ايه حكايت الجثث الي في كتوبر دي !

الموضوع ليس لاثارة الفزع ولكن بسئل يمكن حد يعرف !
من اسبوعين. رايح على اكتوبر عند مدان جهينة لقيت عربية اتاري. اوبترا كحلي بوكس مولعه اللمض الزرقة ولان الاشارة فتحت بصينا بصه سريعه لقينا جثت واحد مرمية ومغطينها بالجرايد !!!

النهردة يوم الجمعة ماشي يادوبك طالعين نشم هوى ونتفسح انا واسرتي بصيت لقيت زحمة شوية شباب متلمين بالضبط بالضبط عند المالكي بتاع المهلبية انا قلت دي اكيد خناقه بس الي معايا اكدوا ان في واحد مرمي على الارض وفي دم وانا لسه بقولهم لا لا انتو بيتهيئلكم وتلاقيها خناقه علشان ميحطوش في نفسيتهم ومفيش ١٠٠ متر وصلت عند اشارة ميدان ماجدة بصيت لقيت عسكري واقف جمبيه اربع شباب صغير وراجل عجوز. مرمي على الارض في نص الشارع وسايح بدموا وبرغم خبرتي المتواضعه. انا مش قادر افسرها. وقلت معقول تكون عربية خبطت واحد عند المالكي للالبان وبعدين اتجنن وجاتلوا حالت هسترية ومشي لقى الراجل العجوز في سكتو كمل عليه ....

بصراحة فكرت على السريع ياترى في عندي بطانية او ورق جرايد في شنطة العربية بس افتكرت انو مفيش .... حتى خطر ببالي فكرة اني اروح بسرعه اشتري جرنال من اول الشارع وارجع واغطيه بس المشكلة ان معايا اطفال ومش عاوزهم يتفرجوا ودول ما يصدقوا هتلاقيهم يفتحوا باب العربية ويجروا ورايا

بس المشكلة ورق جرايد ايه وزفت ايه .... ايه القرف الي احنا فيه .... ده انا نفسي مش متخيل اني لومت ولا خبطتني عربية يغطوني بورق جرايد كاني قطه داستها عربية وتصرف غير ادمي بالمره ومفيش ذرة. احترام لادمية الانسان. فين عربيات الشرطة فين عربيات الاسعاف !!

ده. لو كانت الحادثة دي حصلت في السعودية كانت اتقلبت الدنيا لحد ما يقبضوا على الفاعل .... مش هنا كل واد يخبط حد يشمع الفتلة ويجري .... ولا هو علشان الانسان ليه ديه وليه تمن في السعودية وهنا الانسان ملهوش اي دية ولا ليه اي تمن

ربنا يسترها علينا يا رب
احسن تصرف عملتة حضرتك انك منزلتش عشان الاطفال
علي فكرة الظاهرة دي مش في اكتوبر بس
دي حصلت قدام عيني في الدائري وفي الهرم
فعلا حاجة غير ادمية
كل اللي علينا نقول يا رب
والحمدلله البلد كل يوم في الاحسن
وان شاء الله عن قريب نبقي احسن من اي دولة تانية ونهتم بالادمية

متاخدش في نفسك في السعوديه ولا في مصر كله محصل بعضه ودي صوره في السعوديه والادهي انها بجوار صندوق الزباله

تم حذف الصورة لعدم ملائمتها للعرض على المنتدى
م ع 3

ياااااااارب
عارف يابيدوا يا اخويا .... بجد ببقى حاطط ايدي على قلبي وانا سايق عربيتي ولا لمن اعرف ان عيل من العيال بره البيت .... عارف حتى حادثة العربية لو معاك المدام ولا ولدتك او اختك وتلاقي الناس متلميين وواقفين يتفرجوا عليك كانك نسناس واقف. في القفص او كانك حاوي والناس واقفه تتفرج عليك. .... قد ايه ياعزيزي شعور صعب جداً

بس الاصعب تصور اني الاقي حد من قرايبي ( بعد الشر ) سايح بدموا على الاسفلت وسط الطريق ومغطينوا. بجرايد ، ياااااه قد ايه صعبه على النفس انا معاك ان الشرطة اليومين دول قايمة بواجبها على اكمل وجه بس مش كفاية ضروري يكون واقف ضابط مع العساكر الغلابة دول او حتى نديهم لاسيلكي في ايديهم ، لان العساكر في الاول والاخير شوية شباب او شوية اطفال مكملوش ٢٠ او ١٩ سنة مش عارف بس شكلهم يدي على كده فضروري يكون راجل كبير في وسطيهم يكون متعلم وفاهم .

ونقطة تانية : الشباب الصغير اخوتنا الي فرحانين بعربياتهم احب اوجهلهم رسالة. بلاش بلاش يا اخواتي السرعه بلاش يا ابنائي السرعه. الفترة دي بلاحظ شباب فاكرين ان البلد سايبه. وبيسوقوا بطريقه هبلية. ياريتها احترافيه لا بيسوقوا بهبل عاوز اقولهم لو فكرت ان اخوك الصغير الي لسه بيبي بيلعب في الشارع وجري كده ولا كده. وشوفتوا قدامك هل هتلحق تدوس فرامل. معتقدش بس هتقدر ياترى تدوس اخوك الصغير اطفال كتير ياشباب. بتفلت ايد مامتهم ويجرووا كده وكده. .... ناس كبيرة في السن ياشباب مش قادر تعدي الشارع ويادوبك رجليه شيلاه ناس كتيرررررر ياشباب. بتمشي سرحانه عندهم عيال وزوجة واطفال وقاعدين بيفكروا. هيئكلوهم ازاي وهيصرفوا عليهم منين وسرحانين في مشاكلهم. وفي النهاية يجي شب بعربية حديثة يقوم يدوسوا بمنتهى البساطة ويريحوا من كل مشاكلوا وهموموا انا عارف انك ريحتوا من هم الحياة بس مين هيريح اهلوا ومراتوا وعيالوا. ولاهتدسهم هما كمان .

