الحمد لله غيرت كاوتش سيارتي من كام يوم ..
كان الكاوتش اللي فيها بتاع الفابريكة وكان هانكوك 14/185/65
والحقيقة مارضيتش أغير في المقاس بالرغم من أن البعض نصحني بالتغيير إلى 14/195/60
رحت لأكثر من محل ، وسمعت أنواع أشكال وألوان
لكن في النهاية هداني الله عز وجل إلى مركز Check Point اللي في بنزينة وطنية على الأتوستراد ( بين المعادي وطرة اتجاه حلوان ) ووجدتهم واخدين توكيل جوود يير ، و نيكسن
أسعارهم قد تكون أعلى حاجة بسيطة من المحلات .. لكن الحقيقة عندهم مزايا كويسة تخلي الواحد يشتري من عندهم ..
- طبعاً التركيب ونفخ النيتروجين والترصيص عليهم ..
- أعطوني كارت متابعة .. بحيث كل 10000 كيلو متر أروح لهم .. يغيروا وضع العجل ، ويرصصوا ، وينفخوا نيتروجين ، ويغيروا البلوف ..
- تزويد العجل نيتروجين مجاناً طوال فترة الـ 40000 كيلو ( عمر الكاوتش ) .. في أي وقت .
- ضمان ضد عيوب الصناعة ..
....
والحقيقة بعد ما غيرت الكاوتش .. تاني يوم وانا رايح الشغل لقيت عجلة منهم ع الأرض .. ودي أول مرة تحصل معايا ..
حطيت الاستبن ، ورحتلهم شايط ..
هدوني .. وخدوا العجلة كشفوا عليها .. ووجدوا خرم في الإطار من ناحية جسم السيارة من الداخل ..
لكن بعد الكشف الدقيق .. وجدوا أن هذا الخرم ليس به آثار مسمار أو زجاج أو ما شابه ..
فكلموا مهندس الصيانة .. فقالهم .. خلاص أعطوله فردة جديدة مكانها ..
وفعلا أخرجولي فردة جديدة مكان المخرومة .. وركبوها
ودي ميزة إن الواحد يشتري من توكيل .. لإن ماعتقدتش إن أي محل كان ممكن يعمل كده ،، وأعقتد أنها كانت ممكن ترسى على خناقة لإنه طبعاً هايطلعني أنا الغلطان ،، وهايقولي نديها خابور ،، وهو أمر طبعاً مرفوض ،، لإن ماينفعش أكون لسه مغير الكاوتش إمبارح ،، وأديله خابو النهاردة
.. لكن الحمد لله ربنا ستر ..
أنا شايف أن التوكيل ده محترم ،، والناس اللي فيه محترمين ..
عيبهم الوحيد إنهم ما بياخدوش الكاوتشات القديمة ،، وده اللي خلاني رميتهم ،، بالرغم من إنهم كانوا زي الفل ، ومافيهومش غير خرم واحد ملحوم ..
وزعلت قوي بعد لما قاللي أحد أصدقائي إني كنت ممكن أبيعهم ،، الفردة بخمسين جنيه
...
سعر الكاوتش : 413 جنيه .. جنوب أفريقي (H) .. صناعة إبريل 2012
وكان فيه التركي (T) بـ 400 .. لكن صناعة يوليو 2011
ففضلت الحديث ..
وربنا يباركلي فيهم