الموضوع: تجربتى مع جينز كار

هو الموضوع فية نصيحة للى معاة فورد فوكاس بس قسم فورد نايم وبصراحة لازم الموضوع يتحط هنا علشان الكل يشوفة ...

معلش هحكى الموضوع بالتفصيل , بس هو فعلا لازم يتحكى كدة :)

البداية من حوالى 4 ايام جيت اقعد على كرسى العربية سمعت طقة وحسيت انى غطست فى ضهر الكرسى , ببص على ضهر الكرسى من ورا لقيت حاجة حديد ببتحرك تحت فرش الكرسى فا قولت يبقى اكيد السوستة اللى ساندة الفوم بتاع ضهر الكرسى اتكسرت او فلتت من مكانها.
المشكلة ان السوستة دى مع الاستخدام هتبوظ الفرش وفى نفس الوقت الكرسى بقى مش مريح حاسس ان غطسان جوا الكرسى وضهرى معووج لأن شبكة الضهر ماسكة من ناحية واحدة فا كان لازم يتصلح , ولأن دة الفرش الفابريكة بتاع العربية من غير كسوة ولازم يتفك وبما ان انا موسوس فى الحاجات دى فا هنا كانت الحيرة وخصوصا انا معرفش حد بتاع فرش كويس.

افتكرت جينز كار قولت لما اجرب وخصوصا الناس كلها بتشكر فى الشغل وبالفعل روحت يوم الاربعاء استقبلنى شاب فى العشرينات شرحت لة الموضوع فا لقيتة بيقولى " استأذنك بس لو نحدد ميعاد يوم تانى لأن المكان زحمة والمشكلة ان كل الناس دى بمواعيد "وبيقولى الكلام دة وهو بيتأسف انه بيقولهولى فا لما ظروفى مسمحتش قالى طيب لو ممكن كمان ساعة تكون عربية مشيت قولتله ماشى , قعد بعدها فترة يتأسفلى ويعتذرلى انة بيقولى كمان ساعة .....

المهم مشيت ورجعت كمان ساعة , قعدت شوية كان الحاج احمد وصل سمع منى المشكلة وبص على الكرسى وقلتلة انا جاى المكان دى مخصوص بناءا على اللى سمعتة على نايل موتورز وان كل مشكلتى فى فك فرش الفابريكة , لقيتة بيقولى انا هشرف علية واعملة بنفسى وبالفعل ادا المفتاح للصنايعى علشان يفك الكرسى من العربية وقعدنا ندردش ....... راجل قمة فى الادب والاحترام , فاكرين الشاب اللى اتأسف كتير طلع عبد الله ابنه.

شوية الصنايعى جاب الكرسى ودخل الورشة ووراة الحاج احمد , شوية جابلى الكرسى وطلع , الضهر عبارة عن هيكل حديد وجواة شبكة علشان تسند الفوم والشبطة متثبتة باربع سوست , اتنين تحت واتنين فى الجنب.

طلع المشكلة ان واحدة من الجنب مكسورة.

راح الحاج احمد بنفسه لف على كل المحلات اللى جنبة علشان يجيب سوستة زيها وهو ركبها بنفسه وراح مزود سوستتين كمان فوق ( منها تقوية لضهر الكرسى وفى نفس الوقت قلل الحمل عن السوستتين اللى فى الجنب وبالتالى يحافظ عليهم اكتر – ودى النصيحة للى عنده فوكاس ان لو هيفك الكرسى لأى سبب او هيعمل فرش يعمل موضوع السوست دة ).

بعدين لقيت الحاج احمد من نفسه خلى الصنايعى جاب لباد وحطه بين الشبكة والفوم علشان يحافظ على الفوم وفى نفس الوقت يرفع الضهر شوية لأن الشبكة كانت معلمة فى الفوم من الاستخدام وراح مقفل الكرسى زى الفابريكة تمام

النتيجة : الضهر رجع لو ضعة الطبيعى زى ماكان جديد واستحالة تعرف ان الكرسى اتفك من مكانه اصلا او ان الفرش اتفك ودة كله من غير ماطلب انا رايح للسوستة بس

روحنا للعربية فى الاخر بعد التركيب قالى جرب , جربت , كله تمام؟ , تمام ..... روح يابنى هات فوطة ومعطر وبروشور وتعالى

الصنايعى جابهم وجه اداهملى الحاج احمد وسلا عليكم وبيسلم وماشى , تعالى ياحاج احنا ماتحسبناش , لقيتة بيقولى حساب ايه ؟!!

حساب الشغل اللى تم , , , , مفيش حساب

!!!!!!!!!!!!!!!

مفيش حساب ازاى والشغل اللى اتعمل والناس اللى اشتغلت

قالى احنا معلمناش حاجة والناس اللى اشتغلت تبع المحل

ازااااااااى دة كله ومعملتوش حاجة اومال لو عملتوا كان حصل اية !!!

قالى واحد جاى يشتكى من الكرسى وانا على اد ماقدر ساعدتة وصلحتة , طيب ما دة شغل

اصر انه مياخدش فلوس !!!!!!!!!!!!!!!!!

يعنى ناس اشتغلت وادانى هدية (حتى لو بسيطة كقيمة مادية بس كقيمة معنوية كبيرة هو مش مجبر وخصوصا انه ماخادش فلوس ) وفى الاخر مش عايز ياخد فلوس !!!!

فعلا الراجل دة غريب , انا مهما قريت هنا عنه عمرى ماكنت متخيل انه بالمنظر دة , والله العظيم من اكتر الناس المحترمة اللى شوفتها فى حياتى

اخلاق عالية , ودود , صاحب كرم , محترف فى شغله والصنايعية شغلهم نضيف جدا

شكرا جينز كار !

هو فين جينز كار مكانة بالظبط