الموضوع: اسكندرية رايح جاي .. تقرير عن تجربة جديدة مريرة لنقل الملكية

بعد اسبوع مرير بين القاهرة والاسكندرية انهيت بفضل الله اجراءات نقل ملكية سيارتي الجديدة (كيا كارينز 2010)

العربية مرور العجمي بالاسكندرية وانا مرور شبرا (عبود)

انا كان معايا التوكيلات والعقد المسجل لكن النمر كانت اتسرقت ولازم أعمل فحص ونقل ملكية عشان اركب النمر الجديدة ومن هنا كانت البداية

رحت اعمل مذكرة فقد في القاهرة قالولى لازم فى الاسكندرية ان العربية ملاكي الاسكندرية دخلت لنائب المأمور قلتله هي ضاعت هنا قالي تعليمات المرور كده وده معناه مشوار اسكندرية بدون السيارة وانا مش باعرف انام فى المواصلات نهائي والوقت بيمر عليا فى منتهى البطء والسخافة ويبقى يوم مش فايت لو السواق طلع عاشق للشعبيات (تعذيب تعذيب)

بفضل الجي بي اس عرفت ان فيه قسم جنب محطة سيدي جابر أخدت القطر ونزلت سيدي جابر طلعت على قسم سيدي جابر حاجة محترمة جدا .. ناس مبتسمة وتحت أمرك اتفضل ارتاح عاوز اعمل مذكر فقد بالنمرتين قالى النمرتين محضر بس هياخد وقت ونيابة وبتاع فالاسهل تعمل مذكرة فقد لوحة واحدة وبعد يومين تعمل مذكرة باللوحة التانية .. عملت مذكرة باللوحة الأمامية في 3 دقايق ودفعت 3 جنيه ورجعت على البيت وبعد يومين مالقيتش حجز فركبت ميكروباص من رمسيس ونزلوني عند قسم باب شرق .. نفس الموضوع تعامل محترم واتفضل ارتاح وكان ناقص يجيبولي عصير وخرجت بالمذكرة التانية فى 3 دقايق لقيت نفسي بدري قلت اروح المرور اخلص شهادة المخالفات ركبت للمحطة ومنها للعجمي نزلت المرور قالولي شهادة المخالفات فى المديرية القديمة جنب المحطة

رجعت تاني على المديرية عاوزين استعلام من الكمبيوتر اشتريت ورقة وملف وصورت الرخصة والبطاقة (كل ده رميته وماحتاجتش غير الورقة الصغيرة ) وتوقبع وكيل النيابة لان العربية مالهاش نمر قديمة ووقفت فى الشباك الطوييييييييييييييييييييي ل من الساعة 11 وخلاص قدامي فى الطابور 4 او 5 راحو قافلين الشباك لان الساعة واحدة وفشلت كل المحاولات فى اعادة فتح الشباك ونشوفكم بكره بدري باذن الله

رجعت القاهرة وقولت انا كده اروح مرور عبود اعمل فحص وابقى ارجع اجيب شهادة المخالفات وانا باخلص الورق وكده كده انا عملت الاستعلام وخدت تأشيرة الباشا فاجي على الطابور على طول وفعلا تاني يوم نزلت بدري جدا على المرور (وصلت هناك الساعة سبعة ونص) دخلت ساحة الفحص أول واحد وفتحت الكبوت ونمت فى العربية مستني المرور يفتح بعد شوية الناس ابتدت تظهر والمرور فتح .. طبعا كنت اول واحد يقف على الخزنة وبعد الباشا الموظف ما قعد وارتاح وملا مياه عشان الشاي اشتريت الملف وورق الفحص ورجعت على ساحة الفحص

فوطة زفرة ياباشا ربنا يسهلك يومك .. ماشي

تاخد بصمة ياباشا وفاتح ايده .. 10 جنود

جاء الباشمهندس يمتطي الفسبا (لزوم التمويه قال يعني مش بياخد رشوة) وقالي هات الاول الطفاية والمثلث وشنطة الاسعافات .. ماشي

