تجربتي مع الشاريد 1990 وسفري لبورسعيد لشراء قطع غيار

حابب افيد الناس اللي معاهم العربيه المحترمه دايهاتسو شاريد تسعينات
انا اشتريتها بمبلغ قليل اوي عشان حالتها تعبانه جدا جدا
دورت عي حاجتها في اسكندرية لقيت الاسعار نااااااااااار وعلي نجم حرامي وش
قررت اطلع بورسعيد وطلعت بالعربيه عي الرغم ان الموتور خفيف لكن لما بتطلب بتطلب
طلعت واتفاجأت
ااسعااااااااااااااار مش ممكن
الحاجه ببلاش وكله بالتجربه وركبت هناك وجيت بيهم راكبين عشان الجمارك
انا جبت 4 مكن ازاز ومرايتين كهربا وزرار تحكم فيهم ب250 جنيه
فانوس يابباني اصلي 80 جنيه
شبكه 40 جنيه
رادياتير بالمروحه 150
قطمه بادركسيون بمفاتيح الاشاره والنور 100 جنيه
مكنة مساحات 50 جنيه
وكل واحد وشطارته في الفصال وانا مش شاطر في الفصال كمان
4 ابواب 800 جنيه
كبوت وشنطه 500 جنيه
والمفاجاه اني لقيت مواتير بالتكييف 1000 سي سي بالفتيس كامل ب 1700 واحد اشتراه قدامي بس تاجر
مكنه فابريقه مهاش حل
بلا نصب بلا بتاع روحوا بورسعيد وسيبكم من نصب الناس المحتكره اللي معندهاش ضمير
اروح اسال علي نجم علي ردياتير من غير مروحه يقولي 750 جنيه
وممكن افيدكم علي الناس اللي جبت منعندهم الحاجه

100 / 100

ما شاء الله ...أسعار حلوة جدا.......شكرا للإفادة

وايه اخبار قطع غيار الاكسيل لو تعرف تاجر هناك و المنطقه اسمها ايه ؟دلنا على الطريق

الأسعار ممتازة ماشاء الله..بس بجد فكرة ممتازة الله ينور عليك.. بفكر انزل اجيب حاجتي كلها من هناك...
مش عارف انا دلوقتي الجشع اللي بقى عند التجار ده اييييييه؟!!
حسبي الله ونعم الوكيل في الجشع والاستغلال بتاعهم

ما شاء الله ربنا يباركلك وفعلا الاسعار جميله جدا وعقبال منشوف عربيتك مشرطه الاسفلت :d
ربنا يكفيك شرها ويزيدك بخيرها

موضوع مفيد جدا للناس اللى عندها العربية (المظلومة) ديه

عفارم عليك والله

ممتاز وعاوزين نعرف المكان فين وده محل واحد ولاعده محلات زى الحرفيين مثلا ...وشكرا .

تمام قولنا الجاجات ده من فين وياريت تليفون علشان عايز اشد الشاريد لاخويا الصغير

الله ينور عليك

والله العظيم فرحتنى وشجعتنى انى اطلع الطلعة دى
انا عربيتى ابيزا 98

اسعار تمام جداً والله الواحد يطلع بالعربيه يركب الكلام ده هناك ويرجع يا اخى مجهود ممتاز وفائده للكل ده انا سألت على الاكصدامات هنا عند بتاع التقطيع اللى فى الوكاله قالى ٧٥٠ جنيه اي استهبال يا ريت توضح العنوان بتاع التاجر اللى اشتريت من عندو ومكان التركيب اللى ركبت فى هناك وجزاك الله خيراً

