الموضوع: أنا إتسرقت يارجالة

-الحرامى إبن الأرندلى كسر الإزاز وقلت ماشى
-حاول يخلع الكاسيت ومعرفش وقلت ماشى
-الكلام ده كان الساعة 4 العصر وقلت ماشى
-كان فى شارع الحجاز يعنى شارع زحمة وقلت ماشى
-كنت راكن صف تانى والناس رايحة جايه وقدام كافى شوب وقلت ماشى
-يسرق شنطتى من الدواسة وفيها كل ما أملك من أوراق وقلت ماشى
-يعرف إن مفيهاش غير 7 جنيه فضة وميرمهاش بعديها بشوية وقلت ماشى
-ألاقى صاحب الكافيه يقوللى دانا عربيتى إتسرق منها لاب توب بنفس الطريقة قلت يمكن صدف
-ألاقى صاحب المحل اللى جنب الكافية يقوللى برده إنه إتسرق منه برده لاب توب بنفس الطريقه قلت يمكن تشابه سرقات
-ألاقى إتنين شباب وأنا واقف يقولولى دى عربيتك ياكابتن قلتلهم أيوة قاللى ربنا يكون فى عونك أنا كمان إتسرقت من يومين بنفس الطريقة قلت يمكن وباء جه فى البلد
-أتصل بالنجدة علشان تيجى ترفع البصمات وتعاين موقع الحادث ( بتفرج على أفلام عربى كتير ) والنجده متجيش وقلت ماشى
-تتصل بيه النجدة بعديها بساعة وتقوللى طب ماتيجى إنت تعمل محضر فى قسم مصر الجديدة قلت وماله
-أروح قسم مصر الجديدة ويقلولى إنت مش تبعنا روح قسم النزهة قلت معلش
-أروح قسم النزهة وأعمل المحضر والظابط يعاملنى بكل إحترام قلت ياحلاوة الثورة
-وأنا واقف ألاقى إتنين داخلين يعملو محضر علشان إتسرق منهم شنط ولاب توب بنفس الطريقه قلت أعديها المرادى
-أتحايل على الظابط إنه ياخد رقم تليفونى علشان لو الحرامى رجع الشنطة يتصلو بيه قاللى الكلام ده مع النيابة وقلت هاااااااااااااار أسود
-أروح عند بتاع الإزاز وأغيره بـ 180 جنيه وألاقى 3 عربيات واقفين بيغيروا إزاز سرقه برده وقلت دى أرزاق
-مستنى من ساعتها علشان حد يتصل بيه ويقولى إحنا خطفنا شنطتك وعايزين فدية 500 جنيه علشان نفرج عنها وقلت ياخيالك الواسع ياأبو حميد
كلللللللللللللللللللللللل ده يعدى
إنما آجى أربط حزام الأمان النهاردة ألاقى حتة إزاز من الشباك اللى إتكسر واقعة جوة اللوك بتاعه ومعرفش أربطه ... أهو ده اللى مش ممكن أستحمله أبداً

والهبل اللي قاعدين قدام الكافيه وبيتسرقو كل يوم بالدور دول مش عارفين يعملو للواد كمين ويهرو أمه ضرب؟