الموضوع: تيست درايف لسيات اكسيوا

SEAT Exeo Test Drive
تجربة قيادة سيات أكسيو

السلام عليكم و رحمة الله و بركاته
احبابي و اصدقائي و كل اللي بحبهم في قسم السيات علشان مبقاش نسيت حد
النهارده بفضل الله رحت توكيل سيات و عملت تيست درايف للعربية .. ماشاء الله العربية a1
و حبيت انقل لكم انطباعي في التيست درايف اللي عملته امبارح و مش عاوز اضيع عليكم متعة القصة من ساعة ما دخلت التوكيل لحد ما خرجت منه .

بصراحة الشركة المصنعة لماركة(سيات) فعلا زي ما قالي الاستاذ ايهاب منصور هي الجناح الرياضي لشركة فولكس فاجن و فعلاً هي قلبا و قالبا الجناح الرياضي .... انا عاوز كل واحد منكوا يتخيل معنى كلمة سيارة رياضية و يشوف ايه اللي يستمتع بيه لو امتلك سيارة رياضية و ايه اللي نفسوا يكون من امكانيات في السيارة دي .... ...

مقدمة رياضية هجومية

المصابيح الأمامية بأضاءة زينون

المصابيح الخلفية بأضاءة LED

انا من الوهلة الاولى اول ما دخلت من باب المعرض الرئيس لقيتهم حطين 3 اشكال بنفس الماكينة مع اختلاف في الاوبشن و زوائد خارجية .. مبهره جدا جدا بتحس ان شايف اسد على هيئة عربية باربع عجلات

سألت مسؤول المعرض : فين الفول اوبشن ... قالي كل الفول اوبشن مباع مافيش غير اللي في المعرض دي الوحيدة الفول اوبشن و تمنها تقريبا يا شباب بالمصري تقريباً 183000 الف جنيه .. تخيلوا لما مسؤول المعرض يقولك ان كل الفول اوبشن مباع !!!!!

الاتنين الاخرين واحده هاف اوبشن اللي هي من غير فتحة بالسقف و من غير حسسات التصادم و كان في كام ميزه كدا مش موجودين في الهاف اوبشن ... بس كل الاوبشن اللي مش موجود عبارة عن زوائد خارجية زي كساحات ... الخ .

العربية التالته و هي الواجن بمعنى ان الشنطه مدمجه مع الصالون بتكون اطول طبعاً و دي بتصلح للعائلات اكتر واخده نفس الطابع و الخطوط للسيارات السيدان وبنفس كماليات الفول اوبشن .
على فكرة انا عملتكوا البوم صور متصور من كاميرا الايفون معلش بقا الصورة لو مش واضحة اعذروني و باقي الصور التوضيحية هتكون من النت
نيجي بقا للمسائل الفنية و التقنية و ده الاهم :

المحرك

موتور العربية دي هو موتور الاودي a6 اربعة اسطوانات – TSI – 2000 سي سي – 16 صباب من نوع DOCH– الموتور ده بيولد قوة 200 حصان عند 6000 لفة في الدقيقة – السرعة القسوى 241 لكن عداد السرعات 280 - مركبين علي الموتور وحدة تربو مدمجة Turbocharged Fuel Stratified Injection

الموتور ده يا جماعة راكب بطريقة غريبة جدا...!!! هو طبعا نظام الحركة في FWD (الدفع الامامي) لكن الموتور مش راكب بالعرض كما هو متعارف ده راكب بالطول .. اكن العربية دفع خلفي علشان كدا انا صورت الموتور و اضفت صورة لنظام الحركة الغريب .... لا تعليق بصراحة .. قمة الابداع الالماني

المحرك 1

المحرك 2

المحرك 3

محرك سعة 2.0 لتر مزود بشاحن تربو

البطارية

وحدة شحن التربو المدمجة بالمحرك

انا سالت المسئول هل في مكاين اعلى من كده رد و قالي انه التوكيل هنا ما بيجبش غير ال 2000 سي سي لكن فيه طبعاً مواتير بتتصنع في بلدها اعلى بمواصفات خاصة .... المواتير المتاحة هي كالاتي : نوع واحد من المواتير سعة 1600 CC و في ثلاثة انواع سعة 1800 CC و في نوعين من سعة 2000 سي سي و ده بالنسبة للمواتير البنزين