بعد ما خلصت رد الهندسة : للاسف هتروح اسكندرية تعمل مطابقة وياريت كمان استعلام أمني .. ماشي

خلصت على الساعة تسعة ونص قلت لو رحت اسكندرية دلوقتي مالحقش اخلص المطابقة وشهادة المخالفات اروح بكره اخلص الاتنين مع بعض .. طول عمري نبيه ومفتح

نزلت تاني يوم بدري جدا (الساعة خمسة ونص كنت نازل من البيت) وركبت ميكروباص الكيلو 21 عشان اطلع على المرور على طول وركبت عربية كانت رايحة البيطاش نزلتني على باب المرور لقيت المرور هناك بيفتح الباب الساعة تسعة .. قعدت على القهوة اللى قدام المرور لحد ما فتح الباب وكنت أول واحد واقف فى الفحص (شاطر شاطر) وعرفت ان المهندس بييجي متأخر .. رحت عملت الاستعلام الأمني ومضيته وختمته على المهندس ما شرف واديتله الورق قالي هات الملف وتعالى اعملك مطابقة .. رحت اجيب الملف قالولي سعادتك مافيش ملفات لان المرور اتحرق في الثورة (برضه بنحب الثورة) ولازم تعمل ملف جديد وفحص جديد هات العربية وورق الفحص وتعالى
لكن العربية نمرها ضايعة وانا جاي من غيرها .. خلاص هاتلها نمر تجارية ولا تعالى بيها كده بكره واعمل الملف

باظ المشوار الأول طيب الحق المشوار التاني واجيب شهادة المخالفات .. اخدت تاكسي وعلى المديرية القديمة لقيت الطابور هو هو زي ما سبته من يومين .. وقفت وانا بادعي ربنا ان الساعة واحدة ماتجيش عليا وانا واقف مكاني .. وبعد جهد جهيد وشمس حرقت اللى خلفونا حتى الجد الرابع وصلت للشباك

الموظفين هناك ربنا لا يوريكم .. تحس انهم بيعذبوهم عشان يتعاملوا مع اشكالنا بيتعاملوا مع الناس بقرف غير متناهي وتناكة غير عادية وكمان بدون كمبيوتر استعلام يدوي بالملفات وبعد ما طلعت الورقة بدون مخالفات قلت هيييييييييه خلصت .. استنى يا معلم

اختم الورقة فى الطابور ده .. حاضر

اختم تنفيذ الحكام فى الطابور ده .. حاضر

تنفيذ الأحكام بيفطروا استناهم .. حاضر

تنفيذ الأحكام اللى هناك في القسم بيفطروا استناهم .. حاضر

اختم الورقة من الباشا وكيل النيابة .. حاضر

استنوا شوية وجمعوا الورق لان الباشا عنده ناس .. حاضر

ختمنا الورق وطلعت على المحطة ولحقت تذكرة درجة أولى (طواريء ) ونمت من أول ما ركبت لحد ماوصلت القاهرة لأول مرة في حياتي .

وصلت الساعة 5 تقريبا وطلعت على شارع هدى شعراوي اجيب نمر تجارية مافيش نمر خالص

بعد ساعتين يا باشا .. بعد نص ساعة يا باشا .. والله لسه مارجعتش .. راجعين من عيد ياباشا كل سنة وانت طيب وكل اللى واخد نمر مارجعهاش .. فكرت اطلع من غير نمر ومعايا مذكرات الفقد أصلا وخلاص لكن بصراحة انا طول عمري باكره سخافة بتوع المرور خصوصا فى لجان الطرق السريعة .. فى النهاية ربنا كرمني بنمرتين خدتهم وروحت اديتهم للراجل بتاع الجراج يركبهم وانا طلعت نمت فى انتظار يوم جديد من المعاناة

صحيت بدري كالعادة وطلعت على مرور العجمي .. ايوه برافو عليك .. كنت أول واحد فى الصف وجبت الملف والورق واخدت البصمة في انتظار الباشا المهندس ..

