تحذير : سرقه بالاكراه في مواصلات بين المدن

السلام عليكم ورحمه الله وبركاته
موضوع جديد مريت بيه النهارده فقولت احذر منه الاعضاء
وهو السفر وركوب سيارات او مكروباصات للمدن من نص الطريق


من الساعه 4 عصر اليوم 3 سبتمبر والبيت فى قلق ورعب جه تليفون من رقم غريب ردينا طلع اخو مراتي بيقول لنا انا في قسم بلبيس علشان اتسرقت وتعالوا لي والخط قطع
مهما نحاول نكلم الرقم الرقم غير متاح

وبقي اللي نعرفه انه اتسرق وهو حسب ما قال فى قسم بلبيس طب ايه التليفون اللى اتكلم منه وليه مش متاح دلوقت

وحاولت اوصل لحد فى بلبيس يروح القسم يتأكد ان في حد هناك ولا يكون احنا سمعنا الكلام غلط فى التليفون وانه مخطوف مش فى القسم بس لحد وقت قريب مش كنا عارفين
فكنت نازل رايح قسم بلبيس علشان كان خلاص مش فيه الا اننا نشوف ايه الموضوع فى القسم ولا خطف وانا فى الطريق وصل لي الخبر من ضابط معرفه الجماعه فى البيت عرفوا يوصلوا له انه فعلا موضوع سرقه بالاكراه وانه عمل بلاغ و مشيوا من القسم من فتره

فالحمد لله لسه واصل من شوية واطمنت عليه و هوا متبهدل اضرب جامد وواضح انه مضروب علي راسه بجسم صلب ( كعب البندقية) و كان الحكاية كالتالي

اخو مراتي طالب في معهد العبور اللي علي طريق بلبيس القاهره الصحراوي
وكان النهارده فى المعهد لتخليص اوراق العام الجديد وكان معاه صديق له والمعهد اداه مبلغ من المال لايصاله لاحد الاشخاص فى مدينه الزقازيق ( عهده قبض رواتب ناس من الزقازيق )

وللي مش عارف المعهد المعهد موجود على الطريق الصحراوي على طول و مش له مواصلات ثابته والطلاب لما تطلع بتشاور لاي عربيه سرفيس ميكروباص او بيجو ليوصلهم اما للقاهره او بلبيس والزقازيق

اللي حصل ان اخو مراتي طلع هوا وزميله ومستنين مواصله جت عربيه 7 راكب فيها مكان فاضي ووقفت ليهم وركبوا ( لحد هنا الموقف عادي و مفيش فيه اختلاف عن اي يوم )
قبل كارته الزقازيق العربية راحت داخله بيهم فى طريق فى الصحرا ووقفت ونزل اللى فيها ورفعوا عليهم اسلحه منها اسلحه آلي وطلع ان اللي راكب فى العربية كلهم تبع السواق وقلبوا قريبي و صاحبه و ضربوهم لدرجه افقدوهم الوعي و سابوهم ف الصحرا

بعد كده فاقوا ووصلوا للكارته و منها ركبوا لقسم بلبيس وقدموا بلاغ و عرض عليهم صور المشتبهين وطبعا ولا واحد منهم
وقدموا البلاغ ومواصفات العربية بس مش خدوا رقم العربية و من القسم استلفوا فلوس علشان يعرفوا يروحوا


ولحد هنا لازم نقول كفايه
حتى المواصلات الواحد مش مآمن انه يركبها من غير ما يتسرق وكمان يطلع كل اللي فى المواصله حراميه وتبع بعض وكلهم طالعين يسرقوا

ولا دول كانوا معديين والظروف مناسبة قالوا يلا بينا نسرق وصدفه انهم معاهم اسلحه وآلي


الرجا من الاخوه مستعملي المواصلات العامه وبين المحافظات اخذ الحذر وعدم حمل مبالغ ماليه كبيرة بالاضافه ان عده الموبايل مش تكون مطمع