بالنسبة لمواتير الديزل TDI مابينزلش غير المواتير 2000 CC و ده طبعا لان المواتير الديزل معقدة جدا و مكلفة جدا مبينزلش منها غير المكاين الكبيرة ..... في السعودية العربيات الديزل موجوده و بكثرة انا شوفت على الانترنت عربيات سيات كتير ليون و توليدوا TDI معروضه للبيع ... ده للعلم فقط

ناقل الحركة

الجير بوكس او ناقل الحركة هو من نظام DSG ذو 7 سرعات متتالية بدون الغيار R – بالاضافة الى نظام الفرامل المتطور ABS و نظام TCS (TRACTION CONTORL SYSTEM) مانع التزحلق و مدمج معاه تكنولجيا استشعار الثبات ESP (Electronic Stability Program) و ده تقدر تتحكم فيه بطريقة منفصلة و مكان تقدر تتحكم في مانع التزحلق بطريقة منفصلة .

اللي هعلق عليه ان الكبالن الداخلية هي عبارة عن آلة جرة منفصلة متصلة يعني تحس ان الجير منفصل تمام عن الات الجر .

آلات الجر

الثبات والتحكم

عربية رياضية من الدرجة الاولى ثابته جدا وزنها 1700 كيلو جرام تكنولجيا الثبات المدمجة (TCS – ESP)

بيخلوها تتمتع باعلى درجات الثبات و خصوصاً ان الفول اوبشن منها فيها نظام التحكم بالسرعات من عجلة القيادة انا بصراحة عملت بيها اكروبات بمعنى الكلمة اخدتلي كام غرزة كدا على كام ملف على 130 و 150 كانت مكلبشة في الارض اكنك مثبتها على الاسفلت بمسامير .

التقفيل والعزل

العربية راكب فيها ازاز ذو طبقتين كاتم للصوت و العربية بالكامل متقفلة ب (RUBER) بحيث انك استحالة تسمع اي ضوضاء او تسمع حتى اي مؤثرات خارجية غير طبعاً صوت الكلاكسات اللي حواليك و لكن بنسبة ضعيفة الى حد ما ....
الخامات اللي راكبه في الصاولون و المقصورة الامامية كلها لا تقل كفائة عن العربيات ذات التكلفة العالية و الاداء الراقي كما في السيارت على سبيل المثال وليس الحصر (BMW - مرسيدس ) فرش الابواب من الفايبر الراقي و الجلد قيس على كدا فرش الابواب ، اما كراسي الركاب في بعض السيارات من الجلد و سيارات تانية من المخمل على حسب مواصفات السيارة عند الشراء بالاضافة الى ان و حدة التوجية (الدركسيون) مكسوة بالجلد .. قمة في الاناقة و الروعة .

صالون وطابلوه وفرش أبواب عالي الجودة

الميزات الأضافية والتجهيزات

1- مرايات جانبية كهربية قابله للطي من الداخل عن طريق مفتاح تحكم شامل بالاضافة الى مراية الصالون و المبينة الخلفية فيها نظام مانع الانعكاسات الاتوماتيكي .
2- وحده تحكم في الموجه (الدركسيون) MULTI FUNCTION للتحكم في عدداد الرحلات و التحكم بالنظام السمعي ضيف على ذلك نظام ربط التليفون المحمول (BLUTOOTH) و بتقدر تتحكم فيه من ايضاً من الدركسيون .
3- و حده تحكم بالسرعات او بناقل الحركة ايضا عن طريقة الدركسيون .
4- بعض السيارات فيها نظام ملاحة كامل بالاضافة الى قياس الارتفاعات و مستوى الميل .
5- ناقل حرة اوتوماتيك في عصا التحكم بناقل الحركة بالاضافة الى امكانية التحويل من اوتو الى TIPTRONIC مضاف اليه الخطوه ذات القياده الرياضية SPORT DRIVE .
6- فتحة SUN ROF في السيارات (FULL OPTION) فقط ذات التحكم الكامل بجميع الاوضاع عن طريق الخطواط بمعنى انك ممكن تفتح الفتحة ربعها او نصها او كاملة .
7- التحكم بانظمة الثبات و الانزلاق تحكم كامل عن طريق المفاتيح الخاصة بها داخل المقصورة .
8- حساسات استشعار للتصادم اماميه و خلفية .
9- نظام سمعي مكون من اربع سماعات بالابواب ذات التجسيم السمعي المتطور .
10-التحكم في التكيف في منطقتين منفصلتين للركاب في الامام فقط .
11- 6 وسائد هوائية موزع في المقصورة الامامية و الكراسي الامامية على الجانبين و في القوائم الخلفية للركاب في الخلف .
12- مثبت سرعة .
13- التحكم الكامل باوضاع الكراسي الامامية كهربائيا .
14- نظام استشعار لتشغيل مساحات الزجاج الامامي اوتوماتيكيا عند هطول الامطار .
15- نظام استشعار لضغط الهواء في الاطارات بالكامل .
16- امكانية توصيل الاجهزة السمعية المتنقلة عن طريق كيبل (ِaux) بالاضافة الى كيبل توصيل IPOD.
17- اضاءة المصابيح الامامية زينون اما المصابيح الخلفية هي من نوعية LED .

