الموضوع: استفسار مهم جدا : الغردقة - المنصورة ( اول مرة )

بص يا باشا .... شيك على عربيتك الزيوت و الفرامل و الميه و الكاوتش ... طبعا عدتك تكون كامله و الاستبن ممتاز و لو معاك كمبرسور بتاع البطاريه يبقى تمام قوى ... معرفش ايه زياده ممكن تاخده معاك بس انت ادرى بعربيتك ...
طريق الغردقه القاهره ممتاز بس معرفش هتطلع المنصوره بعد كده منين بس هحاول اوصلك لاول طريق بلبيس الصحراوى او اسكندريه الزراعى
هتوصل المينا فى الغردقه ... هتحط بنزين 92 ... فى الغردقه ارشحلك شل اللى عند المطار او موبيل اللى فى اول طريق الجونه (بس موبل ساعات بتكون مفيهاش و هتضطر ترجع تانى للبلد) فالنصيحه حاول تفول و انت فى ضبا و لما توصل هتطلع من المينا و تاخد الطريق اللى فى اتجاهك و تمشى شويه هتلاقى كذا فندق حنين ... سى فيو او سندريلا و فى واحد جنب سندريلا مش فاكر اسمه بالظبط ... بس ارشح سندريلا لان قدامه باركنج واسع ... هو مش سوبر بس سرير نضيف و حمام و هو ده المطلوب ... العنوان ده اسمه الدهار على البحر ... ممكن تلاقى برضه فنادق حنينه ناحية شارع شيرى ....

الصبح تصحى لو عايز بنزين اسال تروح المطار ازاى و هتلاقى جنبه فى وطنيه و قدامه فى شل (انا شخصيا بفضل شل) هى قدام مدخل المطار بالظبط بس الناحيه التانيه على الطريق البطيء و من جنب المطار شارع على ناصيته وطنيه وده الدائرى تاخده عشان تطلع على طريق القاهره ... هتفضل ماشى فيه هتلاقى ميدان و فيه بنزينة النيل برضه معقوله .... و طوالى حوالى 200 كيلو هتوصل لكمين الجونه (السرعه على الدائرى 90) بعد الكمين طوالى على راس غارب ثم الزعفرانه و السرعه 110
هى150 كيلو لغارب بعد الكمين و 100 للزعفرانه ... الرست فى الزعفرانه عندك واحد قبل البوابات (هتدفع 2 جنيه فى البوابات دى) على الشمال و فى واحد بعد البوابات و البنزين فى موبيل بعد البوابات عند الرست و لو مفيهاش (بس ده احتمال ضعيف) فى وطنيه فى ضهر الرست .... انا مش بحط بنزين غير فى دول و مش بقف فى الرست فى غارب بقف فى الزعفرانه ...
بعد الزعفرانه الطريق فرده واحده و فى ملفات .. السرعه 90 بس خلى بالك و امشى على مهلك ... 80 كيلو هتوصل لكمين السخنه و بعديه الطريق مزدوج تانى بعد 5-6 كيلو هتلاقى يفط ان طريق القاهره على الشمال هتلف يوترن و ترجعله .... لو كملت طوالى تطلع على السويس (و منها اسماعيليه و المنصوره بس اظن من القاهره الطريق انضف شويه) هتاخد طريق العين السخنه و هتلاقى بوابات (هتدفع 5 جنيه) و السرعه 120 ... 100 كيلو هتلاقى بوابات تانيه و بعدها بحاجه بسيطه القاهره .... اخر الطريق فى 7-8 مطبات ورا بعض خلى بالك ...
هتخلص الطريق و هتكون مجبر تخش يمين و ترجع يوترن ... فى طلعه للدائرى يمين تطلعها بعد ما تلف عشان تاخد الدائرى فى اتجاه مدينة السلام .... هتمشى على الدائرى و هتلاقى نفقين تنزلهم (بتوع القاهره الجديده) و طوالى ... لو هتحتاج بنزين فى موبيل على الشمال بعد النفق التانى قبل طريق السويس... و تعدى من فوق طريق السويس و طوالى 10 كيلو هتلاقى تفق السلام تنزله و تمسك الدائرى لحد نزلة الزراعى و منه على بنها و بعدين المنصوره ....
توصل بالسلامه