باشا الورق الجديد .. المثلث والشنطة .. موجود .. الطفاية .. موجود .. طيب اختمها .. حاضر

تمام كده روح على الشباك اعمل انشاء ملف وهات الملف مع عسكري وتعالى اعملك المطابقة .. حاضر

روحت على الشباك لقيتهم مقسمينه حسب النمر والشباك بتاعى الموظفة اللى عليه غايبة ومنتظرين قرار رئيس الوحدة بتوزيع شغلها على الزميلات أو انتداب موظفة من الاستعلامات تحل محلها والطابو عمال يطول يطول

وانا واقف عمال اسمع اسم محما حسين (محمد حسين) لقيته صول شكله مفتح ومنتشر وفي المكان رحت مشورله يجيلي على جنب كده (فيه هناك مكان في جنب كده تحس انه مخصص للتفاهمات) ورحت مناوله عشرين جندي وقلتله الموظفة غايبة وانا عاوز اعمل انشاء ملف .. عيني يا باشا اشتريلي بس ملف فاضي .. موجود

راح واخد الورق وحاطه فى الملف وكاتب عليه رقم العربية بايده هو وقالى الف مبروك ياباشا عملت الملف .. ثواني اجي مع حضرتك عند المهندس بس هاجيب ملف تاني معايا حبيبي يا محمد حبيبي

طلع محمد على المهندس وجابلي امضاء الظابط والمهندس ورحت انا ختمت وباوريله الورق قالي فيه مذكرة فقد مكتوب فيها الرقم غلط .. يادي اليوم الكموني .. ولا يهمك يا باشا قسم الدخيلة قريب جدا اعمل فيه مذكرة جديدة وخلاص

رحت قسم الدخيلة حسيت اني رجعت سنين لورا .. استيفا ضلمة وماحدش عاوز يعمل حاجة لحد

هات ورقة من برا .. حاضر

املاها هو احنا هنملاهالك .. حاضر

امضيها من الظابط .. حاضر

وريني العقد .. حاضر

وريني التوكيلات .. حاضر

مش واضحة قوي .. معلش

صورلي الورق .. حاضر

ادفع الفلوس .. حاضر

صورلي ورق مذكرات فقد .. حاضر

مش لاقيين الختم استنى .. حاضر

الختم مع حسين .. مش لاقيين حسين .. ماشي

الختم عند المأمور روحله .. حاضر

استنى شوية فيه اجتماع .. حاضر

لما زهقت رحت داخل عليه فى الاجتماع وختمت الورقة ومشيت

كنت تعبان جدا ومتبهدل من الحر طلعت على on the run كلت وشربت شاي وغسلت وشي وكله تمام نتوكل على الله

ولاني كنت استحق بعض الترفيه حصل موقف لطيف وانا ماشي خفف عليا شوية .. عند البوابة لقيت أمن مصحصح كتير ورشاشات وبتاع تقريبا عندهم اخبارية عن حاجة وانا داخل لقيتهم موقفين عربيا سيراتو فيها شباب صغير (شكل الواد اخويا الصغير الرخم لابسين حاجات فى رقبتهم وشورتات عجيبة ) ومنزلين كل حاجة في العربية على الأرض وبيفتشوهم .. وانا ماشي لاقيتني بانام ريحت تحت كوبري من الكباري الجديدة اللى بيعملوها دي ربع ساعة ومشيت بعد شوية لقيت لجنة كبيرة وقفني الظابط .. رخص .. اتفضل .. عامل فاميه ليه .. ده فابريكة يا باشا .. وانا ايش عرفني .. مثبوت فى الرخصة .. المهم بارغي مع الظابط لقيت يا عيني نفس الشباب بتوع السيراتو .. موقفينهم ومنزلين كل حاجة فى العربية وبيفتشوهم كنت هاموت من الضحك وقلت الحمد لله ان الواحد منظره محترم ومش بيبهدل في نفسه

