الموضوع: استفسار بخصوص السفر لشرم الشيخ بالعربية.

المشاركة الأصلية كتبت بواسطة marsguy

من كارفور المعادي حضرتك هاتكمل في إتجاه التجمع وتعدي مخرج التجمع وتنزل نزلة طريق السويس اللي بعد فندق j w marriot. هاتمشي في طريق السويس لحد البوابات وبعد البوابات على طول هاتعمل يوترن وتخش على طريق النفق. وبعد النفق خش على طريق شرم.

بالنسبه للأمن فاهو يعتبر أأمن طريق في سيناء بس بتحصل بين الحين والحين بعض القلاقل.

ألف ألف شكر لحضرتك

المشاركة الأصلية كتبت بواسطة kingrab

أنا بكلمك من شرم دلوقتى ياريس ولسه جاى من 5 أيام ومفيش أى حاجة فى الطريق متخافش ...
أنا بسافر على الطريق ده بقالى 12 سنة رايح جاى لحد ماحفظت كل طوبة وكل ملف فيه لظروف شغلى
أوصفلك الطريق بأه بالتفصيل ياريس
الرحلة بتبتدى من طريق مصر السويس .. الطريق كويس بس حاول متزودش عن 100 كم/ س علشان الرادار ( كان زمان قبل الثورة الرادار بيقف عند مدينة بدر أو بعدها بـ 5 كيلو ) دلوقتى إحتياطى متزودش فى الحته دى
هتاخد طريق مصر السويس علطول ولا هاتحود يمين ولا شمال لحد كمين السويس ( مدخل السويس ) وتاخد أول يو تيرن شمال وبعديها علطول يمين .. هتلاقى نفسك على الطريق اللى بيودى على النفق تمشى برده علطول .. لحد متلاقى صينية ... وهتلاقى بنزنتين وطنية .. واحده على يمينك وواحدة على شمالك .. حاول تفول بنزين لأنك مش هتلاقى بنزين طول الطريق بعد كده ....
بعد الصينية كمل علطول لحد متلاقى كمين الجيش بتاع النفق .. هتلاقى عسكرى جيش بيشاورلك علشان تخش يمين علشان التفتيش .. هيشوفو الرخص ويفتشو شنطة العربية أى كلام .. وبعدين تخش على الكارتة بتاعة النفق ( بـ 2 جنيه للعربية الملاكى ) وتعدى من النفق
بعد النفق كمل علطول هتلاقى طريق على اليمين ( ده طريق مختصر بس مدغدغ .. سيبك منه ) هتكمل علطووووول لحد الطريق الرئيسى .. بس ياريس .. يمين شرم وشمال نويبع ... طبعاً هاتخش يمين ... وتفضل بقى ماسك الطريق علطول ... طبعاً الطريق كله فرده واحدة رايح جاى بدون حاجز إلا فى أماكن قليلة داخل المدن لحد ماتوصل شرم ... أول كمين هتعدى عليه هوه كمين عيون موسى هتعديه وبعدين هاتخش على راس سدر ... لو جعت أو تعبت من السواقة خش راس سدر وريح وكل هناك سمك ( أحلى سمك هتلاقيه هناك وبالذات سمك البحر الأحمر ( الشعور والناجل )) ... هتكمل وهاتشوف فى راس سدر بداية أزمات البنزين والسولار ... لو العمليه باظت معاك فى البنزبن ... سيبك من البنزينات اللى فى راس سدر ... بعد راس سدر بشوية هتلاقى بنزينة موبيل على شمالك .. ممكن تلاقى فيها .. وبعد كده هتخش على كمين أبو زنيمة .. وبعدين تخش على شوية ملفات حلوة .. على مهلك فيها على الآخر ... وبعد ماتخلص الملفات هتلاقى نفسك فى كمين أبو رديس .. كمل برده علطول لحد ماتوصل لكمين وادى فيران .. والحته دى بالذات اللى بيحصل فيها القلق من البدو علطول بس متخفش الجيش مأمنها كويس وبعدين علطول لحد متلاقى كمين الطور كده يامعلم خلاص مش فاضل غير 100 كم ... بعد ماتعدى كمين الطور هتلاقى الطريق بينقسم لفرعين .. لو تعبت من السواقة وعايز تريح يبقى تخش يمين على مدينة الطور .. ولو عايز تكمل يبقى خش شمال على الطريق لشرم ... هتمشى لحد متلاقى كمين تانى تبع الطور برده .. كمل وبعد الطور هتلاقى أحلى طريق تمشى عليه خلال الرحلة ... عايز تقفل فيه عداد العربية براحتك .. لحد المحمية بتاعة رأس محمد .. الطريق أودام المحمية متتخضش لو لقيت عربيتك مش معدية الـ 120 كم/س حتى لو كنت جايب آخر الدواسة .. دى إسمها منطقة جاذبية وقبل شرم بـ 20 كلم هتلاقى برده منطقة جاذبية تانية ... قبل شرم وأول متلاقى يافطة بتقولك شرم الشيخ 30 كلم خللى بالك بقى يامعلم من الملفات .. فيها ملفات خادعة وصعبة جداً .. والمنطقة دى ربنا يسترلك طريقك ويبعد عنك الشر ليه أصدقاء كتير عملو حوادث فيها ... الله يرحمهم .. بتبقى حوادث موت .. عموماً على مهلك فى المنطقة دى على الآخر وبكرر إوعى ملف فيهم يخدعك وتقول ده ملف مفتوح أخده على سرعتى .. بتلاقى الملف قفل مرة واحدة
هاتمشى علطوووووووووووووول .. والحمد لله على سلامتك بقيت فى شرم ... هتخش على كارتة شرم ( 3 جنيه ) وبعديها كمين الشرطة .. تكمل علطول على السوق التجارى والهضبه وشرم البلد ... شمال على الرويسات والمنطقة الصناعية ملكش دعوة بيها
إجمالى الطريق حوالى 500 كم
بس ياريس .. كده أعتقد شرح تمام التمام
آه إفتكرت .. فى حاجتين مهمين جداً عايز أقولهملك ... لو فيه أى قلق على الطريق مش هايعدوك من النفق أصلاً
تانى حاجة مهمممممممممممممممة جدااااااااااااااااااااً تخللى بالك وإنت ماشى من الطرق الفرعية بتاعة الشركات علشان ممكن تخش فيها وتفتكرها هيه الطريق الرئيسى ( قبل أبو زنيمة طريق شركة بترول فى ناس كتير بتغلط فيه لأنه مع إمتداد الطريق الرئيسى والطريق الرئيسى هوه اللى داخل شمال ) عموماً خدها قاعدة من أول رأس سدر أى تفرع هتلاقيه قدامك خش شمال علطول ..
نفس الموضوع وإنت داخل رأس سدر ... هتلاقى الطريق إتفرع علطول وشمال .. القاعدة تخليك فى الفرع الشمال
وتحت أمرك فى أى إستفسار أنا معاك .. معلش طولت عليكم

