الموضوع: حيرة شديدة

انا هكلمك فى التوكيل
مصنعياته غاليه جداا وطبعا قطع الغيار
انواع الزيوت المستخدمه شل وغالبا بيجبوه من هنا من مصر مش بيستوردوه لانه بعد فتره قليله جدااا بيسود وبيعلى صوت الموتور وكمان مش بيشوفوا النوع المناسب للسياره ويحطوه لا دول بيحطوا اى نوع المهم 10000 وخلاص يعنى مثلا فى صيانة 10000 بتاعتى يعنى العربيه لسه زيرو لقيتوه حاطط 20w-50 وده تقيل جداا بالنسبه لعربيه لسه زيرو
كمان فى حاجات كتير فى الصيانه المفروض بتتعمل ويقولك احنا عملناها وهما معملوش حاجه اصلا زى تربيط العفشه ومراجعة زيوت الفرامل والفتيس والطنابير
ممكن تقوله على حاجات بتشتكى منها فى العربيه وانت بتسلمها ليه وهو يكبر دماغه وميبصش عليها اساسا
هو فى المجمل كويس بس انا بقيت بعمل صيانتى بره عشان خوفت ع العربيه من الاهمال ده

على فكرة كلامى ده عن تجربتى انا شخصيا اكتر من 4 مرات مع التوكيل

كل التوكيلات فى مصر سيئه

المشاركة الأصلية كتبت بواسطة ramymt

فقالى اتفرج على كيا كارينز وركبتها وفعلا لقيتها واسعة وكبيرة بس كنت بسمع عن العربية دى انها سحبها وحش اوى وواطيه على الارض وفيها مشكلة فى العفشة مع خلوها من وسائل الامان كالايرباج وabs و ebd مثل بعض السيارات الاخرى

العربيه دي فعلا واسعه جدا ودي اول ميزه الناس بتقولها لما تيجي سيره الكارينز وتقعد فيها معدول يعنى وانت داخل مش بتنحنى شويه كده عشان تدخل وبتفرق في السفر كتير وخصوصا لو هيبقى معاك 4 هيبقو مرتاحين جدا حتى لو الكراسي اللي قدام رجعت للأخر اللي ورا بيبقى مرتاح برضه.

بالنسبه لوسائل الامان - العربيه فيها 2 ايرباج (واحده للسائق في الدركسيون وواحده للراكب الامامي في التابلوه) وفيها abs بس مفيش ebd وأنا بتكلم عن الهاي لاين اللي عندي ومش فاكر بصراحه الفئه الاقل فيها كده ولا لاء بس أعتقد الهاي لاين بس اللي فيها abs و 2 ايرباج والاقل مفيشا ABS بس فيها ايرباج السائق فقط ولو المعلومه دي مش مظبوطه ياريت حد يصلحهالي.

فكنت اتمنى من الاخوة الافاضل اللى راكبين كارينز او جربوها انهم يفيدونى فى بعض النقاط مثل
1-سحب العربية

العربيه دي بصراحه مش معموله للسحب والشد والسباقات على الطريق فهيا مش مميزه في الحته دي بس لو انت غاوى تسارع فأكيد مش دي العربيه اللي انت بتدور عليها. بس العربيه ادائها بيتحسن كتير لما تعمل سيرفس 1000 كيلو وبعدين تسوقها ستيبترونيك وتنقل مانيوال على اكتر من 4500 لفه وتسوق بيها كده مشوار جامد وبعدين لما تسوق اوتوماتيك تاني هتلاقيها اتعودت على طريقتك وبتنقل متأخر (بما انها الاساسي بتاعها انها بتنقل على 3000 لفه تقريبا لتوفير استهلاك البنزين) وتاخير النقل ده بيحسن السحب لأنه بيديك عزم أكتر بس في المقابل صوت الموتور هيبقى اعلى شويه.

2-مشكلة ان العربية واطية

هيه مش واطيه لأن أقل ارتفاع من الارض 156 مللي وفيه عربيات كتير في الشارع منتشره ارتفاعها اقل من كده زي السيراتو مثلا 150 مللي (والمثل بالسيراتو هنا للتدليل على قوه انتشار سياره أقل في الارتفاع لكن الامثله كتير) بس مشكلتها مش في الارتفاع ولكن انها اطول من العربيات التانيه وده ممكن يخليها تحك لو المطب ممتد وعالي في نفس الوقت عشان العجل اللي قدام بينزل والعجل اللي ورا يكون لسه مطلعش وكمان تكون العربيه محمله والظروف دي مش هتتجمع مع بعض في معظم المطبات يعني أقولك مثلا في 8 شهور حكيت مرتين وكنت في المرتين معايا 4 غيري ومحمل الشنطه.

3-مشكلة العفشة

بصراحه انا مش بحس بأي مشكله فى العفشه - بالعكس العربيه فارشه على الارض بحكم تقل وزنها وطولها وعرضها الزايدين نسبيا عن باقى العربيات وأنا قريت مواضيع كتير في قسم الكيا عنها ومشفتش لحد دلوقتي حد بيشتكى من العفشه بصراحه فمتقلقش من الحته دي.

4-توكيل كيا ومدى استجابته مع العملاء

أنا عملت سيرفس 1000 و 10000 في التوكيل ومليش اي ملحوظات سلبيه أو ايجابيه بما انى مكنش عندي مشاكل. فى النقطه دي تشوف الناس اللي كان عندهم مشاكل وتشوف لقو معامله التوكيل معاهم ايه.

واخيرا هل العربية ككل صفقة رابحة ام لا مقارنة بسعرها وامكانياتها

لو عايز عربيه عائليه تسافر بيها وانت مرتاح يبقى أعتقد الكارينز من احسن الاختيارات وهتكون صفقه رابحه جدا ان شاء الله وأنصحك تسوقها برضه لو تعرف حد شاريها عشان تعيش التجربه بنفسك وتشوف اللي انت عايزه موجود ولا لاء. أما لو عايز عربيه تجري وتاخد غرز يمين في شمال والكلام ده يبقى أكيد ده مش الاختيار الصح.

ملحوظه: متخليش حجمها يخوفك انك مش هتعرف تتحكم فيها في الزحمه أو مش هتعرف تركنها. جمد قلبك وشوف كام واحد راكبها وأكيد مادام بيعرفو يبقى انت كمان هتعرف.

ربنا يوفقك في اختيارك.

انا ركبتها كتير و هى فعلا عربيه من انسب العربيات اللى تنفع تكون عائليه و شنطتها كبيره و قعدتها مريحه للركاب. من الحاجات اللى لاحظتها ان صوت الموتور عالى عند السحب و فعلا ال body ده كان محتاج موتور اكبر يعنى مثلا 2000 cc و لمكن بالنسبه لاحتياجات اسره مش هتدخل بيها سباق يعنى.فى نقطه واحده بس عايز الفت نظر حضرتك ليها و ان شكلها الحالى هيتغير كليا ابتداء من الموديل القادم لأن هينزل منها جيل جديد كما اعلنت كيا