ما حدث تجاه حل مشكلتى مع الجين 2 و توكيل عز العرب

**ahmedsiyam** · 30-06-2008 05:20 PM

السلام عليكم

احب اوجه تحياتى الحارة لكل الاخوة الافاضل اللى كانوا مشاركين فى الموضوع وابدوا اهتمام واضح بالمشكلة و تمنايتهم ليا بانه الموضوع يتحل
فى اخوة افاضل كتير بعتولى على الخاص برضه و عندهم مقترحات لحل مشكلتى اشكرهم جميعا على الاهتمام و ده كان متوقع من رجالة نايل موتورز المحترمين

طبعا المشكلة كلكم عارفينها و مافيش داعى نخوض فى اى تفاصيل تانية و ارجو المعذرة انا فى الاول كنت حامى جدا لانه بصراحة كانت صدمة غير متوقعة فى العربية و اداء التوكيل فى اتخاذ الصيانة اللازمة
انما بعد كده الامور بدأت تهدى شوية و بدأت احكم على الموضوع بهدوء شوية

المهم انا بعت ايميل للشركة الماليزية باقولهم فيها على المشكلة بدون التطرق لمشاكل الصيانة اللى حصلت و ركزت معاهم ان العربية انتاج قديم و فيها مشاكل قديمة كتير اخطرهم الدهان و اللى لو تم علاجه هايقلل من قيمة العربية جدا

جالى بعدها بحوالى 4 ايام رد من السيد المهندس / احمد عبد الحميد - مدير خدمات مابعد البيع و مدير الصيانة بعز العرب - بيقولى انه فى انتظار تليفون منى علشان تحديد ميعاد علشان يتم اتخاذ كافة الاجراءات اللازمة لحل مشكلة العربية

قابلت السيد الفاضل/ حبيب ابراهيم حبيب - مدير بروتون و المهندس / احمد عبد الحميد و كان متفهم جدا لشكوتى و قام بنفسه جرب العربية وتاكد من الشكوى بنفسه و ملاحظاتى على العربية و كلف احد المهندسين بتصوير العربية برضه علشان التقرير الفنى اللى هايتبعت مالزيا

بالنسبة للمشاكل اللى حصلت مع فك التابلوه استدعى السيد المهندس مدير الورشة و ساله على اسم المسئول عن فك التابلوه و كلفه باتخاذ كافة الاجراءات اللازمة لفصل العامل المذكور و بعد تدخل منى علشان مايبقاش بسببى قطع عيشه فى المكان ده تم نقله لقسم تانى خالص
وطبعا الاجراء موش علشانى و انما لعدم تسبب العامل ده فى مشاكل تانية فى عربيات الناس اللى مالهاش ذنب

انا طبعا باحكى باختصار شديد علشان ماطولش عليكم لان اليوم ده كان طويل جدا

السيد المهندس احمد عبد الحميد قالى هانبعت التقرير لمالزيا و هاستنى ردهم و ابلغك بس عموما كل المشاكل الفنية اللى عندك هايتم التخلص منها نهائيا و تغيير اى جزء باخر جديد و العربية هاستلمها منهم زيى ما انا عايز و احسن بس هو كان رافض تماما رش العربية لانه هايقلل من قيمتها

المهم مالزيا ردت على التقرير الفنى بانه يتم تغيير الكبوت و الرفرف اللى فيهم مشاكل فى الدهان بس رد عليهم المهندس احمد بدون الرجوع ليا حتى بانه حتى لو غير الكلام ده السقف هايعمل فيه ( لان السقف طاله التقشير برضه ) رد طبعا منطقى منه لانه حط نفسه مكانى

اخيرا تم عمل مكالمة تليفونية بينى و بين السيد حبيب ابراهيم حبيب - مدير بروتون و المهندس / احمد عبد الحميد يوم الاربعاء السابق
تم مناقشة الحلول المقترحة لارضائى كعميل يتم اختصارها كالتالى :
- يتم اعطائى ضمان سنة اضافية على السيارة و ايضا اعفائى التام من جميع مصاريف الصيانة طوال فترة الضمان شاملة قطع الغيار المستهلكة ايضا يعنى بالعربى كده هادفع ثمن البنزين بس طوال فترة الضمان عدا التلفيات اللى انا متسبب بها زيى الحوادث لاقدر الله
-توفير مشترى يتمتع بجميع المزايا اللى هاخدها طول فترة الضمان و اخد انا الفيس لفت الجديدة المنتظر وصولها قريبا و يتم عمل خصم معقول على السيارة فى حدود النسبة المسموح بها من قبل التوكيل

