غيرت سوست ومساعدين خلفى للكرستالة بنفسى
السلام عليكم
من فترة لقيت العربية بتسحف على الارض(واطية اوى) بالاضافة الى موسيقى حسب الله طول ما انا ماشى طبعا كانت محتاجة مساعدين وتغيير السوست فكنت مأجل الموضوع دة لغاية ما حد يحن علينا من اللى ركبوا سوست اقوى لتعلية الربية ويقول لنا نجبها منين (متهيألى واحد قال العفشجى اللى جابهملى وواحد قال جبت بتوع المرسيدس)
المهم قولت اشترى مساعدين وسست جداد واركبهم عند اى عفشجى (مع انى كنت حالف ماروح لصنايعى تانى بعد اخر مرة عملت فيها العفشة قدام وورا والحوارات اللى اكتشفتها متأخر ... ماعلينا) لكن كانت مشكلتى الوحيدة هى تركيب السوسة فى المساد ودة بيحتاج زرجينة خاصة.
رحت لعفشجى قلتلة عاوز اغير السوست والمساعدين بص على العجل وشدة علية كدة وقالى انت محتاج شدادات كمان قلتة انهى شدادات بالظبط قالى الاربعة وهاتهم استيراد لان الجديد مابيعقدش
رحت لبتاع الاستيراد قالى الواحد الصغير ب 75 جنية والكبير ب 100 ياعنى الاربعة ب 350قلتة هاخده ب300 قالى ماشى لكن بعد ما جبهم اكتشف انهم بتوع الميراج مش الكرستالة وقالى ابقى اتصل بى هبقى اشوفهملك
رجعت بالعربية البيت وكان عندى اجازة يومين واقعد افكر ازاى اركبهمبنفسى ووصلت لطريقة فاتكلت على الله وفكيت العجلة الشمال وحملت العربية من النص على قوالب طوب وفكيت الشدادين ولقيته فى الضياع( الشداد بيحتاج يتغير لو الجلب الكاوتش اتقطعت) وسألت على الجلب لوحد لقيت نوع تايلنى نضيف ناس مجرباة وشحطهم عند خراط وركبتهم عادى (لكن خد بالك من اتجاهات الشدادات وركب بتوع العجلة اليمين فى اليمين والشمال فى الشمال)
اولا فك المساعد القديم من العربية (مسمارين داخل الشنطة اعلى داير العجل ومسمار سفلى اللى ماسك المقص بالمساعد)
- بعد ما تطلع المساعد برة فكة من بعضة ودة من خلال فك الصامولة (17) اللى فوق ولو لقيت عمود المساعد بيلف معاك امسكة فى الاول بمفتاح انجليزى (خد بالك لما تقرب من نهاية الفك وجة المساعد فى مكان آمن علشان هتنطر منك اول ما يتفك بفعل ضغط السوستة)
نيجى بقى لتركيب السوستة فى المساعد ودى اسهل مايمكن....
اولا :اربط البطاحة (الجزء اللى بيكون اعلى المساعد وخارج منة مسمارين بتربطوا فى جسم العربية من جوة الشنطة) فى جسم العربية الاول
ثانيا :جمع المساعد مع السوستة مع الصدادة الحديد والصدادة الكاوتش زى ما فكيتة ولو لقيت حاجة منهم متاكلة غيرها وبعدين اربط المساعد من تحت بالمقص زى ما كان راكب من تحت
اخيرا خط الكوريك تحت المقص وابدا ارفع سنة سنة لحد ما نهاية المساعد العلوى يدخل فى البطاحة وبعد كدة اربط مسمار المساعد من شنطة العربية وكرر دة فى العجلة اليمين ومبروك عليك تركيب المساعد
انا اسف جدا انا من عادتى انى اصور اى حاجة بعملها لكن كنت لوحدى فا معرفتش اصور وانا شغال لكن لو حد عندة اى استفسار انا تحت امرة
---------------------------------------------------
على فكرة انا غيرت بردة سير الكاتينة بنفسى (معلش اصل انا غاوى بهدلة) وان شاء الله هعمل موضوع عالية بالصور