المهم اطول عليك اكتر من كده عديت على خالى بالليل قالى انت فين مش باشوفك .. حكيتله الحكاية .. قالي خد النمرة دي بتاع حد فى المرور واول ماتروح هناك كلمه وهو هيظبطك

طلعت على المرور الصبح .. انت فاهم بقى مشوار اول واحد والحركات دي .. ورحت الفحص اعتمدت المطابقة وعملت التأمين الإجباري وكلمت الراجل صاحب خالي قالي خش على مدام هويدا هيا مستنياك .. مدام هويدا متأخرة .. ظهرت اخيرا .. انا من طرف فلان .. اهلا وريني الورق .. ايه الحاجات دي .. شهادة المخالفات عاملة كده ليه .. ايه مذكرات الفقد دي ؟ .. شوف يا استاذ .. تطلع على اسكندرية تدريهم الورق ده كله ويدوك شهادة بيانات مكتوب فيها

لا يطالب بالرخصة
لا يطالب باللوحات
لا يطالب بشهادة المخالفات
لا يطالب بنموذج 105

وكتبتهملي في ورقة وادتني نمرتها قالتلي لو فيه اي مشكلة كلمني من هناك اخلصهالك بس ماتروحش دلوقتي لان الساعة داخلة على 10 و مش هتلحق تخلص

قلت ما بدهاش رحت جايب النمر التجارية تاني وقلت اخد العربية عشان لو طلعلي اي (تيت) تاني اخلصه وعلى العجمي من بدري .. أول واحد طبعا .. وعلى حبيبي محما حسين على طول .. صباح الفل يا باشا .. عشرين جندي .. عاوز اسلم الحاجات دي واخد شهادة بيانات بالمواصفات القياسية .. عيني يا باشا

خد مذكرات الفقد واعمل نشر على ما اخلصلك الاستعلام الامني .. حاضر

امضي واختم .. حاضر

امضي الورقتين دول من الظابط .. حاضر

كلم المدام عالشباك .. حاضر

هاتلنا ورق شهادة البيانات وطوابع شرطة .. حاضر

عاوز شهادة بيانات فيه كل ده ؟ .. بعد اذنك

عيني ليك دانا هاعملك احلى شهادة بيانات واظبطك .. عشرين جنيه فى الدوسيه

مبروك ياباشا الورقة بتتكتب في الكمبيوتر بس عاوزين امضا هنا .. حاضر

استنى بقى ياباشا فى الضل هنا على الورقة ما تتكتب .. حاضر

الورقة فضلت على مكتب الموظفة اكتر من ساعة عشان تكتبها لانها كانت زعلانة مع واحدة زميلتها ومش عاوزة تشنغل

المهم فضلت ييجي ساعة كمان لحد ما ندهوا اسمي اخيرا واستلمت الشهادة حوالي الساعة 1 يعني اليوم راح

تاني يوم على عبود من بدري .. انت فاهم بقى .. دخلت على مدام هويدا ناولتها الشهادة والورق واستنيت شوية - اصلها أصلا فى شبك تجديد مش نقل ملكية - لحد ما فتحت الملف وطلبت مني ادفع 115 جنيه فى الخزنة والف مبروك.. ونقيتلك نمرة حلو كمان .. أي خدمة .. ورقك فى المراجعة .. استنى فى الضل لحد الرخصة ما تطلع .. ساعة ولقيت اسمي بيتنده .. تصريح 3 شهور لحد الملف ما ييجي من الاسكندرية