بجد مش عارف أشكرك إزاي.... أنا ان شاء الله مسافر بعد اسبوع وطبعا هاخد بالوصف الممتاز دة اللي خلاني وصلت شرم وانا قاعد في البيت... ههههههه
جزاك الله خيرا

المشاركة الأصلية كتبت بواسطة k_e

الاستاذ kingrab جاب الخلاصه وموضوع المناطق الي فيها جاذبية دي حصلت معايا وكنت حاسس ان العربيه ماشيه عالحيطه ومش بتسحب خالص رغم ان الطريق مش مطلع جامد ولا حاجه
بس احب اضيف لحضرتك
-سافر الصبح احسن لان الطريق مفيهوش اي اناره + انه رايح جاي وكل الي ماشي مشغل العالي بليل فهيكون في مشكله فالرؤيه خصوصاً ان حضرتك اول مره عالطريق ده
-قبل ماتدخل على شرم ب100 كيلو كده في منطقه فيها جمال وحاجات كده شارده مع نفسها خلي بالك منها
-من وقت للتاني هتلاقي في الحاره بتاعتك عربيه نقل ماشيه بطيء وهتحتاج تعديها . بص عالارض لو لاقيت الخط الفاصل مش مقطع متعديش طبعاً ولو كان الطريق قدامك مش باين كويس وتقدر تشوف الي جاي متعديش لان المنحنيات والمرتفعات
والمنخفضات ممكن تخدعك وتحس ان مفيش حد جاي وتدخل الحاره العكس لاقدر الله تلاقي حاجه فوشك)
-متاخدش معاك اي ممنوعات لان في نقطة التفتيش الي عند النفق شادين حيلهم اوي وبيفتشوا اماكن فالعربيه ماتخطرش على بال حد

بس الحق يتقال الطريق رغم انه مفيهوش اناره لكن متظبط من ناحية اللوح العاكسه الي عالمنحنيات وخلافه وعموماً الطريق الكثافه عليه قليله جداً وممكن تاخد وقت مش قليل لحد ما تقابلك عربيه

وتوصل بالسلامة

ألف شكر على النصيحة وأنا فعلا قررت اسافر الصبح بدري وربنا يستر..... جزاك الله خيرا

شكرا لكم جميعا يا احلى صحبة في احلى منتدى