مش عاوز اقولك. يابيدو يا عزيزي انا حتى اليومين دول بقيت الاقي اطفال عندهم ١٣ سنة بيسوقوا عربيات ووخدين صحابهم معاهم في المدرسة وقاعدين يلفوا بعربيات حديثة موتسيكلات. وتكاتيك وميكروبصات اطفال الي سايقنها حتى التكاسي النهردة سواق التكسي يعيا. يجي ابنوا يقوم واخد العربية التكس بتاعت ولدوا ويقول انزل اشتغل عليها بجد ربنا يرحمنا برحمتوا الواسعه

اقتباس:

---

المشاركة الأصلية كتبت بواسطة naser_56

متاخدش في نفسك في السعوديه ولا في مصر كله محصل بعضه ودي صوره في السعوديه والادهي انها بجوار صندوق الزباله

---

اشكرك يا عزيزي على مشاركتك. .... وانا لم انكر وجود مثل تلك الحوادث في العالم كلوا بس انا بقول حاجة لمستها ان الشرطة في السعودية بتتحرك بسرعه بخلاف عندنا.
اخطر رئيس مباحث قسم مش عارف ايه وقام باخطار السيد المعاون والسيد المعاون قرر التحرك مع وكيل المباحث واخذ معه ملازم اول سين سين عين. وقاموا على الفور باخذ قوة. والانتقال لمكان الحادث. بعد ان جائهم البلاغ. وقاموا بالتوجه لمكان الحادث وكلمة على الفور دي معناها اربع خمس سعات يعني يكون الجاني روح بيتهم غسل عربيتوا واتشطف واتغدى ونام .... بعكس الشرطة السعودية الي العساكر عندهم كل اتنين في عربية مجهزة بالاسلكي والسلاح ومنتشرين في كل الشوارع وبشكل دوريات منتظمة ( مش زي عندنا الي عربيت الاتاري لو لقيت خناقه ) تقول ياعمي ملناش دعوه محدش بلغ . ... ده غير الكميرات الي في الطرق والاشارات .... طب بلاش دي

موقف حصل معايا شخصياً وقدام عيني لشخص في الهرم بعتنا جبنالوا عربية اسعاف قالك جاتلو حاجة في القلب طيب اتصرفوا. قالك ممعناش جهاز صاعق القلب وعلى فكرة ياباشا ده ماااااااات .... يا دكتور مات ايه اتصرف يادكتور نفس صناعي انبوبة اكسجين اديلوا ابره اتصرف انا هعلمكم شغلكم. بس اكتشفت ان حتى سواقين الاسعاف مش كلهم عربيتهم مجهزة انما و ميكروباص لنقل المرضى ... فليه الاهمال في حياة وامن الانسان. ليه

ما هي دي المشكله التعنت في الاجراءات ولابد من حضور المباحث الجنائيه وووووو وطبعا في الحالات الي ذي كده محدش يقدر يتصرف ولا حتي يلمس الجثه

للآسف ... أحنا رخاص حتى على نفسنا .

الشعب نفسه مرخص نفسه بنفسه .... محدش يقول السعودية و برة و جوة يا أخواني .

أحنا بنسوق و لا كأننا على حلبات سباق .
الاشارة حمراء و تلاقي البعيد أبن البعيد جاي طيارة و كاسرها خصوصا في اشارة ماجدة في أكتوبر و كمان عليها مطبات .
تلاقي الناس فرملت فجاءة و رجعت بظهرها عادي جدا علشان فوت يو ترن !!!
تلاقي الترلا ماشية جامبك طيارة ...... أنت ماشي 90 و ده بيعيدك بسرعة مهولة و كمان بيرقص مع الترلا بتاعته على الطريق و يلوشك بظهر الترلا اللي بترقص من السرعة .

يا عمي
الله يرحمنا بقا .

و لا الأهالي اللي بتدي العربيات ليعيالها اللي لسة مكملوش 15 سنة .
و لا الاب اللي يشتري لأبنه الحدث (جاري أبنه مكملش 15 سنة ) و أبوة المبجل شاريله موتوسيكل هوندا يلعب به !!!!!

اقتباس:

---

المشاركة الأصلية كتبت بواسطة naser_56

ما هي دي المشكله التعنت في الاجراءات ولابد من حضور المباحث الجنائيه وووووو وطبعا في الحالات الي ذي كده محدش يقدر يتصرف ولا حتي يلمس الجثه

---

اده اده اده يا ناصر يعني انا لو نزلت وشلت الجثه على جنب ممكن تبقى في مسؤولية علي ... اصل انا كزا مره ببقى عاوز انزل اشيل اي جثة مرميه في الطريق والناس واقفه حوليها تتفرج امووووت واعرف بيتفرجوا على ايه. ، ومن طثافة الزحمه مبقدرش. اعمل كده

بس الي باستغربلوا انوا لو مصاب وعضمو متفتفت تلاقي الناس كلهم شالوه وملخوه ومخمضوه ودوخوه. وفي النهايه يجبولوا كوبايت ميه ويقولوا انتا كويس مع ان المفروض ميتحركش خالص غير لمن يجي المسعفين علشان يشلوه بعنايه ( حتى في حوادث العربيات ). المفروض لو السواق او الركاب مصابين محدش يحركهم لغايت ماتيجي الاسعاف مش كل واحد يشد فيه شوية. !!!؟

اقتباس:

---

المشاركة الأصلية كتبت بواسطة tutankhamoun

للآسف ... أحنا رخاص حتى على نفسنا .

الشعب نفسه مرخص نفسه بنفسه .... محدش يقول السعودية و برة و جوة يا أخواني .

أحنا بنسوق و لا كأننا على حلبات سباق .
الاشارة حمراء و تلاقي البعيد أبن البعيد جاي طيارة و كاسرها خصوصا في اشارة ماجدة في أكتوبر و كمان عليها مطبات .
تلاقي الناس فرملت فجاءة و رجعت بظهرها عادي جدا علشان فوت يو ترن !!!
تلاقي الترلا ماشية جامبك طيارة ...... أنت ماشي 90 و ده بيعيدك بسرعة مهولة و كمان بيرقص مع الترلا بتاعته على الطريق و يلوشك بظهر الترلا اللي بترقص من السرعة .

يا عمي
الله يرحمنا بقا .

و لا الأهالي اللي بتدي العربيات ليعيالها اللي لسة مكملوش 15 سنة .
و لا الاب اللي يشتري لأبنه الحدث (جاري أبنه مكملش 15 سنة ) و أبوة المبجل شاريله موتوسيكل هوندا يلعب به !!!!!