بالنسبه للصوره الاولى هو الطريق ميه واحده طوالى .... مفيش كسرات عنيفه .... هو الحكايه ان الطريق البرتقالى ده الدائرى اللى قولتلك عليه و فى طريق تانى اللى بيعدى على مدخل الجونه ... لفتره من الفترات الاتنين ماشيين موازى و فى شوارع واصله بينهم ... و ده اللى انت راسمه ...
ممكن تاخد طريق الجونه ده طوالى (و ده من وسط البلد على طول بس فى مطبات لأنه حاليا طريق داخلى و عليه فنادق) و ممكن تمشى فيه شويه لحد يافطة كلية تربيه و تلف يوترن و ترجع على الطريق الواصل للدائرى على الدائرى زى مانت راسم ... و لو رحت عند المطار تاخد الدائرى من اوله ... متقلقش كلهم شغالين تمام و فى الاخر هيودوك لطريق القاهره اللى بيبدأ من عند كمين الجونه

طبعا ممكن بس انا قصدت اوصفلك حاجه من بره القاهره عشان الزحام و العطله .... خلى بالك لو عايز تطلع الدائرى فى اتجاه المنيب بعد ما تلف يوترن ما تطلعش الطلعه اليمين هترجع لحد ميدان و تخش نفق تحت الدائرى يمين و تطلع على ميدان و تلفه و ترجع (كأنك نازل النفق تانى) بس ما تنزلش النفق و تخش من فوقه يمين ... و بعد ما تعدى فوق الاوتوستراد تمشى شويه و تاخد منزل مصر القديمه (اول منزل هيقابلك بعد الاوتوستراد بكام كيلو) لأن مفيش منزل على الكورنيش على طول و المنزل اللى بعده بتاع البحر الاعظم بعد ما تعدى النيل

شوف لو عندك اسئله تانى او فى حاجه مش واضحه انا معاك :)

بص انا لو مكانك هاخد الدائرى ... ممكن يكون فى زحمه عليه بس برضه هو طريق واحد لا يمين ولا شمال ....
اللى انصحك بيه لأن الحته اللى فى اخر طريق العين السخنه بعد المطبات كل يوم بشكل و ساعات بيكون فيها شغل بس انت هتكون الصبح و شايف ... لما الطريق يخلص و تخش يمين هتلاقى قدامك زى طوب محطوط عامل رصيف (يفصل بين حارتين) و انت هتخش يمين ... اخر الطوب ده هتلاقى ناس بتلف و ترجع (ماشيين عكس اتجاهك) و ده يرجعك للنفق لو هتخش مدينة نصر او الدائرى اتجاه الكورنيش... و هتلاقى يوترن ترجع منها لطلعة الدائرى فى اتجاه السلام (المفروض تطلعها) ... لو الدنيا لبخت اسأل اى حد اطلع دائرى اتجاه السلام (او القاهره الجديده) هيشاورلك عليها ...
و اسال براحتك يا باشا :) توصل بالسلامه

حاجه كمان .. فرق المسافه مش كتير .. يعملو 20-30 كيلو ممكن بس مع مسافتك (سايق 10 سشاعات فى السعوديه و جاى من الغردقه) ال 20-30 كيلو دول ولا حاجه :))))

خلى بالك و انت بتقرب على نزلة الزراعى خليك يمين لأن فى رصيف عشان يجبر اللى ينزل زراعى يبقى فى اليمين ... لو فوت النزله لازم ترجع بضهرك و ده حل سيئ او تنزل و تلف من تحت الدائرى او تخش الزراعى من نزلة القناطر و كلها حاجات سيئه ... اول ما تشوف يافطة الزراعى خليك يمين