سؤال للخبراء فى بيع و شراء المستعمل

**hello_world** · 29-06-2008 10:45 PM

السلام عليكم يا جماعة، انا اسف على انى بكرر الموضوع بس واضح انى حطيطه فى مكان مش مناسب ( منتدى البيع و الشراء ) فقلت احطه فى الاجتماعى عشان النشاط فيه اكتر، انا عندى سؤال محيرنى فى موضوع بيع العربيات المستعملة،

انا دلوقتى لو بعت عربيتى و اللى اشترى اخد الرخصة بتاعتى و مشى بيها طالما لسة سارية، لو الراجل لا قدر الله عمل حادثة و لا اى مشكلة، هل ده يحملنى اى مسئولية عشان الرخصة باسمى، و خصوصا بعد ما قانون المرور الجديد كمان يبتدى يدخل حيز التنفيذ،

يا ريت يا جماعة اللى عنده فكرة عن الحكاية دية يقول و يطمنى.

**banboty** · 29-06-2008 11:11 PM

لو المشترى لا قدر الله عمل حادثة مثلا و جرى بالعربية من غير اما يتمسك ... و حد كتب ارقام السيارة

فاكيد هيجيبوا بيانات مالك العربية من المرور اللى هيكون حضرتك ...

و لكن هتثبت امام الشرطة او النيابة انك بعت العربية بموجب عقد بيع ابتدائي وتوكيل اللى هيبان فيه انك بعت السيارة لفلان الفلانى
و هياخدوا منك وقتها و بس صورة من العقد الابتدائى و صورة من توكيل البيع و بيانات المالك الجديد . و تخلي مسئوليتك .

* اما اذا اتمسك مكان الحادثة , فخلاص كده كده , هيمسكوه و يشيل الليلة و تنتهى المشكلة .

علشان كده لازم تحتفظ بعقد البيع الابتدائى و التوكيل و تشيلهم في عينك و للابد ... لان ممكن كمان العربية تتباع لكذا واحد اذا كان التوكيل مفتوح و ممكن واحد فيهم يعمل حاجة و تيجي فيك برضوا ... عشان كده تحتفظ بيهم و تشليهم لانهم حاجة مهمة جدا ...

و انصح الاخوة اللى هيبيعوا عربياتهم بعمل توكيل مقفول و تكون فيه صيغة ( البيع للنفس و للغير فقط و التعامل مع المرور ) و بكده تضمن انه لن يستطيع توكيل غيره و كمان اول اما تخلص مدة الرخصة هيكون مضطر انه ينقل ملكيتها لنفسه .. و لا يسمح له بتجديدها باسمك مرة تانى

الا اذا كان معمول له توكيل مفتوح و صيغته ( البيع للنفس و للغير و توكيل الغير و التجديد و الترخيص مع المرور ) ...

**Akram** · 30-06-2008 06:38 AM

فيه نقطة تانية : انك لما تبيع بعقد مسجل و تكون الرخصة سارية و اللي اشترى العربية منقلهاش بأسمه ,
و لما انت تيجي تشتري عربية تانية هتدفع ضريبة إضافية على العربية الجديدة اسمها ضريبة رفاهية و ده لأنهم هيلاقوا ان فيه عربية تانية بأسمك (اللي انت بعتها) و علشان تثبت انك بعتها لازم يكون معاك صورة من العقد المسجل و بتقدمها مع أوراق العربية الجديدة فبالتالي المرور يشيل ضريبة الرفاهية .

**tutankhamoun** · 30-06-2008 08:14 AM

لازم المشتري يكتب إقرار أنه مسئول مسئول كاملة عن السيارة من التاريخ الفلاني ( تاريخ الشراء )
و تكون السيارة و ما ينتج عن قيادتها من مسئولية المشري الجديد
و ما ينتج من أي مخالفات ......... أو حوادث ........... أو أي شئ ناتج عن إستخدامه للسيارة

و بعدين المشتري يمضي و تضع تاريخ و ساعة الشراء
............ و تأخد أنت الأصل
ده اللي المفروض يتعمل
علشان تكون أنت في السليم ............ و تقع المسئولية كاملة على المشتري الجديد

و ده برضه مش بيعفيك من وجع الدماغ
لأن لا قدر الله لو حصل حاجة
هاتروح القسم ............... بس هاتطلع بسرعة بعد ما توريهم الإقرار

و السلام عليكم