السلام عليكم
الحقيقة يا جماعة أنا شايف إن الناس متحاملين جداً علي العربية دي ، و أنا حاسس إن الناس بتنتقضها من غير ما تكون جربتها أو اتفرجت عليها حتى.
أنا استلمتI10 من حوالي أسبوعين و الصراحة ماكنتش ناوي أكتبلها تقييم قبل ما تكمل ال1000 كم، لكن النقض الزياده خلانى ماستناش.
أولاً: الناس بتتكلم عن موضوع السعر مع إنها في سعر البيكانتو، و هي اكبر من السبارك فطبيعي تبقي أغلي منها.
ثانياُ: من ناحية الشكل أنا شايفها أحلي كتير من البيكانتو و ده رأى كل اللي أعرفهم، و كفايه إنها شبه ال 207
ثالثاً: موضوع انها صغيرة ده بقي ياريت ماحدش يتكلم فيه إلا إذا كان ركبها وجربها، العربيه وسعها كويس جداً وبنركب فيها 5 مرتاحين جداً.
أبلغ الآراء اللي سمعتها عن العربية كان لصديق عنده لانوس وكان بيلوم عليا إني ماجبتش لانوس، بس لما ركب الI10 قالي " تحس إنها عربية بنت ناس أوي، و دي مايتقلش عليها صغيرة خالص "
يمكن يكون العيب الأساسي في العربي دي هو التوكيل زي ما الناس بتقول، بس أعتقد إن مشكلة التوكيل نابعة من كثرة مالكي هيونداي و الله أعلم.
إن شاء الله سأتابعكم بأخبارها كل فترة
سلام