الموضوع: لانسر 2008 بومة ولا هيونداى النترا 2008 -2009

بص حضرتك انتا هتدفع فلوس مش قليلة وأكيد انتا تعبان فيها ,, فبأمانة بأمانة بأمانة : (( البوما 2008 ))

النترا خليجي...افضل

لانسر بومه
1-سوقها ماشي الله ينور ومبتخسرش
2-التقفيل طبعا احسن
3-الثبات فوق الوصف ومن غير ما تجيب جنوط مبالك لو مجنط او عامل اي تعديل
مثال:امبارح والدي كنا راجعي من فرح الساعه 2 بليل الطريق الصحراوي ماشي على 170-150 طول ما في فرصه ياخد سرعه والعربيه مبتقلش لا وكنا 4 افراد كمان والعربيه الجنط الاصلي بتاعها زي ما بتيجي كدا
4-الي بيقلك الخليجي احسن من العادي وبيجي اقوى فعلى حد علمي ومن كلام ناس كتيير الخليجي مبيفرقش غير في حاجه واحده بس الدهان لانه هناك الجو حر جدا والبيئه صحراويه وبالتالي طبقه الدهان بتكون اقوى
5-اللانسر يباني يعني جوده الصناعه اما الالنترا فهيا كوري ولاكن مش معناه انها سيئه ولاكن ساعات بيكون مش قد كدا
6- مش هقول الالنترا وحشه لا طبعا زي الفل ولاكن اللانسر تتفوق عليها (وجه نظر متواضعه)
7-من عيوب اللانسر انها مفهاش كماليات ودلع
8-السوند سيستم بتاعها مش وحش كفايه انها بتنزل معظمها بكاسيتات بايونير وطبعا ده غني عن المعرفه والشرح يعني لو ركبت بس جوز سماعات بدل الفبريكه هتلاقي الي يعجبك الا لو انتا من هواه المزيكا ف في كلا الحالات سواء لانسر او النترا فهتجيب حاجه خاصه يعني هتعمل سيستمك بنفسك بالنسبه للانترا معنديش فكره
9-لو اوتوماتيك فاللانسر الاوتو بيفتح بسرعه مع ان العربيه تقيله وطبعا تقل العربيه بيدي ثبات
10-وسائل الامان موجوده في كل الفئات عكس الالنترا اعلى فئتين بس هوا الي بيتوافر فيها كل الفئات
11-اللانسر عفشتها سبور على حد علمي والله اعلم لان اللانسر الاسبورت عفشتها هيا هيا الكلاسيك وهيا هيا الهاف سبورت وتقريبا قبل 2010 اسمها سبور اكشن او العكس
12-هتفرق معاك الفئه من نحيه الجنوط والسبويلر وفتحه السقف والطاره الجلد ذات الصنع اليدوي وطبعا مش هقول الطاره الجلد والحاجات ده انا بالنسبالي شكلها شيك قوي قوي قوي

نيجي الالنترا:
1-العربيه شكلها لزيز
2-من جوه العربيه الطابلوه بتاعها شكلو شيك جدا وغايه في الاناقه
3-تقفيل الطابلوه اقل من اللانسر طبعا
4-السوق بتاعها ماشي لاكن مفيش مقارنه بين سوق اللانسر والالنترا
5-في اراء متعدده في موضوع الثبات وده من خلال قرايتي للمواضيع ان الثبات بتعها عالي لاكن اقل من للانسر واتمنى الاعضاء يخشوا يزودونا بالمعلومات الكافيه
6-طبعا العربيه كوري وده مش معناه انها تعبانه ولاكن عيب الكوري انه مثلا من وسط 1000 عربيه ممكن تلاقي 100-150 حصل فيهم مشاكل وده بيقلل سمعه الكوري
7-في الاوتوماتيك بيقولو الكوري وحش ومشاكله كتير برضو كلام بسمعه والله اعلم
ده على حد معرفتي

وال حل الي يريحك من وجع الدماغ هيا انك تجرب ده وتجرب ده بسي المهم يكون حالتهم حلوه الي اتنين وتحكم بنفسك علشان الحيره لان طبعا الاراء متفاوته

وجه نظر شخصيه:احب الالنترا كشكل داخلي واناقه في الطابلوه واداء جميل جدا وتقريبا من انجح عربيات هيونداي
احب اللانسر لجوده الخامات جوده التقفيل الاداء الممتاز وسوق البيع المستمر وطبعا معمره وده مفيش فيه كلام الا لو واحد بيجيب اجل عربيته بنفسه عكس العربيات الكوري صحيح قويه لاكن مشفتش عربيه بتعيش زي اليباني والالماني بشكل عام

قطع الغيار في اللانسر رخيصه بالنسبه للياباني بالنسبه للانترا بنفسها معنديش فكره

وبالتوفيق وبرضو حسب امكانيات حضرتك وفي الاول وفي الاخر المهم الراحه النفسيه مش اكتر انتا جرب الي اتنين واحكم راحتك فين واتكل على الله بغض النظر عن التقارير وبرضه حسب امكانيات حضرتك الماديه ممكن تجيب لانسر قديم ووممكن تجيب لانسر جديد ونفس النظام للانترا