الموضوع: تغيير أو تنظيف فلتر هواء الميجان

السلام عليكم ورحمة الله الموضوع سهل جدا وبسيط ومع ذلك أنا هعمله لأن فيه ناس ممكن تكون متعرفش برضه زى ما أنا كنت لسة شارى العربية كنت معرفش أفك فيها مسمار وكنت محتاج حاجة بسيطة زى دى تدلنى
الفلتر فى الميجان موجود ورا البطارية ليه مسمارين صليبة عادى وإنت بتفكهم هتحتاج مفك صليبة قصير أو طويل بس هتميله شوية وإنت بتفك

بعد ما تفك المسمارين دول هتسحب الفلتر لفوق بس بالراحة خالص وهقول ليه بالراحة ويستحسن تشده عليك لورا حاجة بسيطة



بعد كدا نطلع الفلتر نفسه من الغطاء البلاستيك الأسود


طبعا الفلتر أنا نظفته بالهواء المضغوط عند واحد بتاع كاوتش طبعا مرحتش بالعربية رحت مشى إوعى حد يمشى بالعربية والفلتر مخلوع
أنا نبهت فوق وقلت بالراحة على الفلتر
شايفين الحتت المتقطعة من الجلد ودى بتبقى هى العازل ومهمة جدا طبعا القطع دا مش منى من المالك السابق الواضح إنه بقاله زمن مغيرش الفلتر طبعا مش هقولكم على طريقة النفخ للتنظيف الفلتر ليه وشين وش بيدخل منه الهواء اللى هو متسخ جدا والوش التانى اللى فيه الجلدة المقطوعة دى النظيف اللى هوا بيدخل الهوا للموتور ننفخ من الجهة النظيفة وليس العكس وننفخ من الأجناب ماشاء الله طلع كمية هواء رهيبة كتر خير العربية للأسف ملقتش واحد زيه فى المنيا

فركبته تانى مع إنى خايف منه



الطريف والظريف فى الموضوع إنى لقيت طعمية من تحت فى العلبة اللى بيركب فيها الفلتر والمصيبة إنها فى الناحية التانية اللى مدخلة الهواء للموتور

ودى بتثبت حاجة مهمة فى الحياة إن الطعمية عندنا فى المنيا تقريبا بيقلوها بزيت سيارات مستهلك
عشان كدا أنا بقالى كتير قوى مكلتش طعمية ونفسى آكلها والله بس الصحة مش مساعدانى هههههههههههه

قعدت أتحاور مع كذا واحد إيه اللى يخلى طعمية تيجى فى المكان دا ؟ يعنى أتصل بصاحبها القديم مثلا ؟
المهم قلت كتر خيرك يا ميجان
صاحبها لما باعها كان وشه منور وسعيد جدا وحاسس إنه خلص من تهمة وسألته يا عمو وجيه هتشترى إيه ؟ قال لى قدامى حتة لانسر عجب
طيب غيرت ليه ؟ قال أصل أنا ركبت اسبرانزا 516 ولانسر كريستالة وبصراحة الميجان ضيقة عشان كدا هركب لانسر بومة لقطة وأنا طبعا عمرى ما امتلكت سيارة ملاكى وخبرتى فيهم ضعيفة فبلعت الكلام وسكتت برغم إنى برضه عارف إنه ألش زى ما بيقول الأستاذ محمد ممدوح ههههههههههه
سامحنى يا عمو وجيه يا خوفى يكون مشرف معانا فى المنتدى هههههههههه

نشوف بقى الصورة الأخيرة دى


أنا معلم على حتة مكتوب فيها بلد الصنع EU بلد إيه دى ؟ وهل دا فلتر أصلى ولا تحت السلم ؟
أصل أنا شفت الفلتر دا من شركة مان ألمانى