الموضوع: طريقة تغيير جميع لمبات رينو ميجان

السلام عليكم أصدقائى

لمبات الصالون فيه فى السقف كشافين نخلع الغطاء البلاستيك اللى عليهم هيتخلع بسهولة جدا هنلاقى فى كل كشاف 3 لمبات مقاس w5w بجنيه ونص الواحدة

لمبات فى الباب من تحت نفس الكلام فى كل باب فيه لمبة من تحت

تغيير لمبات الكشاف الخلفى
http://www.nilemotors.net/Nile/296774-a.html
سهل جدا برضه
تغيير لمبات ا لكشافات الأمامى أستاذنا أحمد عبد المقصود باشا عمل موضوع من زمان عن تغيير لمبة الزينون فى الكشاف الأمامى الشمال
http://www.nilemotors.net/Nile/53343-ii.html
أما عن باقى اللمبات أتحدث
الكشاف الأمامى فيه بالظبط أربع لمبات
لمبة صغيرة مقاس w5w فى أقصى يمين الفانوس يليها لمبة النور العالى مقاس h1 بس مش متأكد الصراحة
بعدها لمبة الزينون ودى بيبقى مقاسها واللله أعلم H7
آخر لمبة ع الشمال دى لمبة الإشارة لونها أصفر ودى مقاسها py21w
بالنسبة للمقاسات كل لمبة بيبقى مكنتوب عليها مقاسها عشان متقلفوش


الاستاذ أحمد فك اللمبة الزينون وليا ملاحظات عند فك اللمبة الزينون
متحاولش تجرب اللمبة بعد ما تغيرها وهى برا لازم تحطها فى مكانها وبعدين تجرب عشان نورها مبهر ويؤثر على الإبصار
اللمبة الزينون ترددها 4000_12000 khz دا اللى كان مكتوب على ورقة فى السلوك اللى رايحالها

اللمبة الزينون عند التشغيل بيمر بين طرفى موصليها تيار فرق جهده 20000 فولت وبعدين بينتظم على 85 فولت فإحذر ثم إحذر إنك تكون ناسى دراع النور منور
ولزيادة الأمان فك الطرف السالب للبطارية

لأ أنا بقولك لازم تفصل البطارية فى أى شغل كهرباء تعمله فى العربية

دلوقتى الأستاذ أحمد فك لينا اللمبة الزينون فى الكشاف الشمال
طبعا لو هتفكها أول مرة أو تانى مرة حتى عشان تتحكم كويس فك الكاوتش

طيب هل ينفع تفك لمبة تانى من الفانوس الشمال بالطريقة دى ؟؟؟؟
أيوة ينفع بس صعبة شوية وعايزة تقرب بوشك قوى وتحاول تشوف جمب الغطاء بتاع اللمبة الزينون فى أقصى الشمال هتلاقى غطاء ليه زى سن بلاستيك بتلفه عكس عقارب الساعة وبتشد اللمبة بتطلع معاك
طيب لو عايز تحكم أكتر وراحة أكتر لازم تفك الغطاء الفبر اللى هو لازق فى الرفرف ليه مسمارين أو تلاتة غير الجلد الكاوتش اللى مثبتاه بتفك المسامير الأول وتشده هيطلع معاك بس الجلد هتبقى متعبة شوية
حاولت أصورها يا أصدقاء لكن كانت مزنوقة دى صورة بس مش واضحة

فى الصورة دى أنا مشاور بالأسهم الحمراء دى على مكان لمبة الإشارة أقصى الشمال ياريت نبقى فاتحين الكبوت وإحنا شغالين وشايلين الغطاء الفبر اللى جمب البطارية عشان يدخل ضوء والعملية تمشى قشطة ومعلم فيها على الورقة اللى مكتوب عليها تعليمات اللمبة










تمام لحد كدا باقى لمبتين فى الفانوس الشمال اللمبة الصغيرة خالص ولمبة النور العالى
أزاى نفكهم ؟؟؟

المرة دى هنفك البطارية ونشيلها من مكانها مع مراعاة فك الطرف السالب أولا أربطه بكيس بلاستيك غطيه بأى حاجة عشان ميعملش مس وإنت بتفك الطرف الموجب


طبعا هنفك المسمار النجمة لازم يكون معانا المفكات النجمة رفيقنا العزيز الألمانى مش الصينى المعفن



شافين فى الصورة دى مكان إيدى بالظبط

هنلاقى الكاوتشة الجلد دى مستخبية قعدت أدور أجيبك منين يا لمبة أجيبك منين يا حلوة ؟ لحد ما لقيت المدخل دا

هنشيل الجلدة دى ليها زى حتة بلاستيك نشدها ونطلعها وعشان نسهل الكلام نشيل البتاع دا بتاع الهواء


دا منظر اللمبات بس الصورة مش واضحة طيب عشان نفك نعمل إيه
هيبقى فيه فيشة واصلة للمبة العالية نفكها أول حاجة
بعدين فيه كلبسة سوداء بنشدها لورا بيطلع معانا اللمبة الصغيرة وكذلك اللمبة اللى جمبها النور العالى
وبعدين نشيل اللمبة اللى عايزين نغيرها ونجيب البديلة و نركبها ونعمل العكس عشان نركب

ناخد بالنا كويس من الحتة دى الكاوتشة أو الجلدة ليها تصميم معين إزاى لما تيجى تخلعها بتشدها من الطرف بتاعها بتطلع معاك حلااااوة

طيب لما تيجى تركبها بتضغط عليها من ورا بحيث إنك تعكس شكلها شوفوا الصور هتفهموا عشان تعرف تركبها تانى يا سلام حتى الكاوتشة عاملين فيها شغل أنا عرفتها بالصدفة لأنها غلبتنى لما جيت أركبها

دى الصورة بعدا ما عكسناها


ولنا فى الحديث بقية عشان بابا صحى وعايز يقعد ع الفيس <<<<