موقف حصل مع الألنترا الجديدة النهاردة
السلام عليكم يانجوم أتمنى تكونوا بصحة وخير .... النهاردة حصلي موقف مع الجميلة ألنترا والحمد لله عدى على خير والا كان هيبقى شكلي وحش بس ربنا ستر .... المهم النهاردة قررنا ننزل نروح المعمورة وننزل البحر قولنا الزحمة خفت شوية والواحد يروح يغير جو بعد ماكنا محبوسين بسبب الأحتلال اللي كان عندنا - بس كانوا منورين والنعمة :Copy of m-s5: - وقد تم المهم من غير تطويل عليكم ركنت العربية وحطيت المفتاح في جيب الشورت وروحت نازل بيه البحر :17: وأكتشفت بعد ما طلعت الكلام ده وطبعاً الحمد لله أن المفتاح موقعش من جيبي والا كانت هتبقى كارثة لأن المفتاح السبير شايله في البيت ومش لاقيه ومدورتش عليه كمان طبعاً أهمال مني ...
فتحت الريموت وهو بيتفك نصين روحت مطلع البطارية وطبعاً كان فيه مية بسيطة نشفتها بس الريموت فضل ينور بشكل عشوائي وأنا قولت مش مشكلة المفتاح بس أعرف أمشي بالعربية وأروح اللي معايا وبعد كدة يحلها ربنا .
طلعت وروحت عند العربية ركبت البطارية ودوست على الأنلوك ولا كأني دوست حاجة طلع وأنفخ وشغل السيشوار عليه ومفيش فايدة روحت فاتح الباب بالمفتاح عادي .... وعينك ماتشوف الا النور بيب بيب بييييب بييييب وسياح وفليشر لقيت الناس بتبصلي كأني بسرق العربية لولا أهلي معايا قالوا عربيتهم المهم ...
الأنذار بيقعد حوالي 20 ثانية وبيفصل ومع كل فتحة باب بيضرب الا في حالة واحدة لو سيبت باب السائق مفتوح بعد كدة تقدر تفتح أي باب براحتك من غير أنذار .
حطيت المفتاح في الكونتاكت وأدور مفيش العربية مش راضية تدور :oops2: كل ما ألف المفتاح للآخر يفصل الساعة والمكيف مع أن كل أنوار الكونتاكت زي الباور والأيرباج وال ABS والحزام كل دول شغالين عادي لكن العربية مش راضية تدور شغلت قرآن وقلت للي معايا روحوا وأنا هحصلكم وطبعاً دمي محروق أزاي غلطة زي دي تحصل المهم بعمل محاولة أخيرة كدة بعد نص ساعة ودارت الحمد لله .
المهم المفتاح ده تمنه كام في التوكيل لو حد من الملاك يعرف وهل هو كدة باظ ولا ممكن يتصلح وهل عادي أن العربية ماتدورش ألا بمفتاحها ولا كده فيها أيموبليزر ولا الحكاية أيه .