تقييم بريدجستون my-01 مع لوجى
ازيكوا يا عفاريت اللوجان يا رب تكونوا بخير
الحمد لله اشتريت للوجى كوتشى اديداس
و الموضوع دة محير بطريقة فظيعة بالذات مع كثرة الانواع والنقشات
ورسيت فى الاخر على بريدجستون
الكاوتش بريدج تايلندى ( sports tourer MY - 01 ) دورت على نفس مقاس اللوجان مافيش خالص مقاسها اللى هو 65/185
المهم ركبت مقاس قريب وسبق و حد جربه فى القسم اللى هو 60/195 هو اعرض سنة
بس مش قوى ومافيش اى تاثير سلبى ملحوظ حتى الان
ودة شكل الكاوتش
http://im18.gulfup.com/2012-09-05/1346854808131.jpg
http://im18.gulfup.com/2012-09-05/1346854808132.jpg
تقيمى حتى الان للكاوتش انه ممتاز جدا مقارنتا بالكورموران حتى وهم الاتنين جداد البريدجستون يتفوق بمراحل
العربية اثبت فى الملفات واهدى وانعم فى الطرق العادية و المكسرة على الرغم
من ان فى موضوعات قراتها ان my-01 صوته عالى و بيلم ظلط
لكن الحقيقة موضوع الصوت دة غير ملحوظ لكن فعلا بيلم ظلط شوية
بس قصاد المميزات اللى انا حاسسها فى الكاوتش فهى صفقة رابحة بكل المقايس
...................
غيرت الاربع الفرد فى فرع كليوبترا الفردة ب 534 ج بالترصيص والنيتروجين ومعطر هدية كمان
وروحت علشان اظبط زوايا فى لوران الراجل قالى العربية مظبوطة على الشعرة
الموضوع دة كان غريب شوية
علشان اولا انا كان عندى حدفة فظيعة ناحية اليمين بس هى الحمد لله اختفت بعد ما غيرت الكاوتش
وثانيا علشان انا مظبطش زوايا غير مرة واحد من سنتين مثلا .. قولت والله يا لوجى كتر خيرك
قولت اكافاها وودتها تتظبط شوية فى الكار كير
.................................................. ..
خلاصة التجربة ان الكاوتش ممتاز جدا وزود للعربية ثبات حلو وملحوظ وهدوء مع المطبات والطرق المكسرة
ولسة عايز اجربه على السرعات العالية واعتقد انه حيكون كويس لانه عليه رمز v
يعنى معاك لحد 240 ك/س يعنى احنا فى الامان
الكاوتش لسة جديد ومع الوقت حيبان جودته وقدرة تحمله للاراضى الغريبة اللى بنمشى فيها
ولو عمره الافتراضى كويس يبقى تمنه فيه بالذات انه قريب من تمن الكورى ولو اثبت كفاءة معايا
المرة الجاية حركب اليابانى ان شاء الله مش خسارة فيه الفلوس
......................
وفى النهاية بشكر بريدجستون على حسن الضيافة .. ناس محترمة جدا
وساعدونى ان ابيع الكاوتش القديم