وربنا يسترها علينا
ودمتم بود

ربنا يخليلنا برنامج الشيكروباص مش دى برضوا كانت فكرة البرنامج

ينهار اسود طيب لو كانت بنت اللى ركبت ماهو برضه المعهد اكيد فيه بنات وبيركبوا بالطريقة دى --فكرتنى بموضوع حصل معايا من زمان مع الاختلاف طيعا كنت راجعبن من قرية جنب القناطر مع اثنين اصدقائى الساعة 2 صباح والطريق فاضى بالليل وعلى اليمين زراعات الموز والارض منخفضة لمسافة مترين مثلا او اكثر والطريق مضلم شوفنا عربية بتقع وتتقلب وسط الموز نزلنا بسرعة وكان جاى ميكروباص شركة وقف معانا لقينا عربية 128 قدبمة ومبهدلة وكان فبها راجل وزوجته اطمنا عليهم كانوا كويسين الحمد لله قولتلة تعالى معانا نوصلكم كانوا من امبابة قالى لا لحسن حد يسرق بطارية العربية او يفك العجل وطبعا مكنش لسه الموبايل انتشر قالى خدوا معاكم العيال لة سمحتوا يقصد المدام وطفلين وانا هبات جنب العربية للصبح قولتلة تتحرق البطارية على العربية لحسن حد يطلعلك قالى لا ابدا الدنيا امان واخدنا الزوجة وصلناها لحد البيت وانا مستغرب من تصرفة انما دا كان بيدل على الامان اللى الناس كانت حاسة بيه

الموقف ده حصل تقريبا ما بين الساعه 3 الي 4 عصراً يعني كان فيه نور ربنا

حسبنا الله ونعم الوكيل .

ربنا يستر على الواحد والله بيبقى نصيب عشان بس الناس مش تخاف
المواضيع دي بتبقى نصيب وقدر ولا يسع الواحد الا انه يقبل بقدره ويقول الحمد لله
والموضوع على فكرة مش جديد من قبل الثورة اعرف واحد طلع ميكروباص
ومعاه مبلغ كبير تحويشة عمره ):
فجأة لقى حد بيرش حاجه وفجأة لقى نفسه مرمي في حتة مقطوعة ومتقلب
بس برضه لازم الواحد يعرف انها مسألة قدر
وان حتى لما الدنيا ترجع تتظبط تاني باذن الله لا يمكن الحوادث دي تختفي

ربنا يهدى

سبحانك اللهم وبحمدك ، أشهد أن لا إله إلا أنت أستغفرك وأتوب إليك

!!!!!!!!! الكلام ده برده يوم 3 سبتمبر اللى هو امبارح !!!!! :o

ده الموضوع فيه حاجة بقى !!! انا امبارح برده واحد محامى نعرفة كنا بنتصل بيه عايزينه لقيناه بيقولنا ان اخوه طلع عليه بلطجية وخدوا منه العربية على طريق اسكندرية وكان رايحله فى الطريق !! والموقف اللى انت بتحكيه الوقتى ده فى نفس اليوم يبقى فى حاجه !! يا جماعه ربنا يستررر علييينا كله يامن نفسه على قد ما يقدر وربنا يسترها معاااانا :(

حمد الله علي سلامته. بعيد عن اي حاجه. من. سنتين فاتوا. كانت حادثة السرقه بالاكراه بتقلب الداخليه كلها من اولها لاخرها لدرجة تدخل الوزير شخصيا فيها. لكن دلوقتي. ..هاو. اشكري يا انشراح

ربنا يعوض على الناس اللي بتتسرق (و الله العظيم أعرف واحد أمبارح متقلب في عربيته على طريق سريع - الأسماعيلية)

وضاح أن الفلول شغالة الله ينور ........... بالاضافة أن الشرطة بدأت تخرج في الشارع بأعداد كبيرة فواضح أن فيه حاجة مضادة للموضوع .

بس أنا باطالب الرئيس مرسي ............. بقانون الأعدام للبلطجة لحماية أرواح المصريين .
حرام اللي بيحصل .