السلام عليكم اعضاء قسم فيات الكرام
ان شاء الله انا هاقابل السيد المهندس / مدير خدمات مابعد البيع - بشركة اوماترا الاسبوع الحالى ان شاء الله
السيد المهندس يتطلع الى تعامل افضل بين الوكيل و السادة العملاء و على وعد انه هايتم بذل اقصى جهد للرقى بمستوى هذا التعامل
بما اننى حديث العهد مع قسم فيات فارجو من حضراتكم عرض سريع للمشاكل التى واجهتكم فى التعامل مع الوكيل حتى يتسنى لى عرضها على السيد المهندس
ورجاء شديد عدم التجاوز فى الالفاظ مهما بلغ غضبكم و حنقكم من الوكيل
تحياتى و شكرا
ماشاء الله 50 مشاهدة و لا تعليق واحد
ايه يا جماعة ماحدش عنده مشكلة مع التوكيل
امال المنتدى كان بيسحب الثقة منهم ليه ؟؟؟؟
غالبا المشاهدات تخص أشخاص زيي كده متابعين للمنتدي, غير المالكين لسيارات فيات.
ياباشا انت فاكر انك لماتكلم المهندس اللى حضرتك بتقول عليه المشاكل حتتحل والتوكيل حينصلح حاله !!!
يا باشا الموضوع اكبر من كده وياما كان فيه مقابلات مع مسؤلين فى اوماترا وغيره وغيره وشكاوى اتبعتت لفيات ومفيش فايده
المشكله فى السيستم اللى ماشين عليه واكيد طبعا هو محطوط من صاحب التوكيل نفسه مش من الموظفين دول فى الاول والاخر موظفين بينفزو اوامر صاحب الشغل ومفيش فى ايدهم حاجه
يعنى المقابله دى حتخليهم يجيبو مهندسين وفنيين بيفهمو وبيراعو ربنا ولا حيرخصو اسعار قطع الغيار ولا حتخليهم يجيبو قطع الغيار اللى كل لما تسألهم على حاجه يقولك مش موجوده ونجيبها بالطلب ولا ولا ولا
باب المناقشة مفتوح فى كل حاجة و اللى عرفته انا مدير خدمات مابعد البيع لسه جديد و عنده طموحات انه يغير مستوى التوكيل للافضل
المهم انه يكون عنده شيئ طيب يقدمه لينا كعملاء و يبقى فى استعداد لبناء الثقة من اول و جديد بين العملاء و التوكيل
و الله ماصدقوش فى كلامهم و شركة فيات نفسها لا تبالى بوكيلها فى مصر يبقى نبيع العربية و نشوف حاجة تانية نركبها و تريحنا
السلام عليكم
زى ميسو ما قالك
التوكيل معاملته زفت
اسعاره مبالغ فيها جدا
مراكز الصيانه فى الاسكندريه و القاهره و الوكلاء المعتمدون نادرين و موش فاهمين كويس
اهتمام بالعملاء زفت
بس الاهم اسعار المصنعيات و قطع الغيار مبالغ فيها جدا لسياره فيات مقارنه بالاوروبى الثقيل زى الفرنسى و الالمانى و الانجليزى و التشكي
غدم المصداقية في التعامل
يكدب لكن ما يطلعش غلطان...موضفين التوكيل
انا طبعا كان اول مرة اروح اوماترا جسر السويس
قابلى اخ فاضل و اخد منى العربية و ركنها ووصلنى لمكتب السيد المهندس بدون مايعرف انا عايز ايه كل اللى طلبته منه انة عايز اروح مكتب المهندس علاء
المكتب مفتوح و مش محتاج تسال حد عليه او تستأذن حتى فى الدخول
المقابلة شيك جدا و الراجل رحب بيا على الاخر
اتعرفنا على بعض و اخدت فكرة عن التوكيل خاصة انها اول زيارة ليا
السيد المهندس اقر بوجود تقصير من التوكيل فى الفترة السابقة و بيوعد على ان المستوى هايتحسن فى القريب العاجل و لكن الموضوع محتاج وقت و مجهود
انا بنفسى شفته بيتحرك بمنتهى الهمة و النشاط و عنده اهتمام بالغ جدا بالعملاء و اللى بيدخله مرتاح عنده جدا
اللى عرفته برضه انه فى ساعات الصباح الباكر موجود بنفسه مع العملاء تحت فى مكتب الاستقبال علشان يبقى فى الصورة و يبحث المشاكل على ارض الواقع
لو مدير خدمات مابعد البيع بالاسلوب ده و هايفضل كده طول الوقت انا متوقع تعامل افضل من الوكيل تجاه العملاء
اللى عرفته كمان انه فى ضغط منه شديد على الادارة لافتتاح فرع جديد بالتجمع الخامس و ده فى اعتقادى خبر ممتاز و توسع هام لاوماترا
الجديد انه بتم مراجعة سيارات لينيا جديدة لطرحها مرة اخرى فى الاسواق المصرية و ده خبر ممتاز
انا اتمنى ان الامور تتحسن و ترجع الثقة بين الوكيل و العملاء و الله المستعان
وصلت برضه انه مش هايبقى فى اى خصومات للعملاء من نايل موتورز فى الوقت الحالى
تحياتى للجميع و شكرا
انا واحد من الناس اللي فعلا كانت مخنوقه من اوماترا بخصوص مشاكل موجوده كتير في الصيانه والمشاكل اللي ممكن تحصل لكن انا حسيت باختلاف تام في الكام شهر اللي فاتوا
الناس بقت مهتمه جدا انها تدي احسن شغل للعميل ، وترضيه وفيه ناس بتكلمهم من هناك كل فتره تشوف لو فيه حاجه تعباك في العربيه وتحددلك ميعاد تروح تصلحها
وفيه ناس هناك متعاونه جدا امثال "الاستاذ احمد سعد " انا بحس اني لما بروح هناك انه ناقص يعملك العربيه بنفسه من كتر ما بيبقي مديك اهتمام
انا لسه واخد عربيتي انبارح كنت عامل حادثه بسيطه (الحمد لله)
ماشاء الله علي الدهان والسمكره كان الحاجات خارجه من المصنع
انا اكتر حاجه كنت بحبها في اوماترا هيا ان كل او معظم قطع الغيار اصلي (يعني تحس ان لما حاجه تبوظ انك ممكن تجيب زيها بالظبط بنفس الكفاءه من غير ماتزعل)
دلوقتي انا اشهد ان اسؤء قسم في التوكيل ( السمكره والدهان ) بقي احسن قسم بناء علي تجربه شخصيه