صني 2013 - الباور ستيرينج - لمبة الخرائط

**the_air_devil** · 11-09-2012 11:24 AM

سلام عليكم يا أجدع صقور

وتحية وتهنئة من القلب للدكتور يوسف عوض على انضمامه لكوكبة المشرفين على القسم وربنا يزيده علم ومعرفة وتواضع

بصفتي مجرب قيادة عربيات كتير, منها اللي من غير باور أساساً (رينو 12) ... ومنها اللي بتعمل الباور على روحها (فيرنا أوتوماتيك)... ومنها اللي الباور بتاعها ممتاز ومتزن ( فولكس فاجن جيتا - رينو فلوينس)... أقدر اقول ان الباور بتاع نيسان صني الجديدة يندرج تحت فئة الممتاز والمتزن , وربنا يديمها نعمة

انما ليا ملاحظتين:

أول حاجة: لو العربية واقفة معروف ان الباور بيكون تقيل بسبب ان الكاوتش لازق في الأرض تحت تقل وزن العربية , لكن لاحظت اني لو دست فرامل والعربية واقفة بالاقي الباور نعم جداً والدركسيون لف بكل سلاسة ... لست أدري ما السبب

تاني حاجة: الباور بيتقل كل ما السرعة تزيد, وده من ضمن مميزات الأمان في العربية لأن ناس كتير مش بيعرفوا يقدروا ميزان الدركسيون مع السرعة وبيتعاملوا معاه زي ماتكون العربية على سرعة بطيئة, وده بيعمل كوارث وبيسبب انقلاب العربية لا قدر الله .... ساعتها بالاحظ سخونة طفيفة في علبة الدركسيون نفسها, وده شئ طبيعي علشان دورة الزيت داخلها مع السرعة..... نيجي بقى لما تحب تركن وتخلي الإيموبيلايزر يشتغل ... لازم لما تطلع المفتاح من الكونتاكت... تدور الدركسيون ناحية اليمين حوالي 30 درجة, لحد ماتسمع تكة قفل الدركسيون , المفروض بنلاقي الدركسيون تقل لأن العربية مقفولة والمفتاح برة الكونتاكت ودورة الباور مش شغالة لأن الموتور مبطل ...

لكن كذا مرة الاقي الدركسيون ناعم الحركة لحظتها كأني مدور وماشي على سرعة ولتكن 40 كيلو !! هل من تفسير لهذه الحركة من السادة خبراء الباور في نيسان صني؟؟

وكمان حبيت احكي على حاجة عجيبة, ممكن ناس تعتبرها بسيطة قوي لكنها بتبقى ضرورية في أحيان كتير

صالون نيسان فيه لمبتين إضاءة: واحدة في منتصف السقف واسمها "لمبة الصالون" ... والتانية قدام قائد السيارة في المنتصف ومسميينها في المانيوال "لمبة الخرائط"

اللمبتين بينوروا لما افتح باب العربية ... طبيعي

وكمان بينوروا لما ابطل الموتور واسحب المفتاح من الكونتاكت ... العربية بتقوللي انزل بقى زهقتني

وكذلك لما تفتح السنترلوك من الريموت , علشان تنور العربية تستقبلك وانت داخل بأحسن مايكون

انما نيجي لما احب اشغل نور الخرائط ده وانا قاعد جوة العربية, المفروض فيه تكة تخليه ينور لما الباب يفتح, وتكة تخليه مقفول على طول ... وتكة تخليه منور على طول

التالتة دي مش بتشتغل عندي, افتكرت ان اللمبة ممكن تكون محروقة, لكن النور بينور عادي لحظة فتح الباب أو الخروج من العربية

وكذا مرة احتاج للمبة دي قدام وماترضاش تشتغل, وماشتغلتش ولا مرة لما حاولت افتحها وانا جوة العربية

السؤال هنا ... هل كل السادة مالكي صني الجديدة بيواجهوا المشكلة دي, ولا انا لوحدي وبس...مافتكرتش احكيلهم عليها في مركز الصيانة ...لكن ثقتي في الأعضاء هنا ان عندهم خبرة أحسن من مركز الصيانة , ومستني ردودكم الجميلة

مليون شكر مقدماً ...سلام عليكم

**akmm** · 11-09-2012 12:27 PM

تقرير جميل ... ومتابع .

**Amr2004IBM** · 11-09-2012 01:01 PM

موضوع اللمبه ده لازم تشوفه في التوكي

**GRADER** · 11-09-2012 02:44 PM

بالنسبة لكلام حضرتك (لما أبقى عايز أشغل الايموبيلايزر) أنا مش فاهم قصد حضرتك ايه؟؟ هوالايموبيلايزر كده كده بيشتغل لوحدة من غير ما تعمل أى حاجة أول ما تشيل المفتاح من الكوتناكت !!

