أنا إتسرقت يارجالة

**محمد يوسف** · 02-09-2012 10:36 PM

المشاركة الأصلية كتبت بواسطة normal

والله أجمل حاجه حسك للفكاهه رغم همك :)
ربنا يعوض عليك والحمد لله على سلامتك

أتصور أنها أكتر عربيه لأنتشارها نسبياً
خد بالك هي متسرقتش لضعف فيها أو سوء صناعه أو مستر كي زي كلام زمان :)
دا أزاز أتكسر وتحصل لأي عربيه
لكن واضح أنه حرامي شارب علشان يتجرأ على عربيه راكنه فى وش كافيه صف تاني فى ميدان الحجاز!!!!!!!!!!

أنا فاهم طبعا بس قصدى ان السيراتو بقت سهلة للحرامية قوى

**Abo.Moazz** · 03-09-2012 04:17 AM

ياريت العربية كانت السيراتو بتاعتى .. دى العربية الهيونداى أكسنت بتاعة المداااااااااااااااااام . عارفين يعنى أيه بتاعة المدام ؟؟؟ وكنت مستلفها منها علشان عربيتى فى التوكيل بتتصلح بسبب إنى كنت على الدايرى قبلها بيومين وكنت ماشى ورا تريله محمله قطع حديد والحبل إتقطع ولبست حته حديد فى الإكصدام جابته على الأرض .. وجت سليمة والحمد لله؟؟؟؟؟؟؟؟؟؟؟
وعلى فكرة مش فى ميدان الحجاز .. كانت فى شارع الحجاز بين ميدان المحكمة ومستشفى هليوبوليس .. أودام كافي شوب إسمه square بالظبط ... الساعة 3:30 العصر .. والسايس بتاع المنطقة دى بييجى الساعة 4:00 يعنى الحرامى عارف ميعاد السايس كويس ...
أيه أم الجرأة اللى تخلى واحد يكسر إزاز عربية العصر ياجدعاااااااااااااااااااا اااان .. أنا بشد فى شعرى
عموماً أنا عن طريق المنتدى وبعد إذن الإدارة أحب أعمل نداء إنسانى للحرامى يمكن يبقى متعلم وبيستخدم الإنترنت ( على أساس إنه بيسرق لاب توب كتير ) وأقوله :

أخى وصديقى الحرامى

أنا عايز أقولك إن الحقيبة اللى سرقتها من عربيتى مفيهاش غير 7 جنيه فضه ... خدهم بس رجعها ياجزمة
ورقى كله كله كله فيها ... طب بلاش ترجعها .. هتلاقى فيها فاتورة بتاعة كاميرا سامسونج عايز أروح أوديها الضمان تتصلح .. مش هاعرف أوديها من غير الفاتورة .. هاتللى الفاتورة ياجزمة.
هاتها وليك الحلاوة ... لو نويت ترجعها هتلاقى صندوق زبالة أمام الكافى شوب اللى إنت سرقتها من أدامه .. حطها جنبه وسيبها وعدى بعديها بساعة هتلاقينى حاططلك الحلاوة جنب الصندوق برده .. إوعى ترمى الشنطة جوة الصندوق ياجزمة ...
صديقك وأخوك وشقيقك ... صاحب العربية
ملحوظة ( الإزاز كلفنى 180 جنيه ياجزمة .. كنت قوللى إنك هاتكسره علشان تسرق وأنا كنت إديتهوملك ياجزمة )

**حماده المصري** · 03-09-2012 06:00 PM

معلش

هتلاقي الحرامي كان عامل حمله تمشيط للمنطقه

**mhmhmh75** · 04-09-2012 10:26 PM

هاها ها دة حرامي ابن تيييييت دة كان سرق العربية اسهل هاهاها اللة يعينك انتا بتهزر بس شكلك من الكلام دمك بيغلي من الغيظ

**ahmedsamir5edr** · 04-09-2012 10:56 PM

الحمد لله

**zaza2002** · 04-09-2012 11:00 PM

ههههههههههههههههههههههههه هههههههه فعلا شر البلية ما يضحك...

**hossam_elwani** · 05-09-2012 02:42 AM

الحمد لله على كل شىء

واسلوبك جميل على فكره هههههههههه

**Abo.Moazz** · 05-09-2012 04:13 AM

على فكره أنا بهزر علشان مش عارف أعمل أيه والله.. أنا لسه حاسس بتأثير ضياع الورق من يومين .. شغلى بدأ يتعطل بطريقة غبية والناس مبتعذرش
الحمد لله على كل شئ .. وفى الأول والآخر أنا اللى غلطان لأنى سايب الشنطة بمنتهى السذاجة جوه العربية ( بس ده كان شارع الحجاز وصف تانى و 4 العصر وقدام كافيه شوب ) الحمد لله.. أنا حبيت بس أحكيلكم اللى حصلى علشان الناس تستفيد وتخللى بالها كويس
أنا كنت علطول بسيب الشنطة فى العربية وكنت بقول بدل العربية مقفولة خلاص .. مفيش حد هايسرقها .. ده بالإضافة إن مفيهاش فلوس .. فياريت محدش يسيب أى حاجة فى العربية حتى ولو نظارة شمس فى الأيام اللى إحنا فيها دى ( أنا عايز أقولكم كمان إنى كنت سايب النظارة الشمس على الكرسى جنب الشنطة وثمنها أغلى 100 مرة من الشنطة وجراب النظارة كان فيه 4 كروت فيزا والبطاقة والرخص والحرامى الحمد لله سابها مخدهاش ) ... والله عمرى ماكنت أتخيل إنى أقع فى الموقف ده
لازم تتأكدو إن العربية دايماً مقفوله كويس
لو هاتبيتو العربية تحت البيت من غير جراج ... يبقى لازم أشيل فيوز من فيوزات العربية ..
وربنا يسترها علينا كلنا

**Abo.Moazz** · 12-09-2012 03:40 AM

عندى خبر حلو ياشباب
تقريباً والله أعلم الحرامى اللى سرق الشنطة إتمسك
وعرفت الكلام ده لما بعت واحد يجيبلى صورة من المحضر من النيابة قالوله إن المحضر فى التحقيق علشان مسكوا الحرامى .. بس المسروقات كلها فى الأحراز وبعد يومين هنقدر نروح نتعرف على الشنطة
والمفاجأة اللى سمعتها إن الحرامى دكتورررررر ... آه والله وظيفته فى البطاقة دكتور
لا تعليق

**د.أبونضال** · 12-09-2012 05:36 AM

المشاركة الأصلية كتبت بواسطة kingrab

عندى خبر حلو ياشباب
تقريباً والله أعلم الحرامى اللى سرق الشنطة إتمسك
وعرفت الكلام ده لما بعت واحد يجيبلى صورة من المحضر من النيابة قالوله إن المحضر فى التحقيق علشان مسكوا الحرامى .. بس المسروقات كلها فى الأحراز وبعد يومين هنقدر نروح نتعرف على الشنطة
والمفاجأة اللى سمعتها إن الحرامى دكتورررررر :l_bhuhhh[1]: ... آه والله وظيفته فى البطاقة دكتور
لا تعليق

مبروك مقدما ... غريبة قوي موضوع إن الحرامي دكتور ده