نصيحة لو التكييف اتغير اداءه فجأة
لو في مرة ركبت العربية و شغلت التكييف و لقيت اداء التكييف مش هو الاداء اللي انت متعود عليه او حسييت ان المروحة الهوا اللي طالع منها مش هو الاندفاع اللي متعود عليه
قبل ماتروح لاى حد و يلعب في اي حاجة في العربية تفتح درج التابلوه و تمد ايدك وراه و تشوف هل في اي حاجة واقعة منه وراه عند التلاجة بتاعة التكييف
انا بقولكم النصيحة دي عشان اللي حصل معايا اني كنت مسافر شرم الشيخ و انا رايح و انا راجع مكانشي عاجبني اداء التكيف قوي و كان غير اللي انا متعود عليه و كنت بحس بالكومبريسور بيفصل كتير و مبيلحقش بشتغل
امبارح كنت بدور على ظرف كنت حاطه في درج التابلوه و ملقتهوش و انا من النوع اللي درج التابلوه عندي بيبقى مليان قلت لما امد ايدي ورا الدرج يمكن يكون الظرف وقع ورا و فعلا لقيته و بعد ما شيلته من عالتلاجة فعلا التكييف رجع لنفس اداءه المعهود و المروحة هواها بقى اقوي فا استوعبت ان الظرف كان سادد مكان سحب الهوا
انا قلت انقلكم التجربة يمكن حد يحصل معاه كده