بالنسبة للمبة اتأكد ان حضرتك دوست على الزرار للأخر ولو ما اشتغلتش اللمبة يبقى تروح التوكيل

بالنسبة للباورأول ما حضرتك ما تبطل العربية تقريبا والله أعلم بيكون لسه الكهرباء واصلة لموتور الباور عشان كده الدركسيون بيكون لسه خفيف بس لو انتظرت 5 ثوانى بس هتلاقيه تقل عادى

**mohamednagib** · 11-09-2012 02:51 PM

نقل رائع لانطباعك عن الصني الجديدة .. فعلا فتحتو نفسي للتغيير

**محمد بدر** · 11-09-2012 03:42 PM

ألف مليون مبروك ربنا يبارك لك فيها ويعطيك خيرها ويكفيك شرها ويمتعك بيها انت واسرتك

**Youssef.Awad** · 11-09-2012 04:24 PM

المشاركة الأصلية كتبت بواسطة the_air_devil

سلام عليكم يا أجدع صقور

وتحية وتهنئة من القلب للدكتور يوسف عوض على انضمامه لكوكبة المشرفين على القسم وربنا يزيده علم ومعرفة وتواضع

وعليكم السلام يا استاذ أحمد .. ومتشكر ع المدح والدعوة الحلوة دى

المشاركة الأصلية كتبت بواسطة the_air_devil

ليا ملاحظتين:

أول حاجة: لو العربية واقفة معروف ان الباور بيكون تقيل بسبب ان الكاوتش لازق في الأرض تحت تقل وزن العربية , لكن لاحظت اني لو دست فرامل والعربية واقفة بالاقي الباور نعم جداً والدركسيون لف بكل سلاسة ... لست أدري ما السبب

مبدأيا لو العربية واقفة بدون حركة لكن الموتور شغال .. يبقى دورة الباور شغالة وبالتالى المفروض يكون ناعم مع الاخذ فى الاعتبار طبيعة الارض الملامسة للكاوتش ومقاومتها اذا كانت غير ممهدة او حصوية او اسمنتية زى اغلب ارضيات الجراجات العامة (ممكن تلاحظ مقاومة بسيطة)
اما بالنسبة لزيادة النعومة اذا ضغطت على الفرامل فاغلب الظن ان الفرامل لها علاقة بحساس الباور الذى تتلخص وظيفته فى زيادة الrpm بقدر ولو بسيط ومن ثم سهولة تحريك الدركسيون
كما ان ضغطك على الفرامل يهيىء العربية الاتوماتيك لأخذ غيار وايضا عند الانتقال الى الD هتلاحظ زيادة فى الRPM بنسبة طفيفة قبل الضغط على البنزين
ملحوظة: راجع موضوع شرح عمل حساسات الصنى تحديدا فى المشاركة رقم 42 للصديق احمد ابراهيم fbi
http://www.nilemotors.net/Nile/303610-a-3.html

المشاركة الأصلية كتبت بواسطة the_air_devil

تاني حاجة: ..... نيجي بقى لما تحب تركن وتخلي الإيموبيلايزر يشتغل ... لازم لما تطلع المفتاح من الكونتاكت... تدور الدركسيون ناحية اليمين حوالي 30 درجة, لحد ماتسمع تكة قفل الدركسيون , المفروض بنلاقي الدركسيون تقل لأن العربية مقفولة والمفتاح برة الكونتاكت ودورة الباور مش شغالة لأن الموتور مبطل ...

لكن كذا مرة الاقي الدركسيون ناعم الحركة لحظتها كأني مدور وماشي على سرعة ولتكن 40 كيلو !! هل من تفسير لهذه الحركة من السادة خبراء الباور في نيسان صني؟؟

التفسير من وجهة نظرى لأنى مجرب هذا الموضوع فى هيونداى نيو اكسنت 2007 وفى الغالب كل الباور الكهرباء نفس الوضع عكس الباور الزيت زى الصنى القديمة مثلا التى يتوقف عمل الباور بها بمجرد ابطال الموتور
مع الاخذ فى الاعتبار ايضا طبيعة الارض كما سبق واتجاه العجلات مع بوش الدركسيون يمين وشمال (لو التكة كانت قريبة من حيز البوش هاتحسه خفيف والعكس صحيح)
وملحوظة تانية احب اقولها .. وهى لو قفل الدركسيون او اتجاه العجل كان قريب من القفل لما تيجى تدور تانى هتلاقى المفتاح بيدور بسلاسة بدون اعادة توجيه الدركسيون
اما لو كان فى النصف مثلا وانت حركته لحد اما قفل الدركسيون هتلاقى صعوبة فى لف المفتاح ولازم بايدك تحرك الدركسيون فى اتجاه القفل حتى يمكنك لف المفتاح

المشاركة الأصلية كتبت بواسطة the_air_devil

لما احب اشغل نور الخرائط ده وانا قاعد جوة العربية, المفروض فيه تكة تخليه ينور لما الباب يفتح, وتكة تخليه مقفول على طول ... وتكة تخليه منور على طول

التالتة دي مش بتشتغل عندي, افتكرت ان اللمبة ممكن تكون محروقة, لكن النور بينور عادي لحظة فتح الباب أو الخروج من العربية

طالما مالكى الصنى الجديدة اكدولك عملها يبقى اكيد فيه سلك فاصل فى التكة دى وفى اقرب وقت او صيانة اكشف عليها فى التوكيل لأنها فعلا بتكون مفيدة فى اوقات الضرورة واقرب لليد من نور صالون منتصف السقف