عندي مشكله في سخونة الكابوت ؟

المشكله عندي اني لما بكون عملت مشوار مثلا حتي ولو كان خفيف اما بجي احط ايدي علي الكابوت بحس انه سخن زياده شويه في حين بردو اني عربيات تانيه جربتها تقريبا نفس المسافه بلاقي انها عاديه والكابوت مش سخن زي عندي المهم اني دورة التبريد تمام ودرجة الحراره ثابته معايا تمام المهم ناس قالتلي مشكلة عزل وناس تانيه قالتلي عشان سير الكاتينه جنزير فمش عارف هل ده الطبيعي ولا ايه فاتمني من صقور نيسان اني اعرف حل للموضوع ده لاني خايف علي طبقة الدهان بتاعة الكابوت لحسن تتأثر من السخونه ولا حاجه ده غير اني لما اخلص مشواري واركن العربيه بحس اني فيه حاجه زي ما بتكون طقطقه متقطعه كده من قدام عند الكابوت بتقعد دقيقتين كده والصوت يختفي

كل اللى بتحكى عليه ده طبيعى جدا .. وواضح ان حضرتك قلبك ضعيف على العربية .. فجمد قلبك .. واتركها على الله عشان متتعبش من التركيز مع العربية

كل اللى بتقوله ده طبيعى سواء من سخونية .. او من طقطة بتسمعها لما بتركن ..

ودى مشاركة عشان الطقطقة وتتاكد
اخونا احمد كتبها لما قراء فى موضوعات فهرس نيسان .. وطلع الاجابة نقلا عن اعضاء اخرين

اقتباس:

---

المشاركة الأصلية كتبت بواسطة ahmedhawas

أولا الصوت ده طبيعي وميعتبرش مشكلة.
والصوت ده بالذات في اتنين فسروه تفسير مقنع (جدا):
1- لو الصوت ده من ناحية مانيفولد العادم (تحت العربية): يبأى العازل الحراري"heat shield" الألومنيوم اللي حوالينه وحول ماسورة العادم وهو بيفقد الحرارة بعد طفيان الموتور. وده زي ما قال م/حاتم فوزي.
وصاحب الموضوع هو أقدر واحد إنه يحدد مصدر الصوت من تحت ولا لأ.
2- كان في مشاركة لأستاذنا سبعاوي من زمان (بس مش فاكر موضوعها بالظبط) : كان بيقول ان ده صوت تفريغ البنزين من الرشاشات بعد طفيان الموتور مباشرة.

والله أعلم.

---

وزى ما قولتلك كل عربيتنا كدا .. حتى التيدا اللى معايا وفيها عازل كابوت بردوا بحس بسخونية فيها

متركزش .. وياريت لو حابب تعرف اكتر وحتركز يبقا .. ادخل على فهرس نيسان المثبت فى القسم عشان تقراء شوية موضوعات .. اكيد حتفيدك .. عشان متحسش ان فى مشكلة عندك .. وتقعد مخنوق لو محدش رد عليك

تحياتى ليك وبالتوفيق

شايفه رد مقنع

أوهاااااااااااااااااااااا ام ....... إنت معاك عربية زى الفل ......... ربنا يباركلك فيها

اقتباس:

---

المشاركة الأصلية كتبت بواسطة ahmed.tv

كل اللى بتحكى عليه ده طبيعى جدا .. وواضح ان حضرتك قلبك ضعيف على العربية .. فجمد قلبك ..

---

مش الفكره والله يا أحمد باشا بس اصلي تقدر تقول من الناس اللي بتحب تعالج المشكله وهي في بداياتها فحبيت اشوف هل هي ممكن تكون مشكله او حتي بوادر لمشكله ولا ايه واكيد طبعا مفيش حد افضل من صقور نيسان عشان اسألهم وطبعا ألف شكر لمشاركة حضرتك المفيده ولمجهوداتك الملحوظه في قسم نيسان

بالتوفيق

لا ابدا ولا يهمك .. ومفيش مشكلة ولا حاجة ..
ياريت لو فى اى جديد اسالنا .. بس المهم انك لازم تقرا فى القسم .. عشان تكون مطمئن .. لان حاجات بسيطة مش مشكلة .. ممكن تفتكرها مشكلة .. وكمان عشان تثقف نفسك .. وميحصلش اى تكرار للاسئلة القديمة طالما حضرتك بقيت صقر اصيل من صقور القسم

تحياتى بيك .. ونتمنى نتشرف بحضرتك فى اقرب مقابلة باذن الله

ياريت حضرتك تحدد نوع العربية صنى قديمة ولا جديدة وموديل كام بالظبط
السخونة دى ممكن تكون زيادة فى الموديلات اللى نازلة بدون عازل كبوت داخلى ..
وكده كده مش بتفرق فى اى حاجة ومش عارف ليه حضرتك مهتم تحط ايدك على الكبوت من برة طالما امبير الحرارة شغال كويس وقراياته مظبوطة والعربية كمان مفيهاش مشاكل !!!
ومن غير اى حاجة لو حضرتك راكن فى الشمس وفتحت الشباك وحطيت دراعك عليه ولمس صاج الباب هاتتلسع وافتكر ان المكان ده مش تحته موتور ولا حاجة ..
بالنسبة للطقطقة .. انا مع التفسير الاول المذكور باعلى ..