---

اه واللهِ ياتوت يا عزيزي فعلاً التريلات دي لوحدها قضية تانية. لسه زميل لينا في قسم اللوجن عربيتو جديدة ياعني اتفشفشت من قدام علشان نقلت خشب وقعت على عربيتو وهو راكب فيها والتريلة قداموا وقول الحمدالله هو محصلهوش حاجة .... مع انك تشوف منظر عربيتوا الجديد تبقى هتتشل يا اخي حسبي الله ونعم الوكيل فيهم

لا طبعا ماتقدرش تيجي ناحيه اي جثه وبالاخص في الحوادث الجنائيه ده انته كده تلبس مصيبه رسمي

مينفعش حد يلمس اي جثه لو في حادثه لو مات في ساعتها عشان لازم تيجي النيابه او الجنيايات تعاين عشان تشوف حادث عادي ولا فيها شبهه جنائيه ودي في اي مكان في الدنيا علي حد علمي وياما شفت جثث بتبقي في نص الطريق وبالعرض مش حتي علي جنب بس لازم تفضل مكانها لحد ماالمباحث تيجي وتشيلها

اقتباس:

---

المشاركة الأصلية كتبت بواسطة Y a r i s

ياااااااارب
عارف يابيدوا يا اخويا .... بجد ببقى حاطط ايدي على قلبي وانا سايق عربيتي ولا لمن اعرف ان عيل من العيال بره البيت .... عارف حتى حادثة العربية لو معاك المدام ولا ولدتك او اختك وتلاقي الناس متلميين وواقفين يتفرجوا عليك كانك نسناس واقف. في القفص او كانك حاوي والناس واقفه تتفرج عليك. .... قد ايه ياعزيزي شعور صعب جداً

بس الاصعب تصور اني الاقي حد من قرايبي ( بعد الشر ) سايح بدموا على الاسفلت وسط الطريق ومغطينوا. بجرايد ، ياااااه قد ايه صعبه على النفس انا معاك ان الشرطة اليومين دول قايمة بواجبها على اكمل وجه بس مش كفاية ضروري يكون واقف ضابط مع العساكر الغلابة دول او حتى نديهم لاسيلكي في ايديهم ، لان العساكر في الاول والاخير شوية شباب او شوية اطفال مكملوش ٢٠ او ١٩ سنة مش عارف بس شكلهم يدي على كده فضروري يكون راجل كبير في وسطيهم يكون متعلم وفاهم .

ونقطة تانية : الشباب الصغير اخوتنا الي فرحانين بعربياتهم احب اوجهلهم رسالة. بلاش بلاش يا اخواتي السرعه بلاش يا ابنائي السرعه. الفترة دي بلاحظ شباب فاكرين ان البلد سايبه. وبيسوقوا بطريقه هبلية. ياريتها احترافيه لا بيسوقوا بهبل عاوز اقولهم لو فكرت ان اخوك الصغير الي لسه بيبي بيلعب في الشارع وجري كده ولا كده. وشوفتوا قدامك هل هتلحق تدوس فرامل. معتقدش بس هتقدر ياترى تدوس اخوك الصغير اطفال كتير ياشباب. بتفلت ايد مامتهم ويجرووا كده وكده. .... ناس كبيرة في السن ياشباب مش قادر تعدي الشارع ويادوبك رجليه شيلاه ناس كتيرررررر ياشباب. بتمشي سرحانه عندهم عيال وزوجة واطفال وقاعدين بيفكروا. هيئكلوهم ازاي وهيصرفوا عليهم منين وسرحانين في مشاكلهم. وفي النهاية يجي شب بعربية حديثة يقوم يدوسوا بمنتهى البساطة ويريحوا من كل مشاكلوا وهموموا انا عارف انك ريحتوا من هم الحياة بس مين هيريح اهلوا ومراتوا وعيالوا. ولاهتدسهم هما كمان .

مش عاوز اقولك. يابيدو يا عزيزي انا حتى اليومين دول بقيت الاقي اطفال عندهم ١٣ سنة بيسوقوا عربيات ووخدين صحابهم معاهم في المدرسة وقاعدين يلفوا بعربيات حديثة موتسيكلات. وتكاتيك وميكروبصات اطفال الي سايقنها حتى التكاسي النهردة سواق التكسي يعيا. يجي ابنوا يقوم واخد العربية التكس بتاعت ولدوا ويقول انزل اشتغل عليها بجد ربنا يرحمنا برحمتوا الواسعه

---

يااااه كل دا عادي وبيحصل جدا وبكثرة دا حتي لو محصلش في يوم من الايام بنقول اليوم فيه حاجة غلط
:Copy of m-s5:
بس اللي مش عادي
الاستهتار بحياه الاخرين
لما واحد لسة ميعرفش يتحمل مسؤلية نفسة يتحمل مسؤلية عربية وارواح اخرين كمان :17:
سواء كان عربية او موتوسيكل
والموضة اليومين دول بقت الحقد وبالذات من الشباب
ازاي وازاي الباشا يبقي راكب مثلا 128 وواحد معاه بي ام ولا مرسيدس ماشي كويس
حقد وغل
وشوفتها قدام عيني
وحصلتلي كمان
وكمان في الموتسيكلات اكتر واكتر
تلاقي واحد راكب صيني وشكله غلط في غلط ويحاول يخليك تشد معاه او تسمعه صوت مكنتك لو معملتش كدة يخبطك ويجري ولا من شاف ولا من دري
والتكاتك
الميكروباص
النقل
انت عارف معاليك انا نفسي في حاجتين لو اتحققو يااه هننتقل بالزمن 1000 سنة لقدام
ان المرور يتحول لهيئة مدنية او يفضل زي مهو بس متخفي واستخدام المواهب اللي عندنا
عربية بتتمشي عادي لقت حد مثلا ماشي عكس مرة واحدة تلاقي السرينة استغلت وهوب جابتة وتكون مخالفات رادعة سحب رخصة سنة مثلا الخ
هيبقي كله ماشي خايف من القانون لانو من غير ميعرف هيلاقي اللي يديه المخالفة وكله هيخاف من كلة:Copy of m-s5:
ويسلام بقي تبقي دوريات متخفية في كل الطرق الصحراوي وداخل المدن
تاني حاجة الرخصة واللي بيطلعو الرخصة نظام فاشل وغلط استفاد اية الراجل لما مشيت قدامة خط مستقيم ووقفت ؟ عرف اني بعرف اسوق ؟ :D:D:D
وبجد عندك حق في كل اللي قولتة معاليك
من منا يأمن علي اسرتة
اوحتي علي نفسة
شعب مصر زمان كان معروف عنه الطيبه والشهامة وانو ميقدرش يقتل نملة لانو انسان
اي نعم محدش كان بيعاملنا كا بني ادمين بس علي الاقل كنا بنعامل بعض علي هذا الاساس
لاكن فجاه ازاي معرفش في يوم وليلة بقي شعب بيقتل وبيسرق حتي من بيوت الله :17: وكل حاجة يقدر يعملها

بس كل ما علينا فعله هو حاجتين اننا ندعي ربنا
وان كل واحد علي الاقل ميقولش انا مالي هي جت عليا انا
وان شاء الله هنرجع احسن من الاول بكتير
بس كلها شوية وقت

ربنا يسترها على الجميع

اقتباس:

---

المشاركة الأصلية كتبت بواسطة shaddadfalcon1

مينفعش حد يلمس اي جثه لو في حادثه لو مات في ساعتها عشان لازم تيجي النيابه او الجنيايات تعاين عشان تشوف حادث عادي ولا فيها شبهه جنائيه ودي في اي مكان في الدنيا علي حد علمي وياما شفت جثث بتبقي في نص الطريق وبالعرض مش حتي علي جنب بس لازم تفضل مكانها لحد ماالمباحث تيجي وتشيلها

---

طيب هما ازاي بيتحققوا من حتت الشبهة الجنائية دي. ...
لان انتا عارف قد ايه احنا عندنا ناس عقلها صغير .... يعني ممكن تمشي موظف من عندك ولا حاجة ويقوم الموظف بدل مايفكر. انو غلط. واخطء وقصرررر ويستاهل الفصل يقولك لا الراجل ابن التيت ده قطع عيشي ههههههه ويقوم جايبلو عربية من جوز خالتو ولا ابن اختوا ويستناك وانتا بتعدي الشارع يقوم زيووووو ودايسك

ولا ممكن واحد بيحب وحده وهيا مبتحبهوش وقامت سابيتوا ووافقت على الواد. ممدوح فالتاني شال في نفسيتوا قوي فراح يدوس الواد ممدوح او يدوس البت وامها وابوها كمان وياخود بعضوا ويقول يافكيك

واذا شعب بينزلوا يتخانقوا مع بعض في اتفه الامور يعني مثلاً تكون سايق في الزحمة وقمت مدي اشارة وداخل بالراحة يمين او شمال تبص تلاقي العربية الي وره مره وحده بييييييييييييييييب بيب بيييييييييب. وعلى نور عالي ويلحقك ويتخانق معاك انو ازاي وازاي دخلت قداموا ....
وتقولوا فيها ايه لمن اخش قدامك ما انا مديك ايشارة وداخل براحة يعني مكسرتيش عليك او خبطلك عربيتك يقوم يقولك حد يخش كده. ياعم الحج انا بعيد عنك بيني وبينك اربعه متر ثم ان الطريق واقف وانتا واقف وانا عاوز اخش يمين. وديك ايشارة مش عارف هو يفترض انا اعمل ايه طيب ممكن تجيب نمرتك علشان قبل ما افكرر اخش قدامك اتصل عليك واخود ميعاد واستئذن هههههههههه

اهو انتا كده يابيدوا باشا تكاد تكون لمست لب المشكلة وفعلاً
الحليين بتوعك ده .... من انجح الحلول على مستوى العالم. وبتطبق على مستوى العالم .... استخدام المواهب الفردية للشرطة وتستخدم ذكائها .... فعلاً تلاقي بره يخافوا انهم يكسروا حتى اشارة رغم احيانا ً متبقاش فيه كميرات بس يقلك لا ياعم اخاف لاتكون عربية شرطة مستخبيه هنا او هنا وتقوم تجري ورايا وتعاقبني اني كسرت اشارة او حتى دخلت عكس .... جرب كده تخش عكس ولو حته صغيرة في مكان في العالم هتبص تلاقي عربية الشرطة وراك وراك. انشالله حتى دخلت بيتكم ويخبطوا على الباب ومش ماشين من قدام بيتك قبل ما يقبضوا عليك لانك ارتكبت جرررررررريمة ممكن تضيع حياة اسرة مصرية انك دخلت عكس اتجاه السير ..... ويفهمك غلطك وممنوع النقاش ..... مفيش نقاش ومفيش كل سنة وانتا طيب .... ويقولك انتا اخليت بالنظام العام واخليت بامن وسلامت المجتمع

وياه قد ايه كنت مبسوط. وفرحان وانا في الزمالك لمن وقفت عند كشك سجاير الي عند الاشارة تحت الكوبري علشان اجيب علبة سجاير ولقيت امين شرطة بيلزقلي ورقة على شباك عربيتي وبيقلي انتا عطلت المرورررررر واضريت بالصالح العام ياااااه كان نفسي اجري عليه وابوسوا واقولوا ايوه كده. يارجالة ايوه كده يا وحوووووش برافوا عليك والله. بس ياترى النظام ده مطبق بس في الزمالك ههههههههههههه

اقتباس:

---

المشاركة الأصلية كتبت بواسطة Y a r i s

طيب هما ازاي بيتحققوا من حتت الشبهة الجنائية دي. ...
لان انتا عارف قد ايه احنا عندنا ناس عقلها صغير .... يعني ممكن تمشي موظف من عندك ولا حاجة ويقوم الموظف بدل مايفكر. انو غلط. واخطء وقصرررر ويستاهل الفصل يقولك لا الراجل ابن التيت ده قطع عيشي ههههههه ويقوم جايبلو عربية من جوز خالتو ولا ابن اختوا ويستناك وانتا بتعدي الشارع يقوم زيووووو ودايسك

ولا ممكن واحد بيحب وحده وهيا مبتحبهوش وقامت سابيتوا ووافقت على الواد. ممدوح فالتاني شال في نفسيتوا قوي فراح يدوس الواد ممدوح او يدوس البت وامها وابوها كمان وياخود بعضوا ويقول يافكيك

واذا شعب بينزلوا يتخانقوا مع بعض في اتفه الامور يعني مثلاً تكون سايق في الزحمة وقمت مدي اشارة وداخل بالراحة يمين او شمال تبص تلاقي العربية الي وره مره وحده بييييييييييييييييب بيب بيييييييييب. وعلى نور عالي ويلحقك ويتخانق معاك انو ازاي وازاي دخلت قداموا ....
وتقولوا فيها ايه لمن اخش قدامك ما انا مديك ايشارة وداخل براحة يعني مكسرتيش عليك او خبطلك عربيتك يقوم يقولك حد يخش كده. ياعم الحج انا بعيد عنك بيني وبينك اربعه متر ثم ان الطريق واقف وانتا واقف وانا عاوز اخش يمين. وديك ايشارة مش عارف هو يفترض انا اعمل ايه طيب ممكن تجيب نمرتك علشان قبل ما افكرر اخش قدامك اتصل عليك واخود ميعاد واستئذن هههههههههه

---

اكيد ليهم طرق بس اللي اعرفه مثلا بيشوف العربيه زحفه مثلا وفي علامات للفرامل علي الأرض ومكان العربيه فين ومكان الجثه فين ويحاول يعمل Simulation للي حصل وده مش بيحصل غالبا في مصر لنه غالبا روتين عشان يشيل الجثه لكن ده حاجه من الحاجات اللي اعرف انها بتحصل في الدول المحترمه

