بخصوص موضوع أحمد حبيب قلبى حبيت أهديه الموضوع ده علشان يعرف قد إيه هو كان فى نعمة

http://www.nilemotors.net/Nile/305961-a.html


بص يا عم احمد

أنا يوم الجمعة كنت مسافر العين السخنة

المهم قبلها بيوم مشيك على العربية فى كل حاجة .. الميكانيكى العربية تمام أه تمام يا برنس

بتاع الراديتارات العربية تمام علشان كنت بغير وش الردياتير .. أه تمام يا برنس

المهم توكلت على الله وسافرت وماشى بالعربية تمام وماشى على الأر بى أم على 5.5 لأن عداد الكيلو متر عندى مش شغال وأول ما الأرب بى إم وصل لـ 6.2 هوب العربية سخنت والأمبير بتاع الحرارة على فوق النص بشوية .. المهم الكلام ده فى الكيلو 50 تقريباً.

وقفت بالعربية وظبطنا المية وتوكلنا على الله .. مش ألم نفسى بقى وأسكت .. نفخت العربية تانى أصل الطريق مغري جداً الصراحة لأنه حرير المهم المرة ديه وصلت بالأر بى إم لـ 6.5 تقريباً راحت العربية عاملها تانى عند الكارتة قبل السخنة بـ 7 كيلو.

اللى جاى بقى هو السيناريو الأسوأ

العربية فتيس الأوتوماتيك مبقاش قابل أى نقل وبقى زى المياه خفيف أوى ومش بيخلى العربية تمشى غير مارشدير بس على كل النقلات.

أتصلت بعم سامح الله يباركله مقصرش فى حاجة بس وقع قلبى وقالى كده يبقى فتيس طار .. بس سألنى على زيت الفتيس ولما قلتله أنه بلونه الطبيعى الأحمر ومش ناقص حسيت أنه أطمن شوية.

المهم الحمد لله كان معانا تويوتا لاند كروزر 2012 وكان معانا لانسر

التويوتا قطرتنى لغاية لما قضينا اليوم ورجعت مقطور بيها برضه.

وصلت القاهرة للميكانيكى ودخلت وانا ناوى أأقتله .. نزل تحت العربية وقالى غير نقل الفتيس كده يا برنس .. غيرت لقيت الفتيس تقل شوية وبقى زى الأول.

قالى نص ساعة وتاخد العربية معاك إن شاء الله .. أنا قلت إيه الميكانيكى الهجاص ده .. ده أنا راجع وفى دماغى هغير الفتيس.

المهم فعلاً نص ساعة ولقيته بيقولى دور واطلع بالعربية يا برنس .. دورت وطلعت بالعربية الحمد لله تمام التمام.

عارفين أيه المشكلة .. المشكلة أن فى مسمار وقع تقريباً اللى فهمته أنه بيقفل على علبة الفتيس من تحت علشان الترس والنقلات يبقى تمام.

دلوقتى انا هروح لبتاع الردياتيرات هطلع عينه علشان موال السخون ده.

كمان فى حاجة لاحظتها .. الموتور كان ناقص حوالى كيلو زيت مع أن أنا مغير الزيت بتاعه فى رمضان تقريباً .. هل نقصان زيت الموتور يسخن العربية ؟؟

عرفت بقى يا عم أحمد أن الحمد لله مشكلتك بسيطة.

قول قدر الله وما شاء فعل.