الموضوع: حل اصوات التزييق و اى صوت من داخل الكابينه فى السيراتو .

السلام عليكم
لقيت نفسى فاضى قلت لما اشوف الابواب بتزيق ليه لما بعدى على حته مكسره او مطبات
و كمان فى صوت ترزيع جامد لما تلبس حفره شديده على سرعه عاليه او مطب على سرعه عاليه فوق ال 80كم/ساعه مثلا .

المهم اكتشفت كذا شىء بعد المعاينه عن قرب من كل باب و الضغط عليه و مشاهده و السمع بحرص
لقيت الموضوع تافه اكتر ما يمكن
لقيت اخر جزء من اطراف الفرش البلاستيك للباب بيحك مع الصاج الداخلى لما بضغط عليه .
و حلتها بانى حطيت لزق دبل فيس بين الحت دى لانها اقل من 1 ملى المسافه بينهم فحشرت لزق دبل فيس 1 ملى و جزء رفيع جدا .
و بعد كده اعدت اضغط و الحمد لله الصوت راح او قل بنسبة 95%
فى صوت تانى هيسمعه الناس اللى مركبه فرش جلد فوق الفرش الجلد الاصلى :
ليه بقى ؟؟ اصل انا عامل كده . و كان فى صوت هيجننى و تحس ان فى صواميل و مسامير فكه و بتلعب جامد و الصوت ده جننى جدا جدا و للاسف ملقتهوش فى اى سيراتو تانيه ؟؟
طلع اه بقى ؟؟
المسند الجلد بيحك فى الكرسى الجلد اللى جنب السواق و بيعمل صوت تزييق و صوت غريب يجننك .
و ده مش هتحس بيه مع الفرش القماش او حتى الفرش الجلد الاصلى لانهم عملين حساب كده و مخليين الجزء اللى بيلامس المسند الجلد فى الكرسى حتة قماش صغير كده .
فعلا ناس بتفهم و الله و للاسف انا لما ركبت الفرش الجلد مخدتش بالى من الجزئيه دى
فى بقى صوت ترزيع مع الحفر و المطبات على السرعات العاليه و الكلام ده مع اى جنط و اى مقاس كوتش و متجرب فى عربية المهندس حاتم جنط 15 و عربيتى جنط 17 و النتيجه نفس الصوت بالملى .
طبعا الحل ينقسم جزئين او تلاته
1- الجزء الاول صوت بيطلع من الكابينه نفسه و تحس ان التابلوه بيزيق و بيترزع و كده و صوت من المساعدين الاماميين و ده شرحته قبل كده .
المهم الصوت داخل الكابينه :
1- لازم تشيك على مراية النصف مربوطه كويس و الا ملخلخه . و انا ربطها و كانت ملخلخه . و كمان عملت عزل فوم بين اخر طرف مثبت ليها و بين فرش السقف .و ده حسيته لما اعدت اخبط جامد على فرش السقف .
2- الصوت اللى انت فاكره جى من التابلوه .هو فى الحقيقه جى من جراب النضاره مع فرش السقف و الشماسه كمان .
و فكات حطيت فوم 3 ملى و قفلت و خبطت و لقيت الصوت قل بس لسه فى صوت تانى ههههههههه
المهم فكا ت تانى .و طلع الصوت جاى من سوستة اللى بتقفل و تفتح جراب النضاره .المهم حاولت اثبتها لانه جزء متحرك و هى اللى بتعمل اغلب الدوشه و الاصوات و الترزيع و التزييق و ربنا وفقنى انى احط فوم بسمك اقل من 1 ملى و قفلت و الصوت راح و لقيت صوت تانى بيجى من التخبيط بس مش من نفس المكان .
3- طلع من الشماسات و خصوصا االى بتاعه اللى جنب السواق .اللى هو الجزء اللى بيتفتح زياده لتطويل الشماسه و الجزء اللى بتلف عليه .و حطيت حتة فوم صغيره جدا او لزق دبل فيس و الصوت راح مع التخبيط بقوه

و لسه ناقص الجزر البلاستيك بتاع لمبة الاستوب اللى ورا الكنبه الخلفيه .هبقى افكه و احط فوم و بكده نبقى خلصنا على اى صوت تزييق او اى شىء داخل الكابينه .
تمام كده ؟؟
لا لسه
فاضل الجزء الخارجى
اللى صوت بييجى من المساعدين ترزيع فظيع لما تلبس نقره على سرعه .او مطب .
و دا صوت فقط مفيش منه قلق خالص
و حله انا زكرته فى موضوع سابق
و الصوت دا بيجى نتيجه ان الصداده الكوتش اللى بتبقى راكبة فى المساعد .بتخبط فى صاجه فوقيها لان فى مسافه ما بينهم و مع المطبات و الحفر بتلاقى الكوتشه تقوم نزله لتحت و هوب تطلع لفوق ترزع فى الصاجه و تعمل صوت الرزعه
و الحل هتحط حتة كوتشه زى الرينج كده زى الحلقه و تلزقها فى الصاجه اللى فوقيها .
و بس خلاص .
و الله اعلم
و السلام ختام
انتظروا موضوع مصور بالتفصيل
بس طبعا الافضل و تريحوا دماغكوا تروحوا لسروجى يفك فرش الباب و يحط فوم و خلاص او لزق دبل فيس .
انما الحوار بتاع المساعد ده يا اما تعمله فى ابو رواش او تعمله بنفسك و ترفع العربيه و تفك العجلتين الامامين و تشوف و تعمل استمبه على قدها و تنضف و تلزق
و بالهنا و الشفا