فرامل صنى 2013 - ارفع القبعة لنيسان
اخوانى الاعزاء
بعد ان لاحظت الهجوم من "العوازل" و بعض الاخوة هنا فى المنتدى على السيارة الجديدة
و فى اللى بيقول لك شكلها مش عارف ايه و فيها مش عارف ايه
و احدهم قال ان فراملها مش كويسه ( ال abs بتاعها ضعيف)
فحبيت انى اشارككم التجربة اللى حصلت معى من يومين
كنت ماشى و باجرى على 80 او 90 فى شارع الحجاز ( مصر الجديدة امام حديقة الميريلاند)
و كنت فى الحارة السريعة اقصى اليسار
واذ فجاتا سائق تاكسيى راكن جنب الرصيف فى اقصى اليمين بجانب الرصيف طلع و قطع الشارع بالعرض
فجاة كده بدون اشارة و بدون اى حاجة ولا كان الشارع ده فى ناس ماشية فيه
و وجدت انى لابس فيه لابس فيه
( حدث لى نفس الموقف زمان مع ال 504 و كان حادث مدمر ربنا ما يحكم على حد ابدا)
ضغط فرامل و انا مقتنع تماما انى لابس لابس
الظريف ان :
1- فى خلال ثانية انخفضت سرعة العربية الى حوالى 30
2- العربية زحفت و ظهرها عام حاجة بسيطة لجزء من الثانية لدرجة انى حسيت انى هافقد السيطرة ( الكاوتش الماكسس مش كويس)
3- فى الجزء من الثانية -اللى كان فاضل بعد الجزء الاولانى- العربية اتعدلت تانى و استعدت السيطرة ( شكل ال abs كان اشتغل)
4- رفعت رجلى من على الفرامل لان العربية كان خلاص سرعتها اصبحت بتاع 10 و انا لسه على بعد 3 امتار من التاكسى
5- دخل صاحبنا اليو ترن بسلام و انا باصص على الفوانيس عنده و تاكدت انه مش مدى اى اشارات
( و سببته بالكلاكس)
6- دوست بنزين تانى و انا اعصابى شبه سايبه و مش مصدق ان فعلا ما حصلش اى شيء و العربية اسعفتنى
7- حمدت ربنا على ستره و على انى اخترت هذه السيارة المحترمة ( عليت فى نظرى اكثر و اكثر بعد ما انقزتنى)
و صدق اللى قال اللى شاف غير اللى ما شافش