المشكلة ان لو الشخص مات الاسعاف مش هتيجي اصلا وبترفض تشيله
لحد ما تيجي الشرطة وتعمل اللازم
احتمال كبير حد يكون خبط الاتنين
ونسبة الحوادث بمصر طبعا كتيرة نظرا لان مفيش مراقبة على السرعة
والطرق لا يوجد بها معديات ولا مطبات ولا اشارات لعبور المشاه
لكن ربنا يستر على الواحد
وموضوع الجرايد مش شايف فيه اي اهانة هما بيحاولوا يغطوه بأي طريقة
عشان مش يبقى محط للانذار وعشان الناس مش تتفزع
فالناس بتتصرف صح
طبعا الحوادث دي من ارعب اللحظات سواء للميت او اللي بيعدي ويتفرج
والمفترض انه عبررررررررة

لا حول ولا قوة الا بالله

اقتباس:

---

المشاركة الأصلية كتبت بواسطة y a r i s

اده اده اده يا ناصر يعني انا لو نزلت وشلت الجثه على جنب ممكن تبقى في مسؤولية علي ... اصل انا كزا مره ببقى عاوز انزل اشيل اي جثة مرميه في الطريق والناس واقفه حوليها تتفرج امووووت واعرف بيتفرجوا على ايه. ، ومن طثافة الزحمه مبقدرش. اعمل كده

بس الي باستغربلوا انوا لو مصاب وعضمو متفتفت تلاقي الناس كلهم شالوه وملخوه ومخمضوه ودوخوه. وفي النهايه يجبولوا كوبايت ميه ويقولوا انتا كويس مع ان المفروض ميتحركش خالص غير لمن يجي المسعفين علشان يشلوه بعنايه ( حتى في حوادث العربيات ). المفروض لو السواق او الركاب مصابين محدش يحركهم لغايت ماتيجي الاسعاف مش كل واحد يشد فيه شوية. !!!؟

---

مش لما يكون فيه اسعاف اصلا

وحتي لو فيه اسعاف هما بيفهموا حاجه يعني

ثم انتا لو استنيت الاسعاف يبقا العربيات هاتدوس عليه تاني

انا شايف ان لو اتحسنت الاوضاع فى مصر عشان نبقى زي السعودية مثلا مش هيكون قبل 10 سنين
ودي أقل مدة لتطوير جهاز الشرطه للأسباب التاليه :

1- قلة المعدات والامكانيات زي جهاز لاسلكي لكل شرطي وواقي بالاضافة لموتوسيكلات وسيارات باعداد كبيره للدوريات ودى عشان نستوردها محتاجه مليارات و اقتصادنا حاليا فى الحضيض

2- قلة اعداد افراد الشرطه بالنسبه لاعداد افراد الشعب "نسبه وتناسب" وعشان نحاول نظبط النسبه دي ونرجعها لمستواها الطبيعي لازم هنحتاج اننا نضاعف اعداد الشرطه المتخرجين للاضعاف العدد الحالي على الاقل لمدة 6 دفعات متتابعه
4 + 6 = 10 سنين ( 4 سنين التدريب - 6 سنين عدد الدفعات )

الحل :

الاعتماد على الشعب

بعض الدول الاسيويه بتيح لافراد شعبها انهم يحملو كاميرات تصوير مستمر
( كلنا كنا قرينا عن واحد حصل على كذا الف دولار كمكافئه لقيامه بتصوير المخالفات المروريه وتقديمها )
طبعا الشرطه متدلوش حاجه من جيبها ده مجرد نسبه صغيره من المخالفات الى اخدتها من المخالفين الى هوا صورهم لحظة قيامهم بالمخالفه

مجرد كاميره صغيره بتقوم بالتصوير بشكل متصل عند حدوث مخالفه بيقوم صاحب الكاميرا بالضغط على زرار صغير لحفظ ما قامت الكاميرا بتصويره فى آخر دقيقتان
ويكون فيه مكتب مخصوص مجهز فى كل قسم لتلقى هذه المخالفات واعطاء المصور جزء من قيمة المخالفه بصورة فوريه

لو اتطبقت الفكره دي بعدها بكام شهر هنلاقى نسبة المخالفات قلت بنسبة 1 - 1000
لان مع توفير الكاميرا بسعر بسيط - 50 جنيه مثلا - ساعتها اى حد يفكر انه يعمل حاجه غلط هيفكر قبلها 1000 مره لانه احتمال كبير نلاقى نص الشعب مركب كاميرة تصوير المخالفات " حاجه تجيب فلوس وفى نفس الوقت بيفيد المجتمع " :shine[1]:

١١١١١١+
طيب. فيها ايه مثلاً لو يشتروا موتسيكلات صيني. بالاسيلكي وتبقى دي وظيفتها دوريات. .... تلف وتدور في الشوارع واذا لاحظ حاجة او شاف اي مشكلة في الشارع او اي مخالفه يتعامل معاها على طول مقدرشي. على طول بالاسيلكي يطلب دعم. .... زي مابنشوف حتى في الافلام الامريكية ويكون اختصاصوا اي حاجة غلط شافها. ( كسر اشارة المشي عكس السير خناقه مثلاً .... فعل فاضح في الطريق العام .... واحد راكن صف تاني او سادد الطريق او تريلة ماشية في الشمال يوقفها ويطلب من السواق يمشي في اليمين. وحده مثلاً شوية شباب بيغتتوا عليها يعملهم محضر. .... مش النهردة تعاله اي وحده تشاور لعربية شرطة تستغيث بيهم. هتلاقيهم مشيوا وفاكرينها بتشاور بتكسي وراهم او ميكروباص ) ده حتى من موظيفة الدوريات دي. لو لقى حريقة على طول يبلغ بالاسيلكي مش يكمل طريقوا عادي ويقول يمكن شوية غفر مولعيين شوية خشب .... من فوائد الدوريات لو شاف طريق مزدحم يطلب دعم بسرعه. ويحاول يغير حركة سير الطريق ويحل المشكلة. .... وكل ده ممكن يتم بشوية موتسيكلات صيني من امو ٢٧٠٠ جنية. ودي بتشم البانزين شم يعني ١٠ جنيه. تلففوا اسبوع بحالو وشوف موتسيكل واحد ممكن يمسك منطقة بحالها. ويفضل يلف بيه كده والناس تحس باهمية الشرطة وتحس بوجودهم بشكل ملحوظ في كل حي لخدمة المواطنين ولا ايه

اقتباس:

