا كلنا ومش عاوز اخد من نصيبهم وأظلمهم عشان أرضى نفسى فى حين أنى أنا وأبنى بالأخص مقتنعين جداً بأن الهوندا تستاهل المبلغ ده وأن الفرق كبير طبعاً ما بين الهوندا والعربية اللى أنا حاططها معاها فى المقارنة لصالح الهوندا طبعاً.
قلت طب ياواد ماتشوف هوندا سيتى مستعمل حالة نضيفة ولكن بلأقى فى النت أسعار تكاد تكون قريبة من سعر الجديد .. يعنى مثلاً فى حالة شوفتها فى النت بيزك وفابريكة برة وجوة وعداد 25 ألف كيلو موديل 2009 ومطلوب 95 ألف جنيه, انا خايف تكون الناس دي فاصلة الواير بتاع عداد المسافات وعشان كده العربية ما بتعدش كيلو مترات مع الزمن والوقت و
مش عارف أيه هو السعر المناسب الحقيقى لعربية بالمواصفات اللى كتبتها دي مستعملة ؟!! وفين أقدر أكشف عليها كويس عشان أطمن وما أندمش ؟!! وياترى الكشف فى التوكيل بيتكلف كام ؟!!!
أنا أسف أنى صدعتكم .. بس أنا محتاج رأيكم جداً فى كل الكلأم اللى قراءتوه كله .
عاوز نصيحة من القلب لأنى فعلا فى حيرة كبيرة جداااااااااااااااً وعاوز أخلص وأجيب عربية عشان
أجرى أشوف رزقى وأدوور على شغل ........
مع خالص التقدير والأحترام لكم جميعاً...
المفضلات