صني 2013 - صيانة 5000 كيلو

**the_air_devil** · 08-09-2012 06:09 PM

سلام عليكم يا صقور يا أجدع شباب

الحمدلله رب العالمين ربنا وفقني ولسة راجع من عند توكيل السبع في المعادي .... وعملت صيانة ال|ـ 5000 كيلو

1- حالة العربية قبل الصيانة:

صوت الموتور بدأ يعلى بشكل ملفت ... خصوصاً اني كنت حاطط زيت معدني 5000 فقط ... السحب كان ممتاز فقط في حالة لو افتريت على دواسة البنزين ... كان الاستهلاك في البنزين بدأ يزيد شوية

2- الصيانة : غيروا زيت الموتور والفلتر وطلبت يكون تخليقي 10000, والسبع بيحط زيت شل...مش قادر احدد هي خدت كام لتر, ورق الصيانة كان مكتوب في إحداها انها خدت لتر ونص, وورقة تانية مكتوب فيها 3 لتر ... لست أدري

تربيط العفشة, وفحص الأنوار ومستوى كل الزيوت والسوائل في العربية , تنضيف فلتر الهوا, رجلشة فرامل اليد .... وتظبيط الفرامل العادية

وكنت طلبت فحص علبة الدركسيون علشان كان فيه صوت تكتكة بيظهر في بعض الأحيان , كشفوا مالقيوش حاجة وفي الآخر اكتشفت انه لسة موجود وبيطلع فقط وقت تشغيل الفلاشر يمين وشمال ... وماطلعش حاجة جوهرية ولا خطيرة دي تكة أو اتنين وأول ماقفل الفلاشر بتروح !! وصوتها زي مايكون بلاستيك مش طقة كبيرة ولا ليها أي تأثير على أداء الدركسيون والباور

3- حقائق عرفتها وانا هناك:

العربية بتيجي من غير فلتر تكييف ... ولو عايز تركبه تكلفته الإجمالية حوالي 240 جنيه بالمصنعية بالضريبة , وانا أصلاً مش محتاجه وماعنديش نية لتركيبه

البطارية: قبل ماروح بصيت عليها, واكتشفت اني الحمدلله من سعداء الحظ اللي عندهم بطارية جافة !!! ولما حكيتلهم ماصدقونيش وقالوا كلها بتنزل بطارية سائلة ... واضح ان المصنع كان بيتصرف لما يحصل تقصير في توريد البطاريات وبيجيب جافة يمشي بيها حاله, طالما عربيات نازلة قبلي وبعدي كان فيها سائل وقلة مندسة فيها بطاريات جافة !! ... كدة كدة كله هايتغير وماعتقدش حد هايرجع للبطارية السائلة تاني

ماينفعش اركب وحدات رفع علشان فيها لعب في الضفيرة..وده بيخرج الأماكن المتعدلة من الضمان.. والأستاذ احمد مصطفى كعادته رجل محترم وشديد النفع كان حذرنا من الحكاية دي قبل كدة, وحبيت كمان اجيبهالكم من بق مهندس التوكيل كمان

العربية إنذارها لسة مانزلش, وأي حاجة بتركب عليها دلوقتي مش بتاعتها, ولسة مش عارفين هاينزل امتى

اللي حابب يركب حساسات ركن, بتتكلف حوالي 400 جنيه بالمصنعية

4- أداء العربية بعد الصيانة:

بسم الله ماشاء الله...فرق السما والأرض العربية سحبها بقى ممتاز, وأكيد تأثير الزيت الجديد والتخليقي بيفرق, وكمان صوت الموتور اختفى وبقى زي الأول غير مسموع... فرامل اليد عليت شوية علشان الرجلاش ... الفرامل العادية بقت بتمسك بشكل أكبر وأسرع....علماً بأن صوت التزييق بتاع الفرامل اللي عامل زي صوت التريللا ده مستمر في الاختفاء كل مابامشي مسافات زيادة

عايز اقول اني مادفعتش حاجة من جيبي علشان زي ماحكيت زمان السبع كان مدي صيانة الألف والخمستلاف تغيير زيوت وفلتر ببلاش ...هدية مع العربية .... ومنطقة الانتظار بتاعتهم كويسة وبيديك كمان كوبون خصم 15 جنيه على الكافيتيريا بتاعتهم, تشجيع يعني

المهم ... باحب اطمن كل مالكي السيارة انها الحمدلله بتفرق كتير بعد صيانة الخمستلاف ... والحمدلله رب العالمين ماظهرتش عندي حتة التزييق في المساعدين...تزييق فرامل بس ... واضح انه لا يجتمع على النيسان تزييقان

يارب اكون أفتدكم بحاجة كويسة وربنا يجعلها في ميزان حسناتنا ... وحسنات كل القائمين على المنتدى الممتاز ده وبالأخص قسم نيسان وأعضائه الكرام

**saint2011** · 08-09-2012 06:17 PM

مبروك يا باشا الصيانة وعقبال ال 100000 كم

**د.هشام** · 08-09-2012 06:41 PM

ألف مبروك على الصيانة وربنا يحفظلك عربيتك

**szaalouk** · 08-09-2012 07:37 PM

الف مبروك الصيانه و عقبال ال ٥٠٠٠٠٠ و ربنا يحفظهالك من كل شر

**Ahmed_Ramadan** · 08-09-2012 07:43 PM

ألف مبروك الصيانة و نصيحة أخوية ذهبية دور على فلتر التكييف علشان ده مهم جدا ..هتقول ليه ؟؟

هقولك علشان الفلتر هو اللى هيشيل التراب و البلاوى اللى داخلى للعربية و بدل ما تضطر تفك التابلوه قدام شوية علشان تنضف الكويل الداخلى بتاع التكييف ...مجرد هتفك الفلتر و تنفخه هوا أو بالكتير تغيره

**GRADER** · 08-09-2012 09:06 PM

ألف مبروك يا باشا

هو تركيب الباركنج سينسور ده ب 400 جنيه عند السبع ولا فين؟؟ وياترى عند أوتو ايجيبت بنفس السعر؟؟

مش مصدق ان العربية مش نازله بفلتر تكييف وان احنا الى لازم نشتريه لأ وب 240 جنيه كمان !!! على كده الواحد يشيك على فلتر البنزين والزيت كمان أحسن يكونو عاملينهم أوبشن برضه !!

**mohamedsapri** · 08-09-2012 10:25 PM

شكرا على التقرير غقبال صيانة 300000 ان شاء الله

**zambarota** · 09-09-2012 12:20 AM

مبروك على صيانه ال ٥ الاف

ان شاء الله هاروح السبع المعادي فى الصيانه الجايه

**Ahmed.TV** · 09-09-2012 01:32 AM

دايما بتفيدنا يا استاذ احمد بتقاريرك وارائك القوية

بس بالله عليك .. بلاش تحط زيت معدنى تانى وخاليك فى التخليقى

والف مبروك الصيانة عقبال صيانة المليون