اسعار ممتازه

بس التاجر لما بيلاقي كمية اتصالات عليه بخصوص نوع معين من البضاعه بيزود الاسعار

المكان في منطقه معروفه ببورسعيد اسمها بنك الاسكان
انت حتدخل هناك وحتلاقي محلات لا حصر لها وعندها كل ما تتخيله من قطع غيار
وفيه جوه شويه لو اتمشيت زي باعه جائلين واقفين ببضاعه علي الارض تخش تنقي وتفاصل
المحلات اسعارها مهما كان بالمقارنه باسعار البضاعه اللي عليالارض غاليه
لكن لازم تكون فاهم او تاخد معاك حد فاهم عشان التجاره شطاره
انا اخدت علقه محترمه في الشمس يومين عشان اجيب حاجاتي ولسه عاوز اروح تاني وبحاول افضي نفسي عشان اطلع تاني
وبالنسبه للتركيب الفوانيس والشبكه والردياتير جبتهم من محل وصاحب المحل ساعدني في تركيبهم
اما باقي الحاجات ياما ركبتها انا او شلتها في الشنطه بعد ما جربتها طبعا
والحاجات اللي علي الرصيف لو دورت حتلاقي حاجات نضيفه جدا زي الكلسونه بتاعة النوبيرا جبتها وركبت عندي زي الفل وحالتها زي الفلين وبعشرين جنيه بس ومن علي الارض
ربنا معاكم وانصحكم بالسفر بس خلي بالكم م الروعل لريقوحش جدا جدا جدا ومعلهوش خدمات ولا نور
تروح وترجع بالنهار او تقعد في فندق ليله افضلك

محتاجين رقمك ضرورى انا محتاج اطلع بس عايز حد يطلع معايا ويا سلام لو نطلع مجموعه

اقتباس:

---

المشاركة الأصلية كتبت بواسطة ahmed_fahmy

محتاجين رقمك ضرورى انا محتاج اطلع بس عايز حد يطلع معايا ويا سلام لو نطلع مجموعه

---

أنا ممكن أطلع معاك أنا و فيه واحد صديقى عنده شاريد ...ناكل أكلة سمك حلوة بعد أما نجيب حاجتنا

محتاجه سرب شاريد على بور سعيد واللى يعطل التانى يسحبو :) هى المسافه كام كيلو؟؟

ماشي فركه جميله وحنعرف نفاصل بصوره رهيبه وناخد اسعار جميله لان العدد الكبير بتاعنا حيؤهلنا ناخد زي التاجر بالجمله
عموما انا من اسكندريه ورقمي 01007617066

الله ينور عليك يا باشا ..

انا كنت اول امبارح فى بورسعيد عملت زيك كده بالظبط علشان اشترى موتور
سالت عند الفراش قالى 3500 من غير الفيتيس وروحت و شفت حالته من برا بس كده وكان زر الزفت
قولت لازم طالعة عاى بورسعيد و روحت مساكن بنك الاسكان اللى حضرتك بتقول عليها
اشتريت الموتور 1000 سى سى 3 سيلندر من غير الفيتيس ب 2600 و ده اقل سعر ممكن تجيب بيه موتور كويس و تم تركيبه و الحمد لله زى الفل
كان قدامى موتور بالفيتيس ب 2000 جنيه بس اللى عاندى ف عربيتى انضف منه و السبب ان فى بضاعة بتبقى جايالهم من قبرص و دى عاملة زى مصر فى الجو الحر جدا و استخدام المصريين للعربيات اللى زى الفل طبعا و كلنا عارفينه يعنى موتور ضايع و الكلام ده انا كان معايا تاجر هناك معرفه و هو اللى اشترالى الموتور ده و فهمنى ايه الفرق و عند التجربة الفرق كان واضح جداااااااااااا
ارجو اكون افدت الجميع

سؤال لصاحب الموضوع
هو حضرتك اشتريت مكن الزجاج و المرايات من الناس اللى على الرصيف ؟
وياريت تيفيدنى جبت الردياتير و المروحة منين ولو عند حضرتك رقم التليفون علشان انا هاروح ان شاء الله استلم ورق الافراج بتاع الموتور وعايز اشتري
ولو اى حد عنده معلومة فرش الباب الداخلى ده بيتباع ولا ايه علشان عندى ضايع و روحت عملت عليه جلد وللاسف الراجلى قالى هيضرب من الشمس اشتر الاصلى افضل وانا ماسمعتش كلامه
وياريت برضة اعرف هو كباس التكييف ده انقرض ولا ايه ولا موجود فى بورسعيد عند اى حد ولا لاقيه فى القاهرة مش عارف فى ايه؟

المكن والحاجات دي من علي الرصيف اه
وبالنسبة للردياتير من محل بس انا اخدت اخر واحد 2 ماسوره واللي فاضل عنده واحد ماسوره وانا منصحكش بيه خالص
دور حتلاقي كل حاجه ومش لازم تدور عند واحد متخصص في الشاريد
لما كنت بروح لواحد متخصص في الشريد كان بيضرب اسعار حوه ولما كنت اقوله ليه يقولي مانتوا عندكم علي نجم روح شوف انا عامل واجب معاك قد ايه
انا جبت الردياتير من عند واحد شغال في اللانسر بس جاتله 3عربيات شاريد من كام شهر باع حاجات وفاضل حاجات
وهو اللي قاللي انه بايع الموتور لتاجر من اسكندرية بالفتيس باتكييف علي 1700 جنيه
موتورك كده غالي اوي وكمان من غير فتيس ولا تكييف
دور كويس حتلاقي باسعار ارخص من كده

