تواريخ في حياتنا

**OlaOsman** · 30-06-2008 08:07 AM

امبارح كنت باحط البلان بتاعة الشهر اللي جاي و منهم ميعاد اديته لحاجة يوم عشرة سبعة. التاريخ ده رن في دماغي.. عشرة سبعة.. عشرة سبعة..أأأأأأاايييييييييوه ده اليوم اللي كنت باخلص فيه امتحانات الثانوية العامة.. كنا بنبدأها 10/6 و نخلص 10/7.. ليه التاريخ ده بأه معلق معايا لحد دلوقتي؟ أصلي امتحنت ثانوية عامة مرتين.. السنة الأولانية جبت مجموع مش أد كده.. وداني كلية مش أد كده قسم مش أد كده و مش حاباه.. قمت بمنتهى البساطة (على أيامنا طبعا) عدت السنة عشان أحسن مجموعي و قد كان و الحمد لله جبت مجموع أفضل كتير.. دخلني كلية أفضل كتير.. قسم أفضل كتير كتييييييييير و الدراسة اللي انا باحبها :)

طبعا تاريخ 10/7 بالنسبة لي كان طوق النجاة من الضغطة و المذاكرة و القلق اللي كنت فيه.. بس طبعا لا يقارن باللي حاصل دلوقتي.. ده احنا نفدنا يا جدع

أكيد كلنا عندنا تواريخ في حياتنا عمرنا ما بننساها او حاجة حصلت في يوم معين عملت علامة في حياتنا.. حاجة ليها ذكرى.. سعيدة أو مؤلمة.. تعالوا نتشارك في التواريخ دي سوا :)

**tutankhamoun** · 30-06-2008 08:29 AM

22 مايو ................... يوم خروجي من ج ع ع ............. كان أحلى تاريخ في حياتي

12 مايو ................ يوم الرجوع إلى ج ع ع ................... ربنا يسامحني عليه

**Xpert** · 30-06-2008 08:48 AM

18 يوليو 1998 .. اليوم اللي جيت فيه مصر .. و سبت سويسرا و ماشفتهاش لحد دلوقتي .. اليوم اللي اتفارقت فيه عن الناس الحبايب .... و من ساعتها ماشفتش يوم قدام ...
و علي فكره التواريخ الفقر هاتبقي امتر من تواريخ السعاده هنا ....

**araberphilosoph** · 30-06-2008 10:57 AM

23/6 يوم ميلاد ابني

**Islam_galal** · 30-06-2008 11:06 AM

9-1-1997 تاريخ دخول الجيش
9-1-2006 تاريخ دخول عش الزوجية

في تشابه و لا حاجة؟

17 مايو تاريخ ميلاد واحد صاحبي عمرة ماعدي علي خير و دايما كان ييجي في الإمتحانات ، الله يسامحه
الله يخليكي يا علا ، دايما مواضيعك لذيذة و مختلفة

**aif** · 30-06-2008 11:34 AM

20 / 9 / 1964 تاريخ ميلادي
20 / 9 / 1987 لجنة قيدي بسجل المحاسبين أ ( بقيت محاسب قانوني متمرن )
20 / 9 / 1995 تاريخ زفافي
20 / 9 / 2004 تاريخ ميلاد ابني ابراهيم ( في نفس المستشفى وعلي يد نجل الدكتور اللي انا جيت علي ايده وده لأن الدكتور الكبير كان توفى من سنين ) يعني مش ناقص غير انه يكون لبس نفس هدومي وعلي فكرة هو نسخة مني وانا صغير
غريبة شوية تكرر التواريخ عندي مش كدة ؟؟؟؟؟؟؟؟؟؟؟

**hamedo0** · 30-06-2008 12:09 PM

13/2/82 عيد ميلادى
22/8/98 بقيت خال
22/8/99 خال لاتاني مره
9/10/2002 خال لاتالت مره
دي التواريخ السعيده
دى التواريخ المؤلمه
23/9/2003 وفاه ولدى
25/11/2007 وفاه عمتي
7/4/2008 وفاه عمي
وبقيت مقطوع من شجره