الكلام اللى اكده الاستاذ / حبيب ابراهيم انه التوكيل معايا انا و فى صفى انا و العميل فى ايد امينه و انه لو للعميل حق هايخده و لو على رقبته
المهندس / احمد عبد الحميد قال لو الشركة المصنعة عندها عيب المفروض تتحمله موش التوكيل و لا العميل

من وجهة نظرى انا شايف ان التوكيل قام باللى عليه و انا راضى تماما عن الحل المقترح لمشكلتى و انا حاليا لسه باقرر و الناس سايبنى على راحتى لحد لما ارد عليهم بس مستنى اعرف سعر العربية الجديدة

**tutankhamoun** · 30-06-2008 05:21 PM

الحمد لله يا أستاذ أحمد على حل مشكلتك
و الحمد لله التوكيل طلعوه محترمين و فعلا بروتون شركة محترمة
و عز العرب بيتحسن يوم عن يوم
ربنا يباركلك في أختيارك أيا يكن
و يبارك للهايشتري العربية منك

**ahmedsiyam** · 30-06-2008 05:25 PM

مشكور يا توت باشا

**fahd_628** · 30-06-2008 05:25 PM

الحمد لله و فعلا الشركة و التوكيل تماام !

الف مبروووووووووووك بجد انا كنت زعلانلك جدا جدا

**ahmedsiyam** · 30-06-2008 05:32 PM

شكرا يا فهد ربنا يخليك

**SAbuhashem** · 30-06-2008 05:38 PM

نقطة جديدة قد ترجح كفة الجين ٢ في مقارنتها مع أبناء فئتها في نفس السعر عند الشراء

بالإضافة إلى عوامل الأمان الموجودة فيها وغير موجودة في سيارات أخرى

Thanks
Eng.Sherif Shaker

**AhmedGen2** · 30-06-2008 05:42 PM

الحمد لله :)

شوف يا استاذ احمد لازم تعرف إن اللى هتنزل من غير Ebd ولا Abs ، إنما كخامات وموتور أفضل من الحالية.

واضح من المقترحات إنه لن يتم تبديل السيارة لك ، لازم تلاقى مشترى الأول.

وأنا بصراحة شايف إيجاد مشترى للسيارة واستبدالها بالجديدة مع دفع الفرق خيار موفق ، أفضل بكتير من استمرارك بالحالية ، بغض النظر عن المميزات التى ستحصل عليها.

عموما ربنا يوفقك فى الاختيار وابقى طمنا عليك

**Islam_galal** · 30-06-2008 05:42 PM

الحمد لله
مش عارف أقولك كنت زعلان قد إيه
و بصراحة الحل ده مكنتش متفائل إنه حيحصل
الحمد لله و منتظرين النهاية السعيدة
أنا أفضل إنك تغيرها علشان نفسيتك تبقي مرتاحة

**som3aa** · 30-06-2008 05:55 PM

الف مبروك على الحل دا و فعلا دا حل ممتاز (لانهم بصراحة شديدة مستحيل يرجعوا عربية و دى من قواعد توكيلات العربيات فى مصر و بره) و بصراحة التعويض مجزى فعلا.
علشان حضرتك بس شخص محترم تستاهل كل خير

**yasserayad** · 30-06-2008 06:03 PM

والله انا سعيد جدا عشانك يا استاذ احمد
ان شاء الله تكون سعيد بالعربيه قريبا ان شاء الله

الموضوع: ما حدث تجاه حل مشكلتى مع الجين 2 و توكيل عز العرب

LinkBack

أدوات الموضوع

عرض

ما حدث تجاه حل مشكلتى مع الجين 2 و توكيل عز العرب - انشر الموضوع فى :

-

-

-

-

-

-

-

المواضيع المتشابهه

كلمة حق فى توكيل vw و مشكلتى مع الفتيس الdsg

استلمت الجين 2 من عز العرب :)

توكيل عز العرب

توكيل ذل العرب

توكيل غبور ولا توكيل عز العرب

الكلمات الدلالية لهذا الموضوع

المفضلات

المفضلات

ضوابط المشاركة