وبالنسبه لفرش البيبان لو حد وصل لح فيه يقول عشان يفيد الباقي
انا عندي رايح ولما لقيته في بورسعيد قالولي مش حيبيعوه من غير الباب
بيتباع كله علي بعضه بابين قدام كاملين بالفرش 600 جنيه ولسه فيه كلام
انا حنزل ادور في صلاح الدين علي فرش ينفع يركب ويكون شكله حو ولو لقيت حبلغكم

شكرا ياباشا بجد على المعلومات الهايله دى .. انت سخنتنى على الموضوع و بفكر اروح .. عموما انا اتشرفت بيك جدا و لمجهودك و انشاء الله حكلمك على موبايلك عشان ننسق الحوارات دى و نبقى ناخد و ندى فى حاجات العربيه الجميله اوى دى اللى مظلومه فى مصر و اسكندريه خصوصا .. انا عاوز اشترى شويه اكسسوارات زى فرش بابين امامى و شويه الكاوتشات اللى على الزجاج بتاع الابواب و الامامىو الفبره اللى على الشنطه ورا عشان مش لاقيها خالص اصلا .. عموما معرفه سعيده و اسمحلى اخد شويه من وقتك و اكلمك على موبايلك

اقتباس:

---

المشاركة الأصلية كتبت بواسطة m7m0ud

حابب افيد الناس اللي معاهم العربيه المحترمه دايهاتسو شاريد تسعينات
انا اشتريتها بمبلغ قليل اوي عشان حالتها تعبانه جدا جدا
دورت عي حاجتها في اسكندرية لقيت الاسعار نااااااااااار وعلي نجم حرامي وش
قررت اطلع بورسعيد وطلعت بالعربيه عي الرغم ان الموتور خفيف لكن لما بتطلب بتطلب
طلعت واتفاجأت
ااسعااااااااااااااار مش ممكن
الحاجه ببلاش وكله بالتجربه وركبت هناك وجيت بيهم راكبين عشان الجمارك
انا جبت 4 مكن ازاز ومرايتين كهربا وزرار تحكم فيهم ب250 جنيه
فانوس يابباني اصلي 80 جنيه
شبكه 40 جنيه
رادياتير بالمروحه 150
قطمه بادركسيون بمفاتيح الاشاره والنور 100 جنيه
مكنة مساحات 50 جنيه
وكل واحد وشطارته في الفصال وانا مش شاطر في الفصال كمان
4 ابواب 800 جنيه
كبوت وشنطه 500 جنيه
والمفاجاه اني لقيت مواتير بالتكييف 1000 سي سي بالفتيس كامل ب 1700 واحد اشتراه قدامي بس تاجر
مكنه فابريقه مهاش حل
بلا نصب بلا بتاع روحوا بورسعيد وسيبكم من نصب الناس المحتكره اللي معندهاش ضمير
اروح اسال علي نجم علي ردياتير من غير مروحه يقولي 750 جنيه
وممكن افيدكم علي الناس اللي جبت منعندهم الحاجه

---

ياجماعه انا بشكركم لأنى بستفيد منكم ومن الموقع دا على الرغم من انى جديد فى الموقع وفى العربيات كمان
هاكلمكم بصراحة جبت شاريد 83 ودى أول عربية اجيبها فى مصر المهم العربية ماشاء الله جميلة وعلى الرغم من انى معرفتى قليلة بالعربيات كتير قالولى اجيب 182 بدلها يعنى بس انا ماردتش لأن العربية عجبتنى بس هيه عاوزا شوية ترويش وشاش فوانيس وشوية حاجات كدا وهاتحتاج مكنه او اعمرها فى 7 او 8 شهور
ياريت لو حد يعرف اجيب حاجتها منين سواء القاهرة او بورسعيد وارقام تليفوناتهم وهل فى فرق كبير بين مو 83 و مو 90 ولا الفرق بسيط او حاجاتهم واحده
وشكرا

ياه بجد الأسعار دى ده خيال
بس الحاجات دى جديدة ولا إستيراد يعنى الردياتير مثلاً فعلاً ب 150 جنيه