فتحات تهوية محاطة بالنيكل كروم

مرآة خلفية بخاصية التعتيم الألي

أضاءة داخلية للسائق والراكب الأمامي

مقبض ناقل الحركة وفرامل اليد والولاعة

عجلة القيادة متعددة الوظائف (تحكم في مستوي صوت النظام الصوتي المتطور وكمبيوتر الرحلات)

ذراع التحكم في ناقل الحركة (Shift paddles)

طابلوه مطعم بخشب الأبانوس ومفتاح التحكم في الأضاءة الأمامية

لوحة العدادات والمبينات وكمبيوتر الرحلات

نظام سيات الصوتي المتطور ووحدة التحكم في المناخ المزدوج للسائق والراكب الأمامي

القياسات والأبعاد

نيجي بقا للمساحات و مقسات العربية : وحدة القياس (mm)
- الطول 4661 – العرض 1772 – الارتفاع 1430 – الوزن 1700 كيلو جرام .
- قاعدة العجلات 2642 .
- المسافة بين قاعدة العجلات الامامية 1522 و الخلفية 1523 .
- سعة خزان الوقود 70 لتر .
- قياس العجلات الالومنيوم بالبوصات 17 انش.
- طبعا مننساش ان الواجن بيفرق في الطول لان الصالون مدمج مع المسافة بين نهاية السيارة من الخلف و مقصورة الركاب .
- طبعا الكراسي الخلفية مريحه للغاية بحيث ان الراكب بيحس بالمسافة بين الراكب الامامي و بين المقاعد الخلفية بالاضافة الى مخدع بين الركاب بالخلف مزود ب حامل اكواب .
عداد الرحلات و التحكم في حركة السيارة .
- بامكان السائق عمل مخطط كامل للرحلات من حيث المسافات المقطوعة و استخدام عددات استهلاك الوقود و عدادات الصيانة القريب .
- حساب اوتوماتيكي لمعرفة المتبقي من الوقود مع حساب المسافة الذي يقتعها الوقود المتبقي .
- مبين اعطال كامل للمحرك و مبين امان للابواب و الوسائد الهوائية مع امكانية التحكم بفتح او غلق عمل الوسائد الهوائية .
- امكانية وضع سلة علوية للاستفادة من عدد اكبر من الامتعة .
- تحكم اوتوماتيكي كامل لثبات السيارة و الانزلاق على الطريق مع اعطاء الاشارة الموضحة على مبين الاعطال في اللحظة التي تم عمل معالجه لهذا الانزلاق مع امكانية فصل و تشغيل هذه الامكانيات بالمفاتيح الخاصة بوحده التحكم بجانب السائق .

و بكدا اكون تقريبا قفلت الموضوع و يارب اكون قدرت الم جميع جوانب الموضوع بالكامل .
على فكرة يا جماع الفيديوهين اللي هضيفهم في الموضوع يارب يكونوا كويسين ، على فكرة هتلاقوا صوت وش عالي اوي ده كان المكيف شغال على اعلى سرعة انا عارف ان في ناس هتتريق عليا لاني مكنتش عارف اتكلم اوي بس اهو منظر حي و على الطبيعة للعربية الجبارة دي .
اشكركم جميعاً و ان شاء الله نعمل تيست درايف جديد لعربية جديدة من المجموعة الالمانية الطابع الاسبانية الصنع مجموعة سيات
سلام الله عليكم و رحمته و بركاته

تم التنسيق ودمج المشاركات
بواسطة منسق القسم

المشاركة الأصلية كتبت بواسطة ehab_mansour

تقرير اكثر من رائع و طبعا سيارة لا غبار عليها و انا مش محتاج امدح في سيات لأني اعلم قيمتها جيدا

ياباشا انت فعلاً سيد العارفين عن السيات و شكرا على تقييمك ، بصراحة بعد الفضل من الله كان ليك الفضل في معرفة كل ما يخص مجموعة شركات فولكس .