جديد ولا مستعمل؟ فيرنا ولا لوجان ولا جولف؟ دماغي هتطق!
مساء الخير علي منتدانا الغالي
أيوة زي ما مكتوب في العنوان...أنا محتار جدا في شراء عربية وانتم دايما بتفيدوني وما خاب من استشار وعشمي فيكم كبير بعد ربنا سبحانه وتعالى. أنا هرغي كتير فاللي مش فاضي يقلب الموضوع ويخش على اللي بعده! ههه
أولا أنا بطلت سواقة من 7 سنين ودلوقتي بتعلم من أول وجديد والمرة دي في مدرسة لتعليم السيارت فيها نظري وعملي (مع العلم معايا رخصة سارية من أيام ما كنت بسوق)
معطى واحد: جديد في السواقة
ثانيا: أنا كنت عامل حسابي على 50 ألف ميزاينة لكن مش كفاية فجيت على نفسي شوية ورفعت ل 70 (اللهم زد وبارك واحفظهم من العين)
معطى اتنين: الميزانية 70
ثالثا: استعمالي للعربية + ميولي الشخصية/الذوقية كتالي:
1. أنا بفضل الهاتشباك على السيدان، بس مش ضروري
عشان شكلها أحسن في نظري (زي شكل ال Megane Hatchback مش ال Picanto) وكمان أريح في الركنة هههه
وأنا لوحدي وهيكون معايا والدتي بس، فمش فارق معايا موضوع العربية لازم تكون كبيرة عشان تشيل عدد
2. مشاويري هتكون متوسطة ومعظمها داخل المدينة
بس برضه مرتين في الشهر هكون واخد بعضي ومسافر اسكندرية أو الغردقة أو دهب في آخر الأسبوع وأرجع تاني قبل بداية الأسبوع الجديد، فمحتاج عربية تستحمل الكلام ده
3. عايز عربية شيك وكمان صالونها من جوة واسع ومريح لأني مش قصير والتكييف القوي أساسي
4. عايز عربية (نسبيا على الأقل) ما تخربش بيتي في البنزين
كدة كدة هحطلها 92 بس برضه مش هشتري عربية من فئة SUV مثلا
5. عايزها ما تخوتنيش وكل شوية عند الميكانيكية
وده سبب خوفي من شراء المستعمل حتى لو هكشف في الوكيل، برضه مش مطمئن
6. كان نفسي في عربية جديدة بس الجديد اللي في حدود ميزانيتي مش الألماني اللي أنا عايزه
ثالثا وأخيرا: حاطط عيني على فولكس جولف 4 (موديل 2000-2003 تحديدًا، مش اللي من 1997-1999)
وشفت أسعارها على موقع cc عاملة ما بين 60-70 ألف، وفي منها حالات كويسة
بس ماشية ما بين 100 و 200 ألف كيلو، فمش عارف بقى ده يأثر ولا عادي
خوفي الوحيد من حاجتين: قطع غيارها هتبقى غالية وأنا لسة جديد في السواقة فاحتمال كبير يحصل حاجة ولو إني بطلت موضوع التهور في السواقة ده من زمان :)
الاختيارات اللي قدامي بديلا عن الجولف 4 وتكون جديدة هي:
+هيونداي فيرنا...بس صالونها من جوة الfinishing مش عاجبني وضيق شوية والعربية الموديل اللي قبل 2010 كانت بتاخد المطبات كلها وتوكيل غبور الكلام عنه مش ظريف بالمرة ...غير إنها مش ثابتة قوي بعد الـ 120 حتى لوهزود التقل ورا بإني أركب غاز مثلا (دي كانت نصيحة من سواق وجه واحد تاني قاله مش هتفرق كتير)
+رينو لوجان...بس هي سيدان وشكلها مش عاجبني. من جوة لسة ما شوفتهاش بصراحة
واحد قالي هات 127 ب 13 ألف واتعلم عليها وخبط فيها براحتك
بس شكلي لو جبتها هاخد أجازة وأقعد ألف بيها على الميكانيكية!
وآسف على الإطالة :)