---

المشاركة الأصلية كتبت بواسطة y a r i s

١١١١١١+
طيب. فيها ايه مثلاً لو يشتروا موتسيكلات صيني. بالاسيلكي وتبقى دي وظيفتها دوريات. .... تلف وتدور في الشوارع واذا لاحظ حاجة او شاف اي مشكلة في الشارع او اي مخالفه يتعامل معاها على طول مقدرشي. على طول بالاسيلكي يطلب دعم. .... زي مابنشوف حتى في الافلام الامريكية ويكون اختصاصوا اي حاجة غلط شافها. ( كسر اشارة المشي عكس السير خناقه مثلاً .... فعل فاضح في الطريق العام .... واحد راكن صف تاني او سادد الطريق او تريلة ماشية في الشمال يوقفها ويطلب من السواق يمشي في اليمين. وحده مثلاً شوية شباب بيغتتوا عليها يعملهم محضر. .... مش النهردة تعاله اي وحده تشاور لعربية شرطة تستغيث بيهم. هتلاقيهم مشيوا وفاكرينها بتشاور بتكسي وراهم او ميكروباص ) ده حتى من موظيفة الدوريات دي. لو لقى حريقة على طول يبلغ بالاسيلكي مش يكمل طريقوا عادي ويقول يمكن شوية غفر مولعيين شوية خشب .... من فوائد الدوريات لو شاف طريق مزدحم يطلب دعم بسرعه. ويحاول يغير حركة سير الطريق ويحل المشكلة. .... وكل ده ممكن يتم بشوية موتسيكلات صيني من امو ٢٧٠٠ جنية. ودي بتشم البانزين شم يعني ١٠ جنيه. تلففوا اسبوع بحالو وشوف موتسيكل واحد ممكن يمسك منطقة بحالها. ويفضل يلف بيه كده والناس تحس باهمية الشرطة وتحس بوجودهم بشكل ملحوظ في كل حي لخدمة المواطنين ولا ايه

---

المتوسيكلات الصيني متنفعش تشتغل ساعتين متواصل كانت تولع لانها ضعيفها
عكس موتسيكلات المرور قويه جدا جدا انا ركبتها مره الموتسيكلات دي وهم بمعني الكلمه
وكانت الياماها القديم كمان مكنش الموديلات الحديثه الى نزلت اليومين دول موجوده ايامها
وعرفت بعد كده انها فيها انظمة ثبات وسعرها غالي جدا ومش هتصدق لو قولتلك ان موتسيكل المرور ممكن يزق عربيه مرتاح

وبعدين الموضوع مش موضوع امكانيات بس حتى لو اتوفرت هتجيب الى يسوقه منين ؟؟ وانت عندك عجز شديد فى الافراد
وحتي لو وفرت الموتسيكل والفرد الى هيركبه انت ضامن ان يشتغل فعلا مش هيركن على اول قهوه يعد فيها ياكل ويشرب ببلاش مقابل انه يسيب عربيات روادها واقفه صف تانى بدون مخالفات
كان زمان الشرطي ابو موتسيكل منتشر جدا "الكومسطبل" وكان ليه دور هايل بس ده كان زمان

انا فكرتي ان مجرد كاميره صغيره تحطها على التابلوه مثلا زي كاميرة المراقبه بالظبط بتسجل بشكل مستمر وبتحذف تلقائي الى فات عليه مده زمنيه معينه لو مجالهاش أمر بالحفظ
انت مثلا مركب الكاميرا وماشي لاقيت واحد قدامك رمي حاجه مش شباك عربيته
كل الى انت هتعمله انك تضغط على الزرار عشان يحفظ آخر 20 ثانيه صورتهم الكاميرا قبل ما تضغط على الزرار - الى كان فيهم سايق العربيه الى قدامك بيرمي زبالته من العربيه - ويتم حفظ ال 20 ثانيه دول على كارت الميموري الخاص بيها

احسب كده كل مره انت بتخرج فيها من بيتك لمدة 30 دقيقه سايق بتشوف فيها كام مخالفه ...!!
واحد ماشي عاكسي - سواق ميكروباص واقف فى نص الشارع - واحد طاير فى منطقه سكنيه - تاكسي فرمل لواحد فجأه فى نص الشارع - واحد بيرمي حاجه من شباك عربيته - واحد جاي ياخد اليوتيرن من قدامه بالظبط وقاطع 3 حارات ومش مهم الشارع يتعطل عشان مش عايز يمشي فى الحاره الى فيها اليوتيرن لانها بطيئه - تريلا ماشي طاير والمقطوره عماله تطوح شمال ويمين - ميكروباص مطلع من شكمانه شبوره دخان اسود - واحد بيتخطاك من اليمين على طريق سريع - واحد جاي قدامك باليلل وضارب العالي - كام واحد سايق بلطجه "قياده برعونه" - كام واحد واقف صف تاني وتالت - ومخالفات تانيه كتيييييييييييييييييييييير

يعني طبيعي جدا فى مصر انك تشوف أكتر من 50 مخالفه فى أقل من نص ساعه الفكره اننا عنينا خدت على المخالفات وسعات كتير بنعملها عادي " انا شايف ان نسبه كبيره من الى بيسوقو فى مصر عايزله عسكري قاعد جنبه طول ماهو سايق عشان يمشى عدل "

تخيل لو عرفت ان الي قدامي او الى جنبي ممكن يكون مشغل كاميرة تصوير المخالفات وممكن يسجل عليا المخالفه وهيقدمها لو اتحط مكافأة فوريه لكل مخالفه مسجله 10 جنيه مثلا هتلاقى نص الشعب جايب الكاميرا ومشغلها

ساعتها اى حد هيعمل اى مخالفه أكيد هيلاقى الى صورها ويقدمها عشان ياخد نسبته وبالتالي المخالفات هتقل بصوره كبيره جدا
وقتها بقى ممكن نستغنى عن أكتر من نص اعداد شرطة المرور "وده عدد كبير جدا" ويتحولوا لشرطة النجده عشان لما نتصل بالنجده حد يجي بعدها بربع ساعه مثلا مش بعد ساعتين تلاته

انا معاك يا باشا
بس على فكرة عجز الافراد ده. ممكن تغطيه بسهولة. العوطلية والصيع مفيش اكتر منهم في البلد هههههههههه .... شباب زي الورد. مرمين على القهاوي طيب بلاش عارف قد ايه اعداد خريجين كلية الحقوق الي مش لاقين شغل والي بقه يشتغل في العقارات والي بيشتغل بياع في محل كاشير والي بقه مندوب مبيعات وحاجة تكسف دول مش محتاجين اكتر من ست شهور بس تدريب ويبقوا زباط على حق وحق الحق كمان ، انا فاكر جلسه لمجلس الشعب كانوا بيناقشوا فيها اربع سنين كلية الشرطة وعلى حساب الدولة تكلفه كبيرررررررة وعبء اقتصادي مع ان مره شفت فيلم امريكي مش فاكر اسموا ايه ناشونال انتر ناشونال كده بتاع الواد الاسود الي كل ما يخش عاوز يلتحق بكلية الشرطة يسقطوة. والي تسبب بفصل ضابط شرطة علشان نحلة الي هو بتاع فيلم باد بوي ده

عارفوا. المهم القصد انو بيبين ان الشرطة في امريكا مفيش عندهم اربع سنين ولا حاجة. ده هو كام شهر بتاخود فيهم دورات وتدريبات وصلى الله وبارك وانطلق للشارع .... وساعتها الدولة توفر فلوس مهدورة على الفاضي او ان الي عاوز يبقى زابط يخش يتعلم على حسابوا زيوا زي الدكتور زي المهندس. زي الصيدلي زي بتاع تجارة واعتقد كلهم اولاد لوئات. وعندهم شيء وشويات ومعتقدش لواء هيستخسر فلوس لتعليم ابنوا في كلية شرطة. دي حاجة

الحاجة التانية الموتسيكلات الصيني انا بشوف بتوع الدلفري رايحين جين فيها زي النحلة في الشوارع مبيهمدوش ففيها ايه لو جابولهم شوية موتسيكلات ووزعوه على عناصر بتوع الشرطة الي هما الدوريات او برافو عليك الي احنا في مصر بنسميها ( الكومواسطبل ) ده حتى شوف برضو في لندن الشرطة بتركب احصنة وبتمشي في الشوارع والحدائق والمنتزهات وشكل الحصان شيك كمان الموتسيكلات ولا الاحصنة. ماهيا الا وسيلة لانتشار الشرطة في الشوارع. .... وعمل دوريات ليلية. فاكر كلمة قديمة اسمهم العسس. ، العسس دول ياسيدي يعني الشرطة بيمشو باللليل بيحمو المنطقة من اللصوص والحرامية كان دورهم انهم يفضلوا يلفوا طول الليل لحماية الأهالي .... وكميرات المراقبة فكرة ممتازة جداً بس انا شايفها هتبقى احلى لمن تكون في الشوارع العمومية. مش في العربيات لانها هتبقى تكلفه على المواطن الغلبان والمفروض تكون تكلفه على الدولة لمراقبة كل الطرق وتبقى مربوطة باوضة العمليات. وبالاسيلكي يبتدوا يحركوا العساكر بتوعهم. روح الشارع الفلاني حرر مخلفه لفلان روح الشارع الفلاني فيه هناك خناقه وهكذا .... فكرة حلوة احييك عليها يا اخي شقي. بارك الله فيك .

اقتباس:

---

المشاركة الأصلية كتبت بواسطة y a r i s

ده. لو كانت الحادثة دي حصلت في السعودية كانت اتقلبت الدنيا لحد ما يقبضوا على الفاعل .... مش هنا كل واد يخبط حد يشمع الفتلة ويجري .... ولا هو علشان الانسان ليه ديه وليه تمن في السعودية وهنا الانسان ملهوش اي دية ولا ليه اي تمن

---

بصراحة مش فاهم وجه الشبه او الاختلاف واهمية المقارنة بين مصر والسعودية !!!
انا شغال فى الرياض من 6 شهور تقريبا .. ومن واقع مشاهداتى اليومية ان الفرق هناك فى الانتشار الامنى فى كل شارع رئيسى والدوريات (الاتارى) بتلف ليل ونهار خاصة المرور فى ساعات الذروة وتقريبا كده عند كل تقاطع او اشارة او مخرج او مدخل للطرق الرئيسية بالرغم من المراقبة على مدار 24 ساعة بالكاميرات والرادارات
لكن احب اطمنك الجرايد والبطاطين موجودين فى كل مكان ..
لأن الحوادث فى السعودية اغلبها بين عربيات وبعضها وليس بين عربية وعابر للطريق (كله راكب عربيات تقريبا)
والناس هناك تكسر 100 عربية ولا تقتلش روح عشان الدية !!!
بس الغالب حوادث السرعة والتصادمات وطبعا التفحيط فى كل مكان وبيحاربوه بكل الطرق
وبالنسبة لتحديد هوية مرتكب الحادثة هناك .. بتتم بكل سهولة وفى ثوانى لأن رقم لوحات العربية من المرور بتجيب اسم السائق وعنوانه وكامل بياناته وكله بأنظمة الكترونية معينة خاصة بوزارة الداخلية ..

الله ينور عليك يا استاذ يوسف. وهو ده الي بقول عليه. .... نفسنا تكون الشرطة عندنا ولو واحد في المية بس من الشرطة السعودية ... مش شوية لجان على حبة عساكر على كام امين شرطة في الشارع. وخلاص. ... وكويس انك عايش في السعودية. وشهدت بالحق. اهو انا نفسي كمان مصر تبقى احسن من السعودية ويكون للشرطة عندنا تواجد مكثف في الشوارع ... لان وجودها في الشارع وتفعيل دورها هتخلي اي واحد يخاف يبلطج. يخاف يغلط. يخاف يخش عكس يخاف يركن صف تاني وتالت والهرتله الي احنا فيها دي تتلم النهرده ياباشا بنشوف البلطجة وقلت الادب في الشارع عيني عينك ولو هددت واحد انك هاتجبلوا البوليس. يرد عليك بكل استخفاف ويقلك يمي يمي يمي خوفتني هههههههههههه.

و الله يا أستاذ ياريس و الأستاذ يوسف كلامكم جميل .

خصوصا أننا شعوب (شعوب الشرق الأوسط ) مش بتيجي غير بالعصايا نتيجة للجهل أو التباهي بعمل الغلط .
و الله الناس بتتباهى أنها تعمل الغلط .

اقتباس:

---

المشاركة الأصلية كتبت بواسطة y a r i s

انا معاك يا باشا
بس على فكرة عجز الافراد ده. ممكن تغطيه بسهولة. العوطلية والصيع مفيش اكتر منهم في البلد هههههههههه .... شباب زي الورد. مرمين على القهاوي طيب بلاش عارف قد ايه اعداد خريجين كلية الحقوق الي مش لاقين شغل والي بقه يشتغل في العقارات والي بيشتغل بياع في محل كاشير والي بقه مندوب مبيعات وحاجة تكسف دول مش محتاجين اكتر من ست شهور بس تدريب ويبقوا زباط على حق وحق الحق كمان ، انا فاكر جلسه لمجلس الشعب كانوا بيناقشوا فيها اربع سنين كلية الشرطة وعلى حساب الدولة تكلفه كبيرررررررة وعبء اقتصادي مع ان مره شفت فيلم امريكي مش فاكر اسموا ايه ناشونال انتر ناشونال كده بتاع الواد الاسود الي كل ما يخش عاوز يلتحق بكلية الشرطة يسقطوة. والي تسبب بفصل ضابط شرطة علشان نحلة الي هو بتاع فيلم باد بوي ده