ياااااااااااااااااااه اخيرا الرخصة .. مسكتها فضلت ابحلق فيها زي محمد سعد وهو ماسك الكراسة الصفرا فى فيلم الليمبي ييجي عشر دقايق .. وطلعت على مخزن اللوحات استلمت النمر وركبتها وبقت عربيتي وبأسمي .. وخرجت من المرور لقيت لجنة عند المظلات .. اديتله الرخصة بص فيها وضحك وقالي دي لسه سخنة .. قلتله اوعى تلسعك يا باشا وروحت البيت نمت لحد تاني يوم



نصائح هامة لكل شخص على وشك التعامل مع المرور :

- الخروج بدري بدري بدري بدري لان ده الحل الوحيد للانجاز عشان بمرور نص ساعة من فتح المرور تلاقى الطوابير بقت بالكيلو متر .. انا كنت باخرج من البيت الساعة 5 لو رايح اسكندرية و7 لو رايح عبود وكنت دايما اول واحد فى الفحص والخزنة ونقل الملكية .. انت عارف طبعا

- صور العقد (ولو فيه توكيلات) والبطاقة والرخصة قد 3 او 4 صور قبل ما تتحرك لانك هتحتاجهم

- اسأل كتير عن كل التفاصيل اللى ممكن تحتاجها فى كل خطوة لانك ممكن تخرج وفيه امضا ناقصة أو ختم وساعتها هترجع تاني

- موظفين المرور (موظفات فى الغالب ) تحس انهم بيستمتعوا بتعذيب الناس وبيتأمروا عليهم آخر حاجة فانت تصبر وماتزهقش وابتسم كده وناغشهم عشان بيحبوا الرغي والملاغية .. مشاكل زوجية فى الغالب

اعتذر عن الاطالة بس عن تجربة الواحد اللى داخل على المشوار ده بيكون فى حاجة لأي معلومة تنفعه وانا اتمنى اني انفع حد بالموضوع ده

تحياتي للجميع

المشاركة الأصلية كتبت بواسطة hossam_elwani

فعلا انت عندك جلد وصبر ايووووووووووووووووووووووو ووووووووووووب

اقسم بلله انا لو مكانك كنت حبيع العربيه فوراااااااااا معنديش خلق للكلام الفاضى ده

انا رخصة القيادة بتاعتى بنقلها من مرور لمرور تانى شوفت الذل بس على سنه لما خلصتها اه والله بعد سنه من ذل الموظفين وانا معنديش خلق انى اروح كل يوم بلطريقه دى ... كفايه وقف الحال ياراجل

هو حضرتك كنت بتاخد اجازه ولا ايه ؟؟؟

انا استحااااااااااااااااااااا اله اروح المرور ايام ورا بعضها كده بلطريقه ده ممكن يجيلى مرض نفسى بسبب المعامله القذره والروتين القذر ده

والدرس المستفاد من القصه دى ان ايااااااااااااااااااااااا ك انك تشترى عربيه من محافظه تانيه مهما كانت الاغراءات

وبأمناااااااااااااااااانه انت ليك الجنه

تحياتى وادعلنا ان ربنا يمن علينا بشوية صبر من الى عندك هههههههه

انا والله جه عليا وقت فكرت ارجع العربية لصاحبها .. بس الوقت اللى كان هيضيع هو هو ويمكن اكتر على مالاقي عربية تاني وبرضه هانقل ملكية وقرف المرور موجود في كل مكان ويمكن كانت تطلع مرور فيصل ولا السلام ولا الحوامدية وساعتها برضه كانت هتبقى أزمة .. وبعدين كل يوم الواحد كان يقول لنفسه خلاص هانت كلها بكره ولا بعده .. ده غير دعاء امي وابويا ومراتي وحماتي .. كلهم كانوا بيدعولي عشان عارفين اني مش حمل البهدلة دي وعشان كده ربنا كا بيقويني .. والله كنت باخلص الشغل الساعة12 بالليل وافضل صاحي عشان لو نمت مش هاعرف اصحى بدري .. يااااااه دي كانت ايام سودة .. الحمد لله وربنا يرزقك الصبر دايما باذن الله