هحكيلكم اللى حصل معايا من ساعة ما جبت العربيه يمكن حد يستفيد من الموضوع
اولا: غيرت طقم بوجيهات بوش ب 80 ج, فلتر هوا اصلى ب 70 او 80 ج مش فاكر, وفلتر بنزين بولندى ب65 ج عند احمدفرج اللى فى محطة الجراج. سالته نغير السلوك بص فيها وقالى سليمه وصمم انها سليمة انا مكنتش باشتكى من البوجيهات فى حاجة واللى كانو طالعين منها كانو موتور كرافت. غيرت اويلسيل فتيس ب 80 ج.
غيرت اتنين مساعدين قدام المانى ب 750 ج وبارتين ميزان ب120 على ما اتذكر وبطاحتين ب220 وبليتين بطاح وجبت بليتين زيادة علشان يعلو العربية شوية
غيرت طنبورتين ب 260 جنيه وتيل امامى ب 160 جنيه
غيرت كومبريسور ب 600 ج وفلتر تكييف اللى هو المجفف بتاع الفريون ب300 ج وشحن تكييف ب 150 ج
النتيجة: حسيت بلخبطة وبرجله فى العربية والعربية بتعلى وتوطى جامد وساعة الدوار الصبح العربية بتوطى لغاية ما احس انها هتبطل عونى رشحلى ياسر فى الزاوية الحمرا روحتله لاقينا سلكين بوجيه بايظين وبالتالى بوظت البوجيهات وغيرت السلوك والبوجيهات بسلوك وبوجيهات اصلى ونضف الاير ماس وال تى بى اس وبص على المساعدين ولاقى الصاموله مش رابطة للاخر ودا بسبب انى فيه بليتين راكبين زيادة طبعا قال ان دا غلط والبلى الزيادة مش بيعلى العربية دا بينشف السوست وان ممكن نركب زى شريحة تحت البطاح ودى اللى ترفع العربيه فعلا !
المهم بعدها بشوية صوت نعره جامد جدا فى العربية سالت قالو طرمبة الباور, اشتريت واحدة استيراد ب 200 جنيه من مصطفى بطاح فى الوكالة وغيرتها وطلعت بايظة غيرتها تانى وطلعت بايظة تانى ولسة هرجعهالة والميكانيكى هيجيبلى واحدة بمعرفته
قبل صوت الطرمية كنت غيرت فبرة الدبرياج لانها اتكسرت ب 150 ج والدبرياج كان تقيل وبعدين صوت شخلله رهيب بيطلع من العربية لما ادوس دبرياج والعربية ترعش فى الطلعة, قلت كدا فيه حاجة فى الدبرياج يا اما البلية او الديسك رحت لياسر فك الفتيس وطلع البلية خمسن حته والاسطوانه فيها سوسته متاكله المهم جبت طقم دبرياج لوك المااحة بعد ما غيرت طرمبتين باور حاسسنى ب 1050 ج وغيرناه طبعا فك الفتيس دا حوار كبير جدا جدا وطبعا ياسر طلب مصنعية هلامية 400 ج المهم من هنا لهنا اخد 300 جنيه وغيرت زيت الفتيس بزيت شيل هيلكس الترا لان اللى اعرفه ان فتيس الاسكورت بيتحطله زيت موتور ودا اللى اكد ياسر الميكانيكى
انا بصراحة بعد ماغيرت طرمبتين باور ويظهر فيهم نفس الصوت بدات اشك انه ممكن يكون حاجة تانية بس مع العلم ان كل اللى يسمع صوت العربية سواء ميكانيكى او غيره يقولى دا صوت طرمبة الباور