عارفوا. المهم القصد انو بيبين ان الشرطة في امريكا مفيش عندهم اربع سنين ولا حاجة. ده هو كام شهر بتاخود فيهم دورات وتدريبات وصلى الله وبارك وانطلق للشارع .... وساعتها الدولة توفر فلوس مهدورة على الفاضي او ان الي عاوز يبقى زابط يخش يتعلم على حسابوا زيوا زي الدكتور زي المهندس. زي الصيدلي زي بتاع تجارة واعتقد كلهم اولاد لوئات. وعندهم شيء وشويات ومعتقدش لواء هيستخسر فلوس لتعليم ابنوا في كلية شرطة. دي حاجة

الحاجة التانية الموتسيكلات الصيني انا بشوف بتوع الدلفري رايحين جين فيها زي النحلة في الشوارع مبيهمدوش ففيها ايه لو جابولهم شوية موتسيكلات ووزعوه على عناصر بتوع الشرطة الي هما الدوريات او برافو عليك الي احنا في مصر بنسميها ( الكومواسطبل ) ده حتى شوف برضو في لندن الشرطة بتركب احصنة وبتمشي في الشوارع والحدائق والمنتزهات وشكل الحصان شيك كمان الموتسيكلات ولا الاحصنة. ماهيا الا وسيلة لانتشار الشرطة في الشوارع. .... وعمل دوريات ليلية. فاكر كلمة قديمة اسمهم العسس. ، العسس دول ياسيدي يعني الشرطة بيمشو باللليل بيحمو المنطقة من اللصوص والحرامية كان دورهم انهم يفضلوا يلفوا طول الليل لحماية الأهالي ....

---

أولا انا ضد فكرة الحاق غير العاملين "العاطلين" لجهاز الشرطه حتى لو كانو مؤهلات عليا لان التجربه دي حصلت فى مصر فى فترة الخمسينيات تقريبا كان حصل ايامها نقص فى الشرطه راحو مدخلين شباب كتير وكان اسمهم " ضابط فتوه " فى الاول كانت النتيجه مبهره واستتب الامن فى وقت قياسي لكن بعد فتره انقلبت الايه وبدقو يفرضوا هما اتاوات على الناس وتم الاستغناء عنهم بعد ان اثبتت التجربه فشلها
العيب مكانش عيب فكره العيب عيب شعب "بيفرعن اى حد ليه سلطه " وعمر الطبع ده ما هيتغير

بخصوص المرور والنجدة : دي حاجه ودي حاجه تانيه
النجده تابعه بالكامل لمدريات الامن لوزارة الداخلية
لكن المرور تابع بشكل كبير للمحافظه حتى لو لاحظت عربيات وموتوسيكلات المرور بتكون لوحها محافظه مش شرطه ماعده مرور الطرق السريعه هيا الى بتكون تابعه للداخليه علطول مش للمحافظات
عشان كده هنا فى مصر بتلاقى ظابط المرور شغلته الوحيدة المرور فقط ملوش دعوة بأي حاجه تانيه لان المرور تابع بشكل أكبر لديوان عام المحافظة أكتر منه تابع لمديرية الامن
عكس مثلا امريكا هناك اسمه شرطي ممكن يعطيك مخالفة مرور وفى نفس الوقت شغلته الاساسيه النجدة

اقتباس:

---

المشاركة الأصلية كتبت بواسطة Y a r i s

وكميرات المراقبة فكرة ممتازة جداً بس انا شايفها هتبقى احلى لمن تكون في الشوارع العمومية. مش في العربيات لانها هتبقى تكلفه على المواطن الغلبان والمفروض تكون تكلفه على الدولة لمراقبة كل الطرق وتبقى مربوطة باوضة العمليات. وبالاسيلكي يبتدوا يحركوا العساكر بتوعهم. روح الشارع الفلاني حرر مخلفه لفلان روح الشارع الفلاني فيه هناك خناقه وهكذا .... فكرة حلوة احييك عليها يا اخي شقي. بارك الله فيك .

---

الراجل الاسيوي الى كنت بتكلم عنه كان راكب عجله ومركب الكاميره فى الخوذه بتاعته وعمل ثروة من موضوع المخالفات ده والخبر كان منشور من سنتين وأكيد فى السنتين الى فاتو الكاميرات اتطورت فيهم كتير وبقى في كاميرات فيها GPS يعنى هتحددلك المكان بالظبط الى اتلقط فيه المقطع بالاضافه الى التاريخ باليوم والساعه والدقيقه والثانيه

بخصوص التكلفه : المفروض انها تكون بسعر التكلفه أو الاستيراد بدون ضرائب 100 جنيه مثلا
وحتى لو كان فيه استغلال واتباعت بـ 500 جنيه دا انت لو هتاخد على كل مخالفه تصورها 10 جنيه بس هي نزله واحده للشارع فى ساعه بالكتير هتجيب تمن الكاميرا :colsmil:

مميزات الفكره دى حاجتين :
الاولي : ان مش هيكون فيها واسطه يعنى مفيش وكيل نيابه ولا ظابط او اى حد يقدر يستغل نفوذه انه يتهرب لانها اتصورت والى صورها خد نسبته وهوا بيسلمها ومفيش قدامه غير نه يدفع لانها مثبوته عليه رسمي " مبدأ العدل بين الجميع "

الثانيه : انها هتحقق عنصر الردع لان مع انتشارها مش هتكون عارف مين الى بيصور ممكن يكون فى اى حته واي مكان عكس الكاميرات الثابته بعد فتره بتتعرف اماكنها وبتتفادي او تتكسر

بالاضافه انها هتبقى مصدر رزق لناس كتير لفتره معينه لحد ما الناس تتعلم وتتعود على الالتزام " ناس أكيد هتكون ثروات من كميات المخالفات المهوله الى فى الشارع المصري "

اقتباس:

---

المشاركة الأصلية كتبت بواسطة tutankhamoun

و الله يا أستاذ ياريس و الأستاذ يوسف كلامكم جميل .

خصوصا أننا شعوب (شعوب الشرق الأوسط ) مش بتيجي غير بالعصايا نتيجة للجهل أو التباهي بعمل الغلط .
و الله الناس بتتباهى أنها تعمل الغلط .

---

اضافة لكلامى السابق وتاكيدا لكلامك ..
وفى نفس ذات السعودية طبعا فيه مناطق ليست بها تغطية شرطية كاملة ولا يوجد رادارات فى الاشارات
وساعتها شوفت الانفلات والمرور بالدراع والبلطجة (الكبير والجرىء ياكل الصغير والجبان) عادى جدااا زى مصر واكثر غشومية كمان
وده دليل فعلا ان لولا وجود الكاميرات والرادع والعقاب الكل هايمشى على هواه بدون احترام !!!