-
معاناتي مع العربيه
ليه الواحد بيتعذب لما يكون معاه عربيه في مصر بالرغم انه المقروض جايبها علشان يرتاح!!!!
لو حسبنا سعر الاهلاك بتاع العربيه ( الفرق بين سعر الشراء و البيع) و فائده اقساط العربيه و مصاريف تامين و مصاريف التشغيل و مصاريف الركن و مصاريق الصيانه الدوريه ....هتلاقي انها فعلا خراب بيوت
و العذاب انك تبقي شاري عربيه جديده و تتسرق او تتخبط او تتحك و تروح مثلا ترشهل يقولك لا اصل سعرها هينزل في البيع لو رشه من بره ( حتي لو في التوكيل) طب يا جماعه انا ذنبي اان موتوسيكل و لا عجله او واحد حمار خبطهاّّّ!!!! و لو حصل ابقي قابلني لو عرفت تجيب حقك ( يتقالك عوضك علي الله) و تروح ترشه من جيبك و سعرها يخسر كمان.......
اسعار الدهان و السمكره ...حدث و لا حرج ....... تروح تدهن اوضه في بيتك ارخص من انك ترش باب او كبوت في عربيه قي التوكيل او ورشه كويسه!!!!
اما الصنايعيه فحدث و لا حرج....دول اكثر خلق الله جشع و اقلهم ضمير....و كل ما اروح لحد اندم علي اليوم اللي شقت فيه المدرسه ....ساعه الصنايعي بقت ب 100 جنيه و كاننا في اوربا ....ده غير وقفتك و لطعتك ....تيجي تقوله هي اخدت منك وقت قد ايه؟؟؟ يقولك اصلها مش بالوقت؟؟؟ و لو الحاجه طولت معاه يقولك يا بيه ده واخده مني ساعتين شغل
و المعاناه اليوميه انك كل يوم تنزل الصبح حاطط ايدك علي قلبك انها ما تكونش اتسرقت ...او اتخبطت ....او سرقو العلامه ( علشان تتحط ع التوكتوك) ...و يا ويلك لحد ما تلاقي راكنه و تقعد تلف حوالين نفسك لحد مانلاقي واحد استولي علي شارع الحكومه لحسابه و الدفع مقدما لو مش عاجب.....و لو ركنتها و اتسرقت ....و لا تقدر تعمل معاه حاجه ...و لو حصل لها حاجه مش هتلاقي حكومه تعبرك
و يا سلام لو مسافر علي الطريق...كميه حوادث غير طبيعيه خصوصا من الحمير بتوع النقل....و مطباات بتتحط علي المزاج و بكل الارتفاعات ....وطرق مش منوره و اسفلت بايظ من النقل و الحكومه طبعا ما معهاش فلوس تصلح حاجه....ده غير بقي ازمات البنزين و السولار و البقيه تاتي
بصراحه جزء كبير من المعاناه الشخصيه اليوميه جايه من العربيات و مشاكلها ...يا تري انتوا بتعانوا زيي و ايه الحلول بجد......الواحد اتخنق
-
ونسيت معاناة الحصول على الوقود
والطوابير بالساعات على البنزينة
والبقشيش الاجبارى ...
وقطع الغيار المغشوشة
وغيره وغيره
متقلبش علينا المواجع
شوف الموضوع ده
http://www.nilemotors.net/Nile/219643-a.html
-
-
-
يااخي ده انت لخصت كل المعاناة اللي الواحد بيعانيها انا كنت فاكر ان ده تفيكري انا بس
انا كنت بحسب اني لما اجيب عربية هستريح ومش هشيل هم حاجه
لكن تصليح وقطع غيار وشايل هم الركنه والظروف المنيله اللي واحد خايف عربيته يحصلها حاجه
ولا كل ما اركنها في حتة واحد يسيبلي عليها ذكرى ده غير الزحمة وتعب الاعصاب انت نسبت تقولها
وجعععععععع قلب
انا قررت ابيع واجيب موتسيكل
فعلا مش بهزر
احنا بلدنا اصلا كمان كم سنة مفيش عربية هتقدر تمشي فيها
الحق واجيبلي موتسيكل بقى بجد صبااااااااح الانجاز في الاختراع ده
هو مش برستيج بس الواحد اهو لسه شباب طظ في البرستيج
-
الواحد كان حاسس انه لما يبقي معاه عربيه كويسه مشاكلي هتنتهي..........ده مشاكلي ابتدت
-
المرونة السر في المرونة يعني لا تعتمد عل العربية في كل المشاوير مشاوير لا تعرفها اتصرف مواصلات تاكس مترو لغاية لما تعرف الطريق اية الحناكيش الي فية وبعدين لو داخل في حارة لا تدخل اعمل زي اخوك انا شارع عمومي بس واتمشو الحتة دي الا لو ظروف بقا تيجي تدخل شارع ضيق تلاقي الي بيستعبط وعايزك تعدي من خرم ابرة ومن غير ما تحك على اساس انك معاك كلمة السر ومرة تلاقي واحد معندوش زوق كابس عليك وبيبصلك نظرة البلهاء ارجع اصلي عايز اعدي ولا الي تلاقية فارش في الشارع ومدلدل رجلية كأنة في بيت ابوة البنزين مشي حالك مؤقتا لو ملقيتش 92 حط 90 95 موقتا لاكن اقف طوابير كمان وادفع فلوس المشكلة ان احنا من زمان مفيش قانون المفروض لما حد يخبط حد لو صاج في صاج تيجي معاينة ومحضر ونتابع بقا علشان المضرور يصلح العربية على قفا الي خبطة لاكن انا قفايا ورم وانا الي بتخبط بلدنا رغم كدة بلدنا يارب تنصلح وينهدي الحال امين
-
والله فى راى الشخصى فى جزء كبير من المشكله بخصنا ازاى لو لاحظت حتلاقى ناس كتبر اوى حلم حياتها انها تجيب عربية مش مهم بقى المصاريف كام او اقساطها ايه المهم يركب عربية و الله العظيم انا اعرف ناس عندها عربيات مركونه بالاسابيع فى الشارع يدوبك ينزل يسخنها كل فترة و خلاص مثلا بيروح الشغل مواصلات او اوتوبيس الشغل وكل فترة ينزل يشترى حاجات بيته بيها و دومتم بس واخدة مساحة على الفاضى فى الشارع و طبعآ مصاريف بدون داعى
-
كل اللي بتقوله صح ومضبوط بس الموضوع مايتاخدش بالنظره التشااؤميه دي علشان نفسيتك ما تتعبش.
موضوع مشاكل الطريق والبلطجه والخبطات وخلافه ربنا اللي بيحرسك بس انت برضوا لازم تاخد بالاسباب , يعني تمشي بهدوء وبالراحه ومايجراش حاجه لو سبت الناس تعدي وانت اللي انتظرتهم وصدقني الحاجات دي بتقلل بنسبه كبيره من مشاكل السير اليوميه . بالنسبه للركنه هي فعلا صعبه بس انا شخصيا مش بركن غير في جراش او حتى ركنه هاديه ولو هدفع فلوس لاني لقيتها اريح وارخص , هتقولي ارخص ازاي يا مجنون هقولك لما ادى السايس 2 جنيه في 50 مره اركنهم اوفرلي من اني ارش او اصلح لا قدر الله وكمان ارحم على اعصابي ونفسيتي ووقتي في البحث عن ركنه .
بالنسبه لقطع الغيار وخلافه فالمفروض ان حضرتك بتثبت على مكان واحد تثق فيه وتجيب منه ولو ان الايام والتجارب علمتني ان الغالي والاصلي ثمنه فيه لاني جبت تيل فرامل مضروب كلفني بعدها اصلاحات بحوالي 3000 جنيه ولما جبت الاصلي ((اغلى 3 اضعاف)) الحمد لله ماغيرتوش من 3 سنين .
عموما كل جوانب حياتك فيها نقاط سلبيه وابسطها الجواز :) لو عملت نفس المقارنه هتلاقي نفس النقاط السلبيه .
-
عايز اقولك حاجه كمان ..... عندي مبداء بيقول : ماتدخلش في حاره مهما كان - ماتروحش الاماكن الزحمه بعربيه اطلاقا - امشي شويه افضل بكتير من الدخول لاماكن غريبه بعربيتك - حاول تعرف اي حاجه عن اي طريق تمشي فيه لاول مره .
Content Relevant URLs by
vBSEO 